Board logo

標題: 市場資訊 [打印本頁]

作者: thinkpanda    時間: 2009-3-27 22:23     標題: 市場資訊

我認為唔單止係Sales, 做programmer 都要知道市場資訊. 無帶新idea 入development team 既 programmer, 只可以做最低層既寫code 勞工.

http://manincentral.blogspot.com/2009/03/blog-post_27.html

[人在中環] 市場資訊
來自 Hong Kong Bloggers CK 著
面對我一班前線既同事,其中一樣我覺得最勞氣既野,係佢地對市場資訊既興趣,實在係嚴重偏低。

stephy 笑我對同事要求太高。咁如果你係一個做internal,又或者你係一個只係負責幫我執頭執尾既同事,你對市場上既資訊唔感興趣,我一d投訴都冇。但係如果你係一個面對客人既前線同事,而你又竟然對你自己身處既market所發生既事漠不關心,我就覺得問題大啦。

我既同事,對公司所賣既產品同服務,理論上係「背」得好熟既。問題係,你背得熟,sales sheet裡面既data你背到一字不漏,代唔代表你真係認識果件產品?我既答案係no囉。

市場上面唔係得你一間公司賣呢d product。同行家比,你所賣既產品,究竟有咩過人之處,有d乜野唔夠人地好?顧客點解要幫襯你而唔幫襯行家?呢d一連串既問題,都唔係背熟張sales sheet就等於真係知道。

每日有好多好多同市場有關既資訊,會從四方八面咁湧入黎。有d比較obvious既,公司做market intelligence既同事會定時幫你update。偏偏呢d report你眼尾都唔望下就當垃圾咁丟去reclcye bin就算數。好啦,公司俾你既market intelligence你懶睇,咁平時工餘既時間有冇留意下你身處既market所發生既事?打開份報紙每日都有d同我地果行有關既新聞報導,有冇去睇?okok,工餘既時間做d乜,作為老細唔管得你,呢個我明既。不過一個響商業社會上生存既人之所以會對資訊有追求,係因為佢需要呢d資訊去幫助自己思考。我明白當然唔係每一段資訊都好似報紙既c1頭條咁interesting,不過除非你完全唔需要對你既工作有任何既思考,否則呢d市場資訊,幾悶你都要收。

老土d講,進步係必須由思考帶動架囉。

入行做sales既時候,我當時既老細教左我一樣野:「你做得呢一行既sales,對你既客人黎講,你就要係呢一行既專家,要俾到夠pro同夠insight既意見人,你呢個sales先有價值。如果唔得既,客人駛乜幫襯你,駛乜俾佣你賺呀?」

雖然當日果個老細查實我都唔多鍾意,不過佢講既呢句說話,我覺得岩喎,亦記到今時今日。

sorry,我覺得淨係背熟果幾頁sales sheet就以為過到骨,其餘一切市場資訊都唔清唔楚闊佬懶理既sales,我真係覺得唔應該俾佣你賺。

祝大家有個愉快既週末。





歡迎光臨 電腦領域 HKEPC Hardware (https://www.hkepc.com/forum/) Powered by Discuz! 7.2