磁漆轉手掃漆分享

爬過好多文, 每編都係講少少, 所以同大家分享下
剛剛完成diy project, 油咗四度門, 真係少啲耐力都唔得, 第一次髹手掃漆同批灰
以下只是個人的經歷, 其他師兄請補充

一年前先髹過磁油, 但隻門廿幾年, 太多爛口同隙, 所以一心想整靚啲
先介紹一下材料
1. 底油
有好似好啲, 耐用啲
師傅話緊係要底油啦, 咁我就用咁啱有的黃丹
有間鋪介紹乜乜960侵蝕性底油, 話連士力都唔洗, 就咁油上去就得, 但$160一罐, 唔洗開希.  免咗好多功夫又穩定, 如果真係得我下次都會用

2. 灰
- 平價可以用牆灰, 自己開同現成有好多選擇, 但怕門的開合較容易裂
- 我選咗豬料灰, 幾個鐘後可以省, 夠硬, 都ok好省 (廿幾蚊1.5kg)
- 原子灰, 肯定好硬, 但應該幾難省同好貴.  有隻伊度巴水性原子灰, 卅幾蚊, 有同兄弟用過

3. 士力 (廿蚊一支)
士力係可以用係原木上先髹一層再省, 等到可以省走木刺再油力架
而髹手掃漆之前係用嚟防止手掃漆入面的天拿水那起啲磁油
最少髹兩層

4. 手掃漆
主要係兩個牌子, 長頸($7x) 駱駝(5x) 一升
個人覺得長頸稠啲但啞色啲, 同長頸有半升 ($4x)
兩個色版唔同, 都睇你選乜色

5. 天拿水
一般玻璃樽裝已經可以, 濕度80都冇起白, 高過80我就開冷氣抽濕, 但仍然開窗吹走啲天拿水味
淨油四隻門框都用咗四支, 比我再選就買一罐4升 ($6x), 質數好啲喎

6. 沙紙
反正都睇唔到沙紙痕, 最後用80度黑沙, 紙質夠硬, 省角位方便, 省豬料灰夠省.  試過用100度木沙就辛苦啲

施工
- 批灰
有人話新手用細灰匙, 3-4寸, 我就用批牆灰的大灰匙, 平面覺得好用啲
重點係有隙就要壓入去, 平面用陰力 (講咗等於冇講)
凹角位一定要用細灰匙, 同埋逐個面處理, 呢樣好緊要.  好似我隻門咁爛可以每次批一至兩個面, 乾咗省咗, 下次先批另一個面
省到手軟同飛到成屋都係下次就會批靚啲省少啲

- 士力
需然話士力係用嚟隔開天拿水, 但太希的油一樣會溶開, 結果又那起個底
士力滴落地幾小時都可以用天拿水抺走, 即係油手掃一樣有機會溶
試過幾日後用天拿水想抺走地下的士力, 但抺唔走, 已經好硬
所以有時間, 我估等兩日先油手掃可能好啲

一個非常嚴重的問題, 髹髹下手掃發現油色有深啡色, 結果倒咗再開油, 過一段時間又係咁
最後估計應該係士力溶咗, 真係煩到震, 可能手掃開得希都有關係

- 手掃漆
指示敎漆油同天拿水一比一
一比一好希, 但掃痕好淺, 靚啲
再開稠啲就掃痕多少少, 成品又會光啲, 冇咁啞

髹的時候一來一回已經將本來的油抺走, 結果就油同一個方向先可以上到油
過咗幾秒已經唔可以再番手, 唔係會將上一層的油拉起同起粒, 除非支筆上足油輕輕一髹先得

總結
手掃漆係爽啲同細緻啲, 最後的成品我都好滿意, 但呢個學習過程真的不易
用咗咁多天拿水, 又唔環保.  就算用咗3M炭口罩都頂唔順
聽講日本水性手掃漆唔錯, 買少咗天拿水同士力, 價格都差唔多 ($13X 一升) 有少少後悔冇用, 用過的師兄請分享下
仲有水性一般係即場調色, 有成千個色
水性慢乾少少, 我估髹下一層唔會將之嗰層溶番開





附件: 您需要登錄才可以下載或查看附件。沒有帳號?註冊

 
手掃漆係skill上難過磁漆好多,如果係磁漆都有好好成績,又吾係太有要求,'我會用磁漆,手掃漆既步驟同髹法與磁漆吾同,所以係技巧上要求好高,DIY可能要3,4次先掌握到.

TOP

多謝分享

TOP

又學到野,多謝晒!!

TOP

先多謝 ching 既分享

但好似有小小問題:

1. 照計天拿水係起唔到 d 磁漆喎, 兩只油係用唔同既溶劑, 磁漆係用節水, 手掃漆係用天拿水

2. 係唔係應該用起漆水起晒 d 舊漆先再油其他漆, 如果唔係 d 舊漆甩就會同 d 新漆一齊甩

3. 沙紙最好唔好用黑沙(有機會甩/剩低 d 黑色既微粒), 用 #150~#180 木工/紅沙就 ok 喇

4. 有時揀漆可以揀 d 啞光/半啞光 好過普通 d 令漆(反光), 太令感覺好老土, 當然呢個係個人喜好

我唔係師傅, 祗係識小小扮代表, 有錯勿插

TOP

多謝分享!
曾經用過相片中的"水磁漆",效果和施工容易度都比預期的好。
另外液態"士力"是用固態"士力片"+"士力水"...即五金鋪買到的工業用"藍火酒"溶解混合製成;所以乾了的"士力"是可以用"藍火酒"輕易對付。
附件: 您需要登錄才可以下載或查看附件。沒有帳號?註冊

TOP

外面D師傅反而唔會好似你咁仔細咁重料, 佢地一罐平底漿二張沙紙, 一卡磁漆, 一支松節水就油哂成間屋D門,門線同地腳線, 油油最緊要一定要等乾先好做第二層

TOP

longun:
1. 天拿水一定可以拿起磁漆.  你試下磁漆滴落地幾日後, 松節水已經洗唔到, 但天拿水可以
2. 起晒舊漆緊係好, 但當舊漆仍好實, 起嚟都係花工夫.  起漆水未用過, 但應該係好強力, 危險同易破壞其他裝修
3. 我買張黑沙冇甩沙, 就算係有都會抺一次先髹油.  100號都難省, 你用150省到天光


logoff:
一時驚醒, 等我試下用士力洗下個地睇甩唔甩到啲舊士力, 買藍火酒只用少少太浪費
師兄的水磁跟油磁髹落的感覺有冇明顯分別呢

lam兄:
我都知磁油易髹, 咁呢個post就可以delete, 因磁油新手都唔難
叫師傅用手掃佢都會收貴好多
平底漿補洞之類簡單修補可以, 隻門框咁爛, 要加石膏粉批, 未必有著數

TOP

多謝,讀完可以走少好多冤枉路

TOP

llcc兄: 呢個教學post咁詳細咁好,更係唔好delete, 其實我原意係話ching做得咁好咁有心機, 連出面d師傅都不如你咁細心, 有時d野有要求, 真係唯有自己親自出馬

TOP