【兩台無聲摺埋】now觀星台下月中停止製作

nowTV旗下嘅「香港電視娛樂」獲批12年免費電視牌照,為咗投放更多資源落免費台,之前一直有傳now會重組,收費嘅102觀星台將於9月底關閉,梁思浩同梁榮忠嘅王牌節目可能無聲無息被cut走,全部藝人冇得留低!本報收到新消息,原來唔係重組咁簡單,據知,上個星期now通知內部員工,9月18日就係101及102兩台嘅「死期」,之後兩個台會全部滾筒式播舊節目,變咗好似亞視咁,不停地重播重播又重播!

消息話由於101同102都係收費電視台,之前客戶訂講時合約包咗呢兩個頻道,所以唔可以話摺就摺,惟有諗計藉「重組」之名轉為重播節目,令兩個收費電視台可以「繼續運作」,唔會畀訂購客戶投訴。

由於所有自家製作節目被叫停,全部主播喺下月18號變咗冇工開,有啲合約主播明年先約滿,就會早一個月通知作出遣散,不過,據知大肚主播鄭文就冇咁好彩,因為鄭文係大國文化旗下藝人,日前鄭文被通知同nowTV嘅合約即時完結,冇得補產假!

據知,9月尾臨盆在即嘅主播鄭文,本來諗住產假就放前2後8,仲以為可以做到下月18號,好來好去,點知早幾日接到通知,叫佢上周四(13號)做埋最後一集唔使再返工,仲要唔畀佢喺節目講bye bye,更加唔可以宣佈自己做最後一集。

本報致電鄭文了解,佢承認收到通知:「9月18日成個台停咗,之後只會播舊節目,自己已經走咗,我問過應該冇產假。其實我咁啱之前約滿,我又要去生仔,所以趁機放假囉。」問有否覺得唔公平?鄭文支吾話:「哎...我唔清楚...咁啱8月中約滿,又未傾到新約,一直拖拖拖到放假前幾日,大家先有最後共識,自己冇乜唔開心,不如生完再睇有乜合作。」

大國文化藝員管理部總經理洪先生回應:「佢本身要請產假,因為咁啱合約8月中到期,不如等佢安心生完再傾,合約形式唔同打工,最主要佢係咁啱約滿,約滿咗梗係冇產假。」  

http://hk.apple.nextmedia.com/enews/realtime/20150816/54095408

佢摺咗兩個台,竟然係完全停工炒人?
又話去集中資源去整免費台,咁炒曬啲人無制作免費台播乜?
得返新聞財經係新制作?

TOP

佢摺咗兩個台,竟然係完全停工炒人?
又話去集中資源去整免費台,咁炒曬啲人無制作免費台播乜?
得返新聞財 ...
pakchi70 發表於 2015-8-17 18:27

蘋果新聞

TOP

回覆 3# bbbear
但相信係真事
只能說鄭文真係極度唔好彩,電盈就極端不近人情,連啲應使嘅$都慳

TOP

生果又想比小超告

TOP

回覆  bbbear
但相信係真事
只能說鄭文真係極度唔好彩,電盈就極端不近人情,連啲應使嘅$都慳 ...
cpk 發表於 2015-8-17 18:35


蘋果冇咗 tvb 同佢玩  維基又就死 咪玩now囉 蘋果最鐘意作大

TOP