[開箱] 小改變大改善

小弟一向都唔迷信, 多從設定校聲或覺得唔夠玩就乾脆成部機換過
從來都唔信攪線, 攪電呢D方法會對影音帶來咩改善
早幾日放假無聊無事做就出左去旺角兜個圈, 上到影音舖就跌錢喇
當時間舖好靜無咩人得我同另一個客係度,見果位師兄同個職員傾開電
言談中得知佢係玩開兩聲道而且似係初哥並開始微燒......想學入玩下電
但budget有限暫時買唔起名牌子,經個Sales佬推介最後就買左隻唔知咩牌子既電製面板走人
咁都好平常姐, 玩開電既來來去去都係果幾款熟口熟面架喇,大牌子既唔係SINE就Oyaide架啦
但呢D牌子又真係好貴, 出黎既聲效表現係咪天同地就要落左踏先知,對玩電入門既講真係搏一舖

同個 Sales八下頭先條友咩料啦, 咁就知有隻近月新返既電掣面板係英國牌子
聲稱100% 純銅片導電, 音色純淨, 岩晒相試下效果而又唔想一開始就花巨額金錢既友
而且仲有埋兩個 USB PORT 俾手機差電, 仲話唔知有咩SMART USB 技術
當手機食飽就會自動cut 電...... 到大晒, 梗係無理佢啦
如果買兩隻共4個蘇 (塑膠白色) 唔使$700, 但當中不鏽鋼金屬面版系例真係整得幾靚
尤其 "白金色" 果隻, 好有鐵甲奇俠Feel就係呢隻顏色令我心動, 小弟影音分家四個插位就岩岩好
就算聲音效果出黎無預期咁好, 都無晒錢, 咪電腦台近疏化一隻, 房一隻差手機電唔使轉插都好呀
當時心諗如講到唔超過 $1000 銀俾我出到門口既, 我咪買囉~ 當玩具又如何
哈! 果然成真即科水走人, 臨走前條友話黎緊金屬面版仲有拉絲鋼及多幾隻顏色返

返到入屋即熄電標總掣拿拿林搞, 拆開盒見到原來呢隻英國牌子都有D design
接線有啡色, 藍色, 黃綠色標示, 就算無電工牌都識裝, 唔使燒焊, 唔辣雞, 工具一支鏍絲批
如無色盲既話, 跟顏色線收緊鏍絲就搞掂喇, 安裝非常容易, 再拆開面蓋睇
走線佈局分配得好精細, 條銅片好硬淨, 唔似鐵鍍銅而內部兩條電線好粗, 個殼極之硬身
阻燃工夫做到足, 重料 ! 同樓下一般五金舖賣果D十幾廿蚊雜嘜或斯耐X差好遠......








電影編: (擴音機YAMAHA DSP-Z7+ Sunfire 7201 Power Amp) 7.1聲道 聽後感
廢話講完, 立即熄燈開機重睇一次 "怪獸與牠們的產地" 部機一開聲當堂 嘩! 左出黎
聲音出黎既效果比起我第一次睇時雖未致於完全兩套戲咁誇張,但係果種細緻程度係有個
幾明顯既分別, 因套戲已經係兩個星期前睇過,劇情已知所以更加將主意力集中係聽聲音方面
呢套戲較多英國演員參與演出及作者 "JK羅琳"本身都係英國人關係
開頭都用幾多弦樂做背景音, 聲音風格上都近似英國電影多D與 "妖夜尋狼" 果種打正旗號
美國荷利活式動作科幻片聲效係前者效為襟聽, 到中間講到個哥仔放隻好似龍捲風既怪獸出黎果段
聲音動態最為明顯, 好容易就聽得出隻怪獸係兩旁建築物撞撞去, 夾雜住中底頻音同時出都有一定條理
聽起上黎唔會好似第一次我睇時覺得有好似倒垃圾咁亂既感覺, 今次換左個牆插聽得出
果D發黎發去既磚頭碎石中高音頻段比之前確實係清楚左好多,細微弱音位出D, 成個感覺都立體  
(電影編 總結:)
換左呢個 "British General" 牆插係專登揀呢套重睇, 方便做過A,B比較
除返開以唔使$500有兩個13A純銅片蘇位牆掣, 有咁既做工, 用料及安全性而又有咁既聲音水準
係同一般無任何改動既牆身插蘇黎講性價比算好高, 睇戲呢度我收貨







音樂編: (器材: Cambridge Audio AZUR 650A+650C) 2聲道 聽後感
蔡琴試音
換左 "British General" 牆插後, 直到昨晚先有時間試兩聲道, 而小弟睇戲聽歌都習慣熄晒燈進行
而聽歌方面較為鐘情中慢版既歌曲尤其女聲, 早年係德發地庫入左呢隻 "蔡琴試音"
兩聲道比起睇戲多聲道就更蝦入玩, 更加充份試到隻牆掣係咪流料, 一開機我就點 "渡口"
開頭果幾下鼓聲, 支鼓棍打落鼓面果浸低頻好似比起以前停留得耐左咁, 個feel好deep且開揚
有種環繞聲既感覺添, 試過有幾下鼓聲我仲以為係咪對睇戲 Surround Speaker發出黎架 ?
無理由丫我影音分家架嘛, 不時另轉頭望一望對 Surround, 都幾得意既, 繼而到結他聲
比以前清晰好乾淨利落, 似係結他手當時係企係較前既位置, 結像力提升左好多呀
當蔡琴一開聲頭幾句就更為明顯, 蔡琴成個人就直頭企正 "中置位" 一樣
套兩聲道 HIFI就好似換高左一級 Model咁, 有咁既效果, 聽到有D谷眼淚非常之陶醉
一聽就連續幾隻碟, 唔覺唔覺都聽左4粒鐘, 真係估唔到唔使 $1000會有咁大改善, 底到爛 !
(音樂編 總結:)
今次一出旺角雖然悟打悟撞使左錢,但又因為咁改變左我既固有睇法,電係影音表現上確實存在影響
而如有師兄暫時唔夠 budget買貴牌子電裝置的話, 都不防考慮下以上呢隻電掣
起碼好過你屋介而家果隻不知明雜嘜好多






附件: 您需要登錄才可以下載或查看附件。沒有帳號?註冊

開箱
陳生好野

TOP

好用心的分享

TOP

電唔係音響上存在影響....
應該話玩音響一半係玩電

TOP

我都換咗個牆蘇,好快上換埋支電處。要聽Hi Re, DSD冇做好電處同訊源降噪的話,基本係效果減半。

TOP

回覆 5# sniperX

SniperX 師兄
真係估唔到淨係換過個電掣姐, 聲音都有提升, 呢隻 BG 電掣仲要唔係 for 專業影音用喎
我係呢度都 post 過出黎, 回響好大
https://www.post76.com/x2/forum. ... page%3D1&page=1  

附件: 您需要登錄才可以下載或查看附件。沒有帳號?註冊

TOP

提示: 作者被禁止或刪除 內容自動屏蔽

TOP

回覆  sniperX

SniperX 師兄
真係估唔到淨係換過個電掣姐, 聲音都有提升, 呢隻 BG 電掣仲要唔係 for 專業 ...
akira11092 發表於 2017-4-8 16:02
.

真超值!

TOP

回覆 7# 無奈

師兄
單一電掣都有, 昨日行過 (黃金地庫) 見有呢隻拉絲鋼

附件: 您需要登錄才可以下載或查看附件。沒有帳號?註冊

TOP

提示: 作者被禁止或刪除 內容自動屏蔽

TOP

相關文章