勇試Apple Watch淘寶錶帶,連詳細評語。

本帖最後由 ntony 於 2015-6-24 23:11 編輯

相信好多師兄師姐都會覺得,Apple Watch錶帶貴過錶肉。雖然Apple錶帶造工的話係一流,物有所值(?)。不過應該有唔少同學都好似小弟咁認為,妹仔大過主人婆。

加上Apple錶帶有時都唔係咁啱自己口味時,係唔係可以放眼向外。錶帶周街都係,係唔係可以用外面嘅錶帶試下襯返自己個風格呢?之前一直起呢個forum問有無師兄師姐買咗淘寶錶帶或配件可以分享一下,可惜回響不大。所以小弟決定拋磗引玉,自己分享一下自己嘅成果先,好嘢同中伏都分享一下,等呢個forum多點Apple Watch自用用家嘅聲音。

注意,圖片及內容不得轉載到HKEPC以外網站!要分享,請貼連結,多謝!

好!今次小弟淘咗三條錶帶。有滿意,有失望。圖片未必反映到實物靚唔靚同質感,大家最好睇評語!

聲明:我貼埋link係想俾有興趣買嘅師兄師姐予一個方便,唔係賣廣告!亦俾都師兄師姐知,我起邊度買嗰條係伏,唔好中。



先嚟一張大合照先

由先去講最差嘅一條啦!

價錢:168.00人民幣(國內包郵)
贈品:無
超連結:http://item.taobao.com/item.htm? ... &_u=oberp022d02

總結評語:
-包裝簡單
-外觀同造工原裝有好大出入,呢條好陽春。實物睇落去一尐都唔吸引眼球,總之成個感覺好鬼雞。
-錶扣做得唔夠吻合,凸咗好多出嚟(見圖)。扣得亦唔夠緊。
-不幸之中嘅大幸係,皮嘅質地幾舒服,亦都好軟滑。但睇落真係唔靚,亦都因為佢軟滑,所以質感好單薄,好弱。
-同原裝真係無得比。雖然話佢價錢差咁遠,但佢賣百幾蚊人民幣,你就真係當佢真街上一百幾十港紙嘅貨色用好喇。同你隻普通錶買條幾十蚊錶帶用一樣效果。
-錶帶同個扣寬度差好遠,睇落好肉酸。(見圖)


皮質麻麻,同原裝差好遠。睇落好膠質,不過摸落去又唔膠,又幾舒適。唔好睇佢淘寶咁多人評價佢「高大上」,又「跟原裝一樣」,信一般內地人審美真係必死。你可以睇到錶帶同個扣闊度做得唔好,側埋一邊時都幾肉酸。(大部份時間都側埋一邊㗎啦)


留意下佢個扣同錶肉接駁位,個扣明顯長同凸咗出嚟,實物睇係好覺。認真睇會幾肉酸。


呢幅其實係想再影清少少佢個扣同錶肉幾唔吻合嘅,不過iPhone影相剛好out focus咗。



呢兩張俾大家參考一下外觀,同原裝幻想比較一下。


好,另一條皮帶。

價錢:99.00人民幣(國內包郵)(全5星並寫10字以上好評,再截圖證明俾客服睇可以現金回贈2人民幣落支付寶)
贈品:無
超連結:http://taiwan.tmall.com/item/454 ... &_u=oberp027fb2

總結評語:
-包裝還好
-造工不錯。外觀都幾好。雖然係old school款,但實物一點都唔老土,戴上去立即增添幾分氣質。
-錶扣做得唔錯,幾吻合(見圖)。扣得緊。
-皮有少少硬,估計呢款皮要戴一段時間會變軟。雖然佢造工靚少少,不過觸感反而唔及上面一隻柔軟順滑。但觸感仍然係唔錯,配戴仍算舒適,相信等戴軟咗塊皮之後會更舒服。
-有少少厚度,中間夾層應該係包咗嘢,內裡一層軟身有彈力。



前後質地都唔錯,外觀討好。


底部皮質接觸皮膚配帶舒適,錶扣同錶肉尺寸吻合,亦唔會鬆。


唔好睇佢前面好似皺皮,其實實物皺紋唔係咁覺。


請留意佢個扣唔同一般嘅副廠錶帶扣,佢係一體嘅扣,係唔Classic Buckle款嘅扣。咁樣其實幾靚。


再影清楚少少個扣。


好!輪到鋼鍊。

價錢:198.00人民幣(國內包郵)(全5星再上載圖片,通知客服可以現金回贈5人民幣落支付寶)
贈品:錶鏈調校器,叉電支架(附圖),軟膠保護殻,錶面貼
超連結:http://taiwan.tmall.com/item/451 ... &_u=oberp024861

總結評語:
-包裝精美豪華
-外觀同造工一流,錶帶打磨質感不錯。無山寨感,似足牌子貨。
-錶扣吻合。扣得緊,但未完美,拉扯時有好少虛位走出嚟。
-鋼質算靚,戴落去舒服。
-雖然唔及Apple條鋼帶,但呢條我都俾佢85分。做工拋光絕對見得人。
-條鏈個開關扣做得唔錯。又吻合,又唔會鬆,又唔會硬。好過我以前用過嘅平嘢鋼鍊錶好多。絕無投訴。
-外觀唯一挑剔位係錶扣同個鏈帶唔似Apple咁一體(見圖),佢用Classic Buckle款個扣,再扣條錶帶上去。




包裝盒靚不特止,拆開後錶鏈帶好似大廠咁有保護貼。認真,唔似一般山寨廠貨。


外觀唔錯,同隻錶算係幾夾。


實物造工拋光絕對比相中好好多!唔信買一條睇下,伏極都係百幾蚊人民幣,連運費拆做港幣都係二百幾。到時就知我無呃你,唔會差得過我隻平嘢精工。


個扣都算做得fit,係用力拉會有少少郁。


唯一唔好嘅係佢用Classic Buckle款個扣。中間個大咕窿大剎風景,同條鏈帶個風格唔襯。Apple條鏈個接合位係抵佢值咁貴嘅。下面一張係Apple嘅,以供比對。



呢張勉強可以睇到佢鋼水同拋光其實唔錯嘅。個開關做得好好,內面個孤度亦好合適。


贈品叉電錶座。我好後悔試用佢,因為我一拍個叉電器落去就到而家都挑唔返佢出嚟。 咁就一世喇⋯⋯

其實贈品我唔開亦唔影啦,絕對唔會用。戴錶戴膠套,黐膠貼⋯⋯戴唔起幾千蚊一隻錶,俾我就買返G-Shock算喇,至少戴得安心自然。

死圖喔?

TOP

支持!!有冇圖睇下

TOP

死圖喔?
shal 發表於 2015-6-24 21:18


唔好意思,Google Drive share圖失敗。轉返用Flickr。

TOP

唔好意思,Google Drive share圖失敗。轉返用Flickr。
ntony 發表於 2015-6-24 22:29



    都好似幾好喎。

TOP

支持師兄分享!!

TOP

希望更多勇士肯出嚟分享一下,我相信總有好多勇士起水底嘅。

TOP

支持分享!

TOP

Thanks for sharing

(Sent from HKEPC iPhone app)

TOP

我本身戴開PANERAI, 都有自己另外買錶帶, 但如果我想將D錶帶裝上去APPLE WATCH, 係咪要買個專用扣? TB個D扣造工如何?

TOP