標題: [教學] 火牛新手談(知識就是力量！火牛入門篇) [打印本頁]

---

作者: helenchan    時間: 2010-3-2 16:12     標題: 火牛新手談(知識就是力量！火牛入門篇)

本帖最後由 helenchan 於 2010-3-6 10:36 編輯

2010/3/5 updated

前言
話說，我好耐以前，響寫完超頻篇之後，已經一直想寫呢篇野。無奈……超頻篇既置頂當時 N 多人唔睇，或者視若無睹，嚴重打擊出 post 熱情，加上自己對火牛認識亦少，越寫越唔識寫落去，遲遲冇出到。最近受某會員熱情鼓勵下，決定照佢所講，草稿都出住先……在此多謝果位會員既鼓勵。冇你既 pm ，我死人都嘔唔出呢堆野出黎……

特別強調，由於本人都係新手，而且係文科仔，對火牛與對電認識非常之淺。除左請各位新手們審慎觀看，不宜盡信外，亦請各位高手們不鄙賜教，插我兩刀以強化本 post，真正造福新手們，亦正市場之歪風，破除因無知而受誤導之各種迷信。


新手常犯錯誤與誤解
1. 火牛 W 數打個8折過佢就岩架喇！
有人以為基於 80+ 或者其他理由，隻牛寫 350W 實質輸出得 350x0.8=280W，於是想要 350W，就要買最少 350/0.8=437.5W，即係大概 450W 牛至掂，其實咁係錯既。電腦火牛輸出以 output 為准。撇除奸商虛標 W 數呢個因素，一隻 350W 牛實質可以保證 output 到足火 350W 既，因此正常情況下無需打折。

2. 你買咁大W牛，晒電喎！
一隻牛實際供電多少，係根據 hardware component 所需/所真正消耗電力而實時供電。換言之，假設你部腦依家只係食緊 200W 電，無論你隻牛係 300W/350W/450W，實質你仍然只係用緊 200W，而唔會因為你隻係 450W 牛，所以無時無刻都用 450W。

3. 80+ 乃靚牛信心保證
簡單黎講，80+ 只係測試一隻牛，響 AC→DC 下既效率，僅僅係測試呢樣野。至於隻牛耐唔耐用呀，穩唔穩定呀，完全唔響測試範圍。
公司請人，有個應徵者分 resume 成大堆課外活動獎狀，係咪代表佢一定勝任公司請既 post？課外活動，只反映個人積極外向，可能仲有領導才能或者良好溝通能力，但冇話過佢一定盡責、醒目、肯涯肯搏同埋識做個 post 既野。想買好牛，同想請好員工一樣，係要花時間慢慢揀既。越想即食往往越多手尾，最後得不償失。

(其餘遲D諗到再補充)


常識與常用術語篇

火牛有咩咁重要先？
火牛係負責電能轉換，將 AC→DC 去供電比所有部腦入面一切需要靠電發動既 components ，亦即係話，你成幾千蚊既野就靠一隻牛黎推動。如果隻牛供電時大時細，甚至超過負荷都冇安全裝置截電既話，咁你部腦入面果幾千蚊野一定受到影響，甚至比隻牛累到一鑊熟、X家X………
一隻牛牛同你果幾千銀野命運相連、唇齒相依。慳錢買雞牛就係將運氣套響幾千銀野之上，搏唔搏得過就睇你時運……

