DIY秋冬小食--生薑秋梨蜜

本帖最後由 andy1234 於 2015-1-15 18:30 編輯

DIY秋冬小食--生薑秋梨蜜

入冬後天氣乾燥,如喉嚨成日有d唔舒服,可以整d嘢小食舒緩下,今次整生薑秋梨蜜,秋梨選用鴨梨,如用天津一帶鴨梨最正,秋梨有養陰清熱的功效,煮熟的梨有助於腎臟排泄尿酸和預防痛風,可以緩解秋燥,但有潰瘍和胃酸過多的人不宜吃多。



多數鴨梨旣咀比較特別,似唔似鴨咀?肥嘟嘟、隻隻都2佰幾克重。




薑末加入秋梨可以更好味,我口味為12個鴨梨用1份整好旣薑末,咁1份薑末約150克重,比例可隨口味變架,自由配搭啦!

介紹一下整旣過程,首先將鴨梨批皮去蕊,我取梨肉最幼嫩部份,可放棄比較粗粒旣梨肉,咁整出嚟先滑口。





好!正式開始,預備一個高身d樽,入d梨肉,用碌麵粉棍起勢舂,舂十令嘢就碎咗好多,留起d雪梨水,梨肉備用。




整得幾個鴨梨,開始用一個平底易潔鑊,用小火加熱,開始加入梨肉,隔一兩分鐘攪一攪,梨肉出水及有小小煙後全程轉最細火,目的是慢慢蒸發水份,唔系炒菜。



一路整呀整呀,大約煮左一個鐘,終於得番三個梨,感恩!



附件: 您需要登錄才可以下載或查看附件。沒有帳號?註冊

本帖最後由 andy1234 於 2015-1-16 22:31 編輯

亦開始整薑末,預備一個榨汁工具,我用宜家平嘢,將薑切小粒,跟手用榨汁工具出力壓;




用刀鋒將薑末批出嚟,你會得到幾幼細旣薑末,剩番d粗纖維唔要,可能要帶保護眼鏡,因為薑汁會四濺,如果你有磨薑工具或blender,可以省些功夫,記往,整好後將薑末同薑汁暫時分開兩碗,煮時先用薑末,薑汁可最後作調味用。





呢陣應該差唔多煮咗一個鐘,梨肉變得幼細咗,可以加入薑末,攪均佢,宜家應該攪得密d,唔好比佢痴底;





屋企咁啱有d川貝,可以磨粉加入,大約可加四小匙,唔好喧賓奪主;




呢個大約煮咗兩個鐘頭樣,你有d練丹旣感覺,梨肉變得仲幼細同杰d;



咁點先整好?大約煮到有鮮攪鯪魚肉8成杰到,你自然發覺攪得開始困難咗就差唔多。呢個時候你會講”生薑秋梨蜜”,咁用乜嘢蜜呢,呢味小食必須用正蜜糖,咁啱有樽鄉下攞番泥旣農家自採蜜,大約加入200-250ml左右,須然你都聽過李商隱旣”嫦娥應悔偷靈藥”,不過呢過時候都要試下d仙丹,可以加入薑汁調節辣度,第一口應該有梨酸中帶小甜,再一陣會發覺梨甜肉中有薑香氛味,吞落佢會感舒服,香氛味在口中仲停多十幾秒,咁再煮多5分鐘就大功告成。




待涼一陣用匙放入樽,16個梨可得出3小樽,都有總重900克左右,放雪柜可保存2-3星期,一樽比老媽,兩樽比外父母兩老,啱啱好,謝謝收看。

附件: 您需要登錄才可以下載或查看附件。沒有帳號?註冊

TOP

咁好心機啊........我最多飲菊花蜜

TOP

多謝分享

TOP

玻璃樽 <---- 麵粉棍起勢舂, 唔怕爆樽 ?

TOP

哇,都好大工程播!

TOP

回覆 5# peacehoperisc

玻璃樽好硬㗎, 仲有梨肉墊底.

TOP

好勁喎﹗很有心機呢﹗

TOP

Thx ching

TOP

有機會都要試一試整下 !

TOP