[開箱] HUAWEI P8 Lite開箱試玩!(30+張圖片!)

本帖最後由 hk133 於 2015-8-18 11:43 編輯

Sorry,今日有啲忙,暫時擺住幾張相比大家睇下先,其他內容聽日補番。。。

華為嘅手機,唔少CHing都話品質唔錯。
今日家母突然想換手機,匆忙上網搜尋資料,最終決定去買一部P8 Lite。
點知店員話無白色,所以買左一部黑色。



P8 Lite嘅包裝,我覺得都幾美觀,國產手機黎講真係幾好睇。



兩側都有一個華為嘅logo,而且係金色。不過反光好勁,所以好難拍得清。。。



包裝正面只有P8 Lite字樣,非常簡潔。



打開包裝之後,兩個盒中間夾住一部P8 Lite。



其他內容聽日更新。


***************

今日繼續開箱!



原來手機旁邊兩個盒係手機附帶配件同埋說明書。
哩個包裝比起我見過嘅其他國產手機精緻好多!
尤其係配件嘅盒,華為非常貼心,加入左一個空位,方便取出個盒。




打開配件盒,入面有四樣配件:耳機,數據線,充電器同埋拔卡針。
不過點解黑色手機嘅配件全部都係白色??
感覺上好似唔小心將白色手機嘅配件裝左落黑色手機嘅包裝入面。




攞出配件,全部都係白色(除左拔卡針)。。。
配件外觀唔錯,比起普通平價機黎講,比較美觀。
不過拔卡針平平無奇,上面亦都無刻住HUAWEI嘅logo,係包裝入面唯一一件無HUAWEI logo嘅物品。
或者應該向Oneplus,meizu等國產廠商學習,整一個更加美觀嘅拔卡針。




充電器,輸出居然只有1A,令我有啲擔心會唔會充電好慢。
好彩之後測試左,發現速度都算係可接受嘅範圍。
但充電器嘅生產商居然係“huntkey(航嘉)”,哩一點有啲意外。
雖然都知道航嘉有做手機充電器,但無諗到居然仲做埋代工。。。




充電器無接地線,哩個係當然嘅。
所以接地線嘅位置變成膠腳。
膠腳上面兩側均刻有“PUSH”字樣,提醒用家於使用前將插頭膠腳向上推。




USB插頭位置上方刻有“HUAWEI”logo。
充電器應該係刻有最多“HUAWEI”logo嘅配件。。。




耳機嘅設計類似apple earpod,不過發聲開孔嘅外觀有些許不同。




說明書。買左幾部平價機,說明書最詳盡就係哩部手機。




哩兩張貼紙其實有咩用???
相信就算其他CHing買左華為手機,都唔會攞哩張貼紙周圍貼。。。




手機下方只有HUAWEI logo,側邊有喇叭同埋Micro USB接口。
喇叭位放喺手機側邊,比起放喺背面好好多。
喇叭開孔非常工整,平價機有哩個做工真係幾好。




手機上方有一個通話揚聲器,揚聲器旁邊有一個前置攝像頭。
側邊有一個耳機插孔同埋一個降噪咪(應該係)。




手機右側有音量鍵,電源鍵,同埋兩個卡槽。
電源鍵有獨特紋理,非常好睇。
雖然邊框係塑膠材質,但睇落真係同金屬無咩分別。




背面有髮絲紋理,手感幾好,外觀一流。
HUAWEI logo唔算太突出,整體觀感唔錯。




鏡頭位置加上一塊黑色鏡面飾板,令手機睇落更有個性。
不如將我嗰部zf2比左家母,我用哩一部手機啦。
不過最後我都係覺得zf2好啲,如果想知道原因就睇埋落去啦!




攝像頭特寫。
閃光燈睇落好似係雙LED燈設計,但其實只有一粒LED。。。




與zf2作對比,可以睇到P8 Lite嘅相機比zf2大少少。




開機畫面。超大HUAWEI logo,下方有一個android字樣。



開機動畫係個logo發光。




第一次點亮屏幕,鎖屏畫面係咁樣。




第二次點亮屏幕,鎖屏畫面唔同左!
原來每次睇鎖屏畫面,佢都會自動更換背景圖片。
每次開著個mon都好有新鮮感。




系統桌面無app drawer,標準國產手機特色。






內置手機管家,功能都幾多。




有關機鬧鐘,啱曬鐘意熄機瞓覺嘅家母。




預載EMUI 3.1,到手第一件事就係更新系統,但居然無更新。。。
算啦。。。家母都唔鐘意成日有系統更新。。。




2G RAM都幾夠用,開左幾個app,仲有1G RAM剩。




買左新手機,當然要跑個分啦!




但係3D遊戲測試嘅真係唔掂,僅僅比紅米1表現好一啲。
相比起ZF2,慘不忍睹。。。
所以P8 Lite都係留番比家母啦。。。




32bit嘅跑分達到30000+,表現一般。




隔一日再試下64bit,跑分提升至35000+,都算可以接受。




有單手模式,一隻手都可以輕鬆玩手機。
而且機身比較輕,所以單手操作無咩大問題。





開箱完畢,感謝觀看!
部分圖片係今日補拍。。。



******
附件: 您需要登錄才可以下載或查看附件。沒有帳號?註冊

lm 謝c兄開箱

TOP

最大劑係冇OTG,放都放唔切

TOP

最大劑係冇OTG,放都放唔切
cpk 發表於 2015-8-17 21:00


今時今日會有手機用唔到OTG??等我一陣試下先。

TOP

回覆 4# hk133
你冇睇衛訊月刊咩?
我就係後來睇返先知冇(當然插落去冇反應已知出事)
h4X都有....

TOP

最大劑係冇OTG,放都放唔切
cpk 發表於 2015-8-17 21:00


對你來講冇OTG有幾大劑?

TOP

回覆 6# 問題大2011
咁唔使吓吓插電腦嘛
抄入抄出用OTG方便好多

TOP

回覆  問題大2011
咁唔使吓吓插電腦嘛
抄入抄出用OTG方便好多
cpk 發表於 2015-8-17 21:26

冇 USB OTG 係有 D 唔方便,但 ching 你又唔使講到冇左好似唔可以接受咁。

我覺得一部手機有冇某 D 功能,對大部份人來講,梗係「有好過冇」,但講到尾,究竟 User 用唔用得著,呢個都係廠商會考慮既問題之一。正如我公司有一位上左年紀既同事,佢上年終於換左 Smartphone,我早排問佢,原來佢除左用黎 WeChat、WhatsApp,其他功能佢係完全未用過,亦唔覺得有需要用!

所謂百貨應百客,你唔岩,唔代表其他人同你一樣嘛。

TOP

回覆 8# 451KL
不過對冇PC的人就.....

TOP

回覆  hk133
你冇睇衛訊月刊咩?
我就係後來睇返先知冇(當然插落去冇反應已知出事)
h4X都有.... ...
cpk 發表於 2015-8-17 21:21


從來都無睇。。。
頭先試左,真係無反應。。。
但儲存設定係有“USB儲存裝置”一欄。。。
不過家母唔需要OTG,所以無所謂。。。

TOP