咩叫模組化(modular) 、ATX12V v2.x、continuous power？
模組化： 火牛既連接線有插頭供拆出，比你拔走多餘同用唔著既線材，同埋方便入箱執線之用。分部分模組化與全模組化，常見既部分模組化係 CPU 4pin/8pin 線同底板 20pin/24pin 線固定唔能夠拔，其餘線都可以拔走，而全模組化就係乜線你都可以拔走。
ATX12V v2.x： 火牛規格之一，由 intel 製訂。基本上佢並非火牛最重要既規格，是否跟呢個規格亦唔等同於質素優劣，基本上唔洗太介意呢個規格。詳細請參考下面既「資料補充篇」。
Continuous power： 一隻牛實質總輸出功率。牛有分所謂 max output 同 peak output，max output 就係佢實際負載既最高值，而 peak 就係響某一刻(可能短到只有 1/1000 秒) ，谷到行谷到盡既最高負載能力。由於 peak 只係極短時間內既負載力，唔可以做為合理參考，基本上 max output 至可以。你 full load 隻牛唔會預只係用唔夠1秒就降返落黎咁怪掛……而曾經有一段時間，賣牛奸商成日標自己個 peak output 出黎厄人(報大數話自己有 450W，實質佢得 max output 350W……)，於是其他做正當生意既火牛商，就特登做個 continuous power term 出黎，強調自己既牛係以 max output 計算，而非以 peak output 計算。

咩係主動式 PFC(Active PFC) 同 被動式 PFC(Passive PFC) ？
呢個涉及火牛電路設計，比較複雜。最~~簡單黎講，兩者分別如下：
Active PFC
結構較複雜
較輕
發熱較低
冇低頻震動聲
typical power efficiency 較低(同 80+ 講緊既果隻轉換率唔同，係2樣野黎，另，較低只係一般而言，當然有例外)
廣範圍自動式電壓輸入(一般由 90V~264V，即係唔理你去日本、歐洲、美國定中國，照插照用)
成本較高

Passive PFC
結構較簡單
較重
發熱較高
有低頻震動聲
typical power efficency 較高
電壓輸入範圍窄(一般由 180V~264V)
成本較低

基本上可以話，active PFC 高檔D，不過唔一定慳電D，越大W數 active PFC 慳電優勢越大，相反越少，甚至唔夠 passive PFC 慳電。如果你買大W貴牛既話，梗係死人都要佢係 active PFC 啦！不過你今日幾乎搵唔到 passive PFC 大W牛……至於 350W 或以下，唔一定要 active PFC，睇輸出能力仲實際。

---

作者: helenchan    時間: 2010-3-2 16:14

本帖最後由 helenchan 於 2010-3-13 12:18 編輯

入門，從學睇標籤開始

以我手上有既3隻火牛做個例子，說明標籤上面既意思。第1隻係好舊型號，4、5年前買落既牛魔王 PM350B：


首先，大家睇到一長串 +5V、+3.3V………Load reg.% 、Cross reg.% ………等資料，究竟係咩黎？先講講 +xV。圖中有 +5V、+3.3V、+12V、-5V、-12V、5VSB，分別對應唔同 hardware components 供電。基本上今日常用到既係 +5V、+3.3V、+12V，分別對應：

+5V： HDD、DVD rom drive、floppy drive、PCI device、USB/firewire/KB/mouse、mainboard、ram、agp display
+3.3V： PCI device、mainboard、agp display
+12V： HDD、DVD rom drive、CPU、mainboard、PCI-E display、case fan

可以見到，其中 +12V 包含好重要既3部分——CPU、底板、VGA。所以，今日睇牛，經常都睇 +12V 既輸出能力表現，而且牛既設計亦越黎越偏重提升 +12V 輸出能力。

至於 Load reg.% 等係比較詳細既項目，一黎新手未必需要睇、二黎今日大部分牛都唔再提供呢類資料、三黎我自己都唔多識，冇謂腦點，所以唔講。有興趣既可以 google 參考，不過要預左好有心機睇，同埋對電有一定認識至睇得明………

右邊標示各路輸出總和。其中，total output，即係 max output 350W，而 max power，即係 peak output 420W。牛魔王響型號果度都講左隻牛係 350W(PM350B) ，但係當年買果陣，個 sales 同我講呢隻係 420W 牛(張單都係打 420W)………所以，以後大家就知道，千祈唔好理 sales，自己睇隻牛既 spec 好過。

