是咁的，大家都知道香港呢小小嘅一點，喺全球嘅電腦市場根本就係「微不足道」，所以過往無論係有新 Intel、AMD CPU 發佈，要入到大貨賣街基本上係一件唔容易嘅事。以 AMD Ryzen 3000 系列桌面版 CPU 為例，喺去年 7 月發佈至今已過咗半年，不過好多型號嘅貨量其實一直都好唔穩定，至於 Intel CPU 就更加唔使講，14nm 產能不足問題出現之後缺貨問題久不久就出現，所以想買到新 CPU 基本上都係要連板一齊買先買到。不過，CPU 缺貨問題喺近期越嚟越嚴重，小編收到各方的消息都指不論係 Intel 抑或 AMD 的 CPU，好多型號都．無．貨!!

最新有業內人仕向 HKEPC 爆料，指目前全港嘅 Intel 及 AMD CPU 好多型號都「無貨」，HKEPC 亦有向代理商詢問關於 Intel 及 AMD CPU 缺貨嘅問題，他們亦毫不諱言確認的確有缺 U 問題存在，而且更表明近期都「未必返到貨」，預估最快要到復活節假後先有大貨到港。

咁即係代表，若果你近期想砌新平台都要諗清楚，因為你想要嘅 CPU 好多機會都未必有貨，加上近期爆發嘅武漢肺炎疫衝擊全球，就連專門生產 Apple iPhone 嘅富士康位於中國的工廠目前「幾乎是全面停工」，看來武漢肺炎蔓延唔止影響航空、旅遊、零售、貨運等行業，看來全球各行業亦將遭遇唔同程度嘅打擊。