[分享]座廁維修

本帖最後由 wukw 於 2015-6-19 23:37 編輯

家中座廁早排首先發現入水好慢,大約兩小時先注滿缸水以供冲廁。以為入水波曲有事,檢查過又唔似有問題,關閉水箱閘掣並拆開接駁波曲之筷子喉,發現有一微弱、好幼嘅水柱噴出,就算此際開番閘掣,噴出嘅水柱仍然係咁微弱,因此懷疑水箱閘掣損壞。玩玩吓再發現有冲廁水不停流入廁盆中



唯有落去屋苑街市搵水電師傅打價 - 換閘掣 + 冲水裝置,嘩佢阿爺吖要成七百蚊。思前想後,把心一橫決定自己嚟。
首先要做嘅係去管業處申請停鹹水,跟著落去旺角上海街/新填地街買料:
閘掣 $35,由於檢查時已經發現水箱上住座廁啲膠螺絲已經斷咗,所以順手買埋右下角包螺絲 $25



跟著買埋冲水裝置(水芯?原來行內人叫缸芯)$65



總數 $125,講起買料都被人玩。話說落去新填地街(介乎亞㫮老街與快富街)間南X五金,俾條店員寸問乜嘢 size 死都唔肯拎出嚟望一望,講講吓先好不情願拎出嚟
至於包螺絲仲頂癮,問咗幾間五金舖都冇,卒之去咗上海街某潔具舖有,嗰店員話而家已經冇塑膠螺絲,全部轉晒不銹鋼㗎啦,又係死都唔肯拎出嚟睇過,卒之走人去咗好出名間富X買,價錢一樣。

好啦到咗停水嗰上午,先拆開連住波曲條筷子喉,再鬆埋連住水箱及座廁嘅螺絲就可以成個水箱攞走。





跟著就係換咗舊嗰個閘掣及筷子喉,鬆閘掣期間標咗不少黑色好污穢嘅水出嚟;然後就換埋新嘅螺絲及缸芯落嗰水箱度,記得依次序上番啱啲封囗膠圈及介子。原本諗住加番銅油灰保險啲,不過樓下一千零一間金X五金舖要我十蚊,結果慳番。其實如果啲封口膠圈係全新兼接囗清潔乾淨及平滑,係可以唔使銅油灰。攪掂之後先張水箱放落一個膠桶上面再注水入水箱試一試兩粒螺絲位及缸芯冇漏水兼夾缸芯可以正常冲水,就可以放番嗰水箱落原位,先收番兩囗螺絲。再用介力切啱閘掣與波曲入水口嘅筷子喉長度,收緊就可以。
至於有師兄提到嘅「士點」膠布,其實可以唔使落,因為筷子喉係靠「嗲巴」位嚟封住啲水,只要冇歪斜到,收緊後係唔會漏水嘅,事實上我都冇落

換出嚟嘅零件


死因研究:原來上水慢係因為筷子喉俾啲淤泥塞咗,至於缸芯就因為塊止水膠移咗位



結論其實可能嗰閘掣都冇事,缸芯移番正塊止水膠皮,通番條筷子喉就攪掂。
不過既然買咗料返嚟,當然換埋佢,起碼冇手尾跟

支持diy

食水深

TOP

家中座廁早排首先發現入水好慢,大約兩小時先注滿缸水以供冲廁。以為入水波曲有事,檢查過又唔似有問題,關 ...
wukw 發表於 2015-6-19 15:50



  明當你水魚

我公司要成個水箱換

連工+料都是730蚊

TOP

回覆 3# CKW


    水閘制+出水, 兩樣野, 貴過換水箱唔奇。
如果用一體式馬桶, 就無得成個水箱換。

TOP

唔影埋士甸膠布

TOP

香港最貴喺咩,就係人工鋪租,人哋都要交租養家嘅,料值幾錢?DIY就最實際。

TOP

其實佢收五百我都制,免煩。
不過經此一役,原來 easy job 嚟

TOP

師兄你好勁,小弟拜服,我想問下其實你一開始係未就已經有信心攪得掂?如果攪到一半唔3唔4未幣?

TOP

師兄你好勁,小弟拜服,我想問下其實你一開始係未就已經有信心攪得掂?如果攪到一半唔3唔4未幣? ...
vv123 發表於 2015-6-19 19:27


真係攪到一半攪唔掂既話,咁唯有比錢人賺囉

TOP

回覆 1# wukw


    樓主好野

TOP