下方有幾項值得留意既，其中 efficiency 依家最多人睇……full load 時都有 70% ，其實表現已經唔錯，不過肯定依家比人睇低幾線。

另外，有 over current/over voltage protection，又具備多個 safety standards，其中有D係歐洲標準。可見呢隻野響安全上做足工夫，至少唔會咁易放煙花……

運作環境(operating temperature)可以去到 50℃，依家黎講呢個級別屬於工業級，咁樣就算機箱積熱都唔怕會導致運作不良啦！留意，50℃係指佢運作緊既空間內溫度(一般係機箱內溫度)，而唔係指隻牛自己運作時溫度。


第2隻出場既係2年幾前買落，現役2號機 silverstone ST50EF：


呢個 spec 係今日火牛常見既 spec 規格，基本上同牛魔王果張分別唔係好大，係有幾樣新野，又冇左幾樣其他野。先睇供電表格，+12V 分開 +12V1 同 +12V2，呢種叫做雙組 12V 供電。由於現今 hardware component 對 12V 供電要求越黎越依賴，而且越黎越食電，所以大W數火牛普遍用雙組，甚至多組(有D會去到6~8組，即 +12V1、+12V2…+12V6)黎增強 +12V 供電能力。響 intel 製訂既 ATX12V 規格下，其中一組基本上設計為專門比 CPU 獨立使用。以呢隻牛為例子，其中一路擁有 18A 既+12V(+12V2)全數比晒 CPU 獨佔，其餘野就要響另一組 18A 既+12V share(+12V1)。咁做既好處係確保 CPU 供電充足，但係唔好處呢？
唔好處係，響呢個設計下，如果 +12V1其他野合共最終要 20A，而 +12V2 只用左 10A，由於2組供電係獨立既，就算 +12V2 有多，都唔可以將餘額轉過去比 +12V1 用，最終就係唔理你隻牛有幾多 W 都好，都係供唔夠電，唔夠力推。
為左彌補呢個問題，各火牛廠都自己諗計解決。其中有D做多組以分灘負擔，亦有下隻牛既解決方案，呢個一陣至講。

另外，多左 80+、RoHS 標籤。響度再稍為講下 80+ 係咩。
火牛響由 AC→DC 既轉換過程中，會令到部分電能流失，即係晒左電。如果響轉換過程中，流失率響 20%、50%、100% 轉換時，少於 20%，就符合 80+ 規格。以呢隻 500W 牛為例，響 100W、250W、500W 運作下，電能流失少於 20%，再去 80plus.org 比低錢做測試之後，就可以獲得 80+ 認證。留意，呢個認證僅僅係做上述測試，至於隻牛 W 數有冇虛標？隻牛有冇安全標準？呢D野佢一概唔理，因為根本就唔係呢個 test 既目標範圍。正如考試都分好多科，中、英、數都各自 test 你其中部分能力，中英數合格係咪代表達標可以升學？冇人話中英數合格唔緊要，不過中英數合格唔代表一切，仲要睇埋其他科成績。
RoHS 標籤就係歐盟環保物料標籤。電腦野響生產過程中，會應用到大量高度污染既物料，而 RoHS 就係檢視該產品所含污染物料量既多寡，達標再送去檢測就獲得。有佢，就係件野一生出黎就環保D。

仲有多左噪音標示。家下興靜音，呢隻牛標 acoustic noise 細過 20dBA。留意依家對火牛噪音標示並冇任何標準，有唔少古惑廠商個 noise level 標到超低，不過原來佢講緊 min，max 係幾多就唔話過你聽。重視噪音值既買家應該小心留意字眼。


最後出場既係2年前買落，現役1號機既 silverstone DA850：


標籤非常簡單，同頭先果張大同小異，最大唔同既就係 +12V，佢只有1個。前面講到多組 +12V 既供電問題，呢隻牛既方案就係，直接統一同增大 +12V 輸出。由於所有野全部都由單一組 +12V 供電，冇左因獨立多組互相不能協助既問題。以 70A 強大能力供電，確保所有 hardware component 都獲得充足電力。
可惜呢個設計暫時只有極少幾個牌子既幾個型號做到，市面上絕大部分既大W牛仍然用多組形式供電。有某牌子既 1200W 牛，聽起黎好誇，1200W！但係當你睇到佢成6組 +12V 17A，再諗諗張 4870 17A 都唔多夠，起碼 18A 先安全既話，你就唔知佢點玩孖卡。

---

作者: helenchan    時間: 2010-3-2 16:15

本帖最後由 helenchan 於 2010-8-7 21:15 編輯

揀牛參考指南

3大總綱
1.        平野無好，好野無平。呢個世界上係冇平靚正既蛤蟆。商人有本事做靚野，會唔賣貴D，反而走去益街坊做福人群，寧願自己賺少D咁偉大？相信平靚正，等同相信商人有良心一樣咁 naïve ……
2.        自己睇 spec，好過你聽 sales 講，亦分分鐘好過聽朋友講，尤其係鍾意吹自己識電腦既「朋友」
3.        多上網 search review 同睇 forum 口碑。佢地唔一定準，但係有一定參考價值。最少唔去買人地話有問題既牌子，對新手黎講，寧可漏寶好過中招……

我應該買幾大W牛至岩？
上 google search 「psu calculator」 有一大堆計算器幫到你，不過通常呢D計算器你要預期佢會報大數少少，就算唔係基於商業原因，報大數你用左冇事，報細數搞到你行唔到會好大件事，咁梗係報大少少唔洗出事既好………
基本上，如果你冇需要另外插電既 display card，亦唔係用 i7 咁堅既 CPU ，300~350W 真係乜都夠做。如果你要額外插電既 6pin+6pin display，玩埋 i7，建議 400~450W 夠玩。如果你又要超 i7，又要 6pin+8pin display，建議上 550W ，有突買個安心，超唔起都冇得賴~~XD

如果你係玩更高階既牛，例如玩孖卡甚至 3/4 卡既話，就要留意 +12V 既 A 供應係咪夠力。點知隻牛 A 夠唔夠力？你上網 search 下各大牌子火牛既 spec，睇下相近 W 數牛既 A ，再睇睇自己眼前隻做個對比就知道。

揀既時候有咩要注意？
首先要按自己能力，揀自己認為唔錯既牌子。你識得多D，自然多D牌子選擇。其次，睇荷包負擔能力同使用需要。我唔贊成響火牛度慳錢。冇錯火牛買到靚一靚部機都唔會快左，之但係你越係冇錢，通常就越係想D硬件長命用耐D，而火牛最容易令到你夢想幻滅。雞牛慳舊零水，隨時要你幾千蚊野陪葬，咁就因小失大。

如果負擔能力較低既話，我建議用「中庸之道」，低W數既唔同牌子之間唔買最貴，又唔買最平，買中間價既貨。唔好貪佢平平地又有呢樣果樣功能就走去買佢……

如果負擔能力較好，不過冇乜特別要求既話，建議都係買隻 450~500W 牛，方便日後升級，等第時D過氣貴 display 落價過陣都可以有平野執。亦可以選用有 80+ ，有 RoHS 同多 safety protection 既靚牛，用落安心又開心，又為環保出一分力。
另一方面，可以留意火牛既 operating temperature。香港始終係亞熱帶區，夏天隨時上 32~35℃ 完全唔出奇。就算你開冷氣到 23℃，機箱積熱到箱內溫度達 35℃ 係可能既，尤其是非下置式火牛設計。響負擔能力較好既情況下，揀隻 operating temperature 40℃，甚至 50℃高規格既牛，用得安心又耐用。
同時可以留意火牛既接口。比如話，CPU connector係 4pin定 8pin？有幾多條 PCI-E 6pin/8pin？有幾多 SATA connector？等等。

如果有高要求既話………我想分享一下自己揀牛既經驗。我響揀大W牛時，考慮左幾個因素：
1.        我會經常換 parts ，又會成日清潔機箱內籠。如果隻牛唔係全模組化既話，始終都會比果幾條勁粗既 CPU 8pin 同 MB 24pin 阻住晒，拔佢出黎整完再跟返之前個走線位，整一整又晒幾個字時間。我依家隻全模組化，D線可以全部留返原位唔拔走，齋羅隻牛出黎，整完放返隻牛入去再插返火牛果邊既線，唔洗幾分鐘搞掂。

2.        隻牛要預左玩孖卡，所以一定要夠力。隻野用單組 70A 輸出，真係非常之夠猛！亦唔需要好似部分多組輸出牛咁，要自己計算邊條 12V 應該插邊度，手動分灘平衡用量咁麻煩。

3.        上網睇過 review，供電紋波穩定，岩晒鍾意超頻既我~~~入面成堆日系電容，真係夠豪華。比得呢個錢，你唔比貴料我條氣點順呀！

4.        真正台灣 100% 全機械化廠房製造。由 silverstone 投資既台灣全機械化廠房生產，做工好、內籠布局井然，非一般勞力密集工廠生產出黎既可以相比。尤其是果D「平靚正」牛，我真係好憎，因為果D係透過響第3世界國家，勁虐待當地工人做出黎既。如果你見過一大間工廠，冇牌子名、關窗、鎖門，日夜做到X街原來連佢做出黎果隻野都冇可能買得起，真係會覺得果件貨……非常可恥……唔講喇，再講我會爆氣

5.        最最最常見既原因： 以前用過，幾年落黎，so far so good………

到最後，即使佢冇高尚非凡既 80+，亦冇一大堆專利 function，仍然揀左佢。又黎一次，幾年落黎，so far so good………

其實火牛內容博大精深，要研究仲有大把野未講，比如話影響靜音表現既 8cm fan vs 12cm fan 設計，影響散熱既導熱/散熱片設計等等。但係作為新手入門文黎講，一黎講左都未必有人睇………二黎我都唔識講，我好垃圾架咋！所以本文就此收筆。如果日後有新野需要補充……遲D至算

---

作者: helenchan    時間: 2010-3-2 16:15

本帖最後由 helenchan 於 2010-3-6 10:43 編輯

補充資料

ATX12V規格
依家市面上已經好少見到舊過 ATX12V v2.0既產品。基本上，由 v2.0至 v2.3既重要分別如下：
V2.0
底板 connector由 20pin改為 24pin
規定火牛必須有 SATA power cable
弱化 3.3V同 5V輸出，改為強化 12V輸出。其中，+12V劃分為最少2組，+12V2專門獨立供電比 CPU，其餘所有野共享 +12V1

V2.01
取消 -5V供電

V2.1
再次調整各路供電，並加入 PCI-E外接 6pin供電(75W)

V2.2
再加入 PCI-E外接 8pin供電(150W)

V2.3
暫時最新版。強化轉換率要求，稍為降低對 12V輸出要求，同時取消原本 240VA限制，+12V每路輸出可以多過 20A。

雖然基本上火牛廠商都會用呢個規格做為指引去設計佢地既火牛，但係由於呢個規格並非必須遵守，而且規格設計安排並非完美，所以有好多牌子同靚牛只係部分遵守，而非完整既 ATX12V v2.x成套規格。
比如好似上面所講，多組輸出容易做成部分浪費、部分唔夠問題，所以有某D火牛會設計成 +12V2並非由 CPU獨享，而係部分負責左其他指定既供電部分。又，所有單組輸出牛直情完全違反 ATX12V必須分組輸出既要求，但係佢地既設計，係為左彌補修正 +12V輸出不平衡既問題。
另外，ATX12V本身亦唔完全充分反映今日既 hardware 供電需要。比如話 ATX12V只要求 CPU connector為 4pin，但係依家中階至高階板好多都需要 8pin，而 8pin係響另一個叫「EPS12V」既 server牛規格入面。如果只係跟足 ATX12V，咁 CPU connector就得返 4pin比你………

可以咁講，ATX12V係 Intel針對 hardware供電需求而定出既技術性規格，主要係比火牛廠商睇，而唔係比普通消費者睇既。規格內裡涉及既內容又多又技術含量高，一般人睇唔明好正常，而且亦冇特別需要根據個規格，睇完晒之後至出去揀牛。新手從標籤睇返各項資料，睇 12V各組輸出既實際 A數已經相當足夠，唔需要特別介意隻牛係 ATX12V version係幾多。


High-end 卡要幾多 W 至足夠？
首先，我地要知道 PCI-E 各路既供電規格：
PCI-E x16——75W per slot
PCI-E 火牛 6pin——75W per cable
PCI-E 火牛 8pin——150W per cable

依此計算，1張要插 2x6pin 既卡，最盡用到 75(原 slot)+75x2(2條 6pin)=225W，而1張要插 6pin+8pin 既卡，最盡用到 75(原 slot)+75(6pin)+150(8pin)=300W。
即係話，如果你想保險，可以用以上最大數黎估張卡既W數，再加埋其他 components ，就大概可以計到你需要幾大W牛。

如果想計A既話，根據 VxA=W，1張2x6pin 卡，最盡需要 225W/12V=18.75A，而1張 6pin+8pin 卡，最盡需要 300W/12V=25A。
A數黎講，如果你係多組 +12V 輸出既話，需要留意你張卡用到邊一組 +12V ，要同邊D野 share ，再計算出總A需求至知道。不過當然，上面所講全部都係以最大值黎講，實質上張卡未必耗電量會去到最盡。1張 GTX260 6pinx2，2條 6pin 合共 18A 係絕對夠做有突既(單獨計張卡既話)。

---

作者: helenchan    時間: 2010-3-2 16:16

本帖最後由 helenchan 於 2010-8-23 22:47 編輯

特別鳴謝
錯誤糾正與內容補充會員名單
Blackbird   #8
Thunderball   #14
人中之龍   #37
日本啟人   #425

強文推介
火牛「百科全書」
http://www.itocp.com/html/psu/psutopic.html

80plus 係乜東東
http://www.hardwaresecrets.com/article/742
http://www.hardwaresecrets.com/article/856

由「日本啟人」所寫，各牌子火牛各組輸出既整理資料
https://spreadsheets.google.com/ ... hkey=COSWrNIJ#gid=0


我個新手超頻 post………
http://www.hkepc.com/forum/viewt ... ;extra=#pid21116836

---

作者: DoraemonKing    時間: 2010-3-2 16:45

亦唔需要好似部分多組輸出牛咁，要自己計算邊條 12V 應該插邊度

我隻牛都係分兩組12v
1.係咪所有多組輸出 都唔識將餘額轉去另一組?
2.如是...既然多組輸出 唔識自己取長補短
可唔可以教下 點分呢兩組12v 手動平衡番個負載???????

---

作者: jackwong717    時間: 2010-3-2 16:48

GOOd
新手入門夠用啦

---

作者: BlackBird    時間: 2010-3-2 16:53

1. Peak好多時候唔會有10秒
0.1-1秒多

2. 放煙花同有幾多Cert並無直接關係
多塵通路一樣可以令一隻好牛放煙花

---

作者: ss08116g    時間: 2010-3-2 17:17

好嘢~支持

---

作者: 小小小俗辣    時間: 2010-3-2 18:08

推介最近有質素的牛牛?

---

作者: Faye    時間: 2010-3-2 18:21

支持下先
你篇超頻我有睇架

---

作者: helenchan    時間: 2010-3-2 18:38


1. 係。但係有部分牛會特登設計成其中一組 +12V 唔由 CPU 獨佔，而同時由 CPU 同部分 device 共用。呢個要睇個別牛既設計同報告至知。
2. 唔係所有牛都有得手動分開。又，2組係冇得分既。

其實你未必需要擔心呢樣野。要睇你用既 config、用緊邊隻牛至知道具體情況，不過一般黎講，只要你唔係極端 config，都唔需要擔心。


希望夠用啦……唔夠唔好砌我


真正高手出現~~~不過有D唔係好明，想請教：
1. Peak 我以前睇過，見有人講個別牛既 peak 最多可以去到10零秒，唔知係咪？
2. 呢個的確係，積塵勁既話真係乜都死………但係想問，如果撇除積塵因素，係咪安全規格仍然同是否放煙花無關？

---

作者: mk21    時間: 2010-3-2 18:46

睇完真係學到野

---

作者: Thunderball    時間: 2010-3-2 18:57

Peak Power -- You should be aware of how the manufacturer
  claimed. They usually claimed a figure (say 400W) but without
  giving you for how long, usually in milliseconds (1/1000 second).

For a new hand, not conversed in electrical, this is a good reading
for others who wants to learn more.

---

作者: kellychen    時間: 2010-3-2 19:28

very good post..........

---

作者: albert_ma    時間: 2010-3-2 19:30

呢篇野既作者需要睇呢篇教學

If you take a look at the picture above, you’ll notice the following text “with a minimum 12V current rating of 42A”. This means that those that have a PSU with split 12V rails won’t be able to run a Fermi card, no matter if it’s a 600W or a 1.21GW (ok, there are no such power supplies, but hey). There’s of course a solution to the problem, buy a new PSU with a single rail and there are several PSUs on the market that has a single 12V rail that will deliver 42A or more.

http://www.semiaccurate.com/2010 ... -requirements-leak/

---

作者: uwantwant    時間: 2010-3-2 19:37

好多人都唔知display card 功耗, 亂咁叫人買大火牛先可恥. 5850 total sys consume 都係都係300w 左右, 有d人叫人用600w 比人踢爆左仲死撐話for 第時upgrade. 另外 5830 功耗比5850 仲高, 要贂清楚先好. 不過都係300w左右有找.

---

作者: Felix00    時間: 2010-3-2 20:13

本帖最後由 Felix00 於 2010-3-2 20:23 編輯

回復 1# helenchan
"ATX12V v2.x： 火牛規格之一，由 intel 製訂。基本上佢並非火牛最重要既規格，是否跟呢個規格亦唔等同於質素優劣，基本上唔洗太介意呢個規格。如果想知詳盡可以 google search，事關個規格好多項目，非3言2語講到係咩黎。"  <---- 呢個唔好話唔重要既規格或唔洗太介意呢個規格。
Intel 出得呢個規格就係要佩合底板供電大小的要求。
同一火數既牛，唔同 version 3.3V/5V/12V 輸出是不同的。
現時底板供電著重於 12V，所以隻牛要用新的 ATX12V version 2.3 規格，如果你用 version 2.0 規格的牛，12V 就可能不夠用。反之 version 2.0 是著重於 3.3V 及 5V，所以 3.3V 及 5V 的輸出會較 version 2.3 的大，但不適合現時的底板。

另外無論隻牛有幾多組 12V 輸出，牛入面都係得一組 12V 供電，唔會係每組獨立，只不過係每組有過荷保護。

---

作者: helenchan    時間: 2010-3-2 20:16


最緊要有你地既支持就真。有人睇左再 re ，感覺真係好唔同~~~


太多喇，而且唔同W數都有，所以好難講………


我都記得
不過依家超頻 post lock 左，冇得回，我都淨係可以耐唔耐改下野咁……

---

作者: helenchan    時間: 2010-3-2 20:22


希望多D人可以交流下，咁個市場就唔會再盲目變左做 80+ 天下，同埋 sales 誤人喇~~~


原來係咁……1 millisecond，連1秒都冇，即係個 peak 根本玩野………


我真係睇唔出有咩問題…………

---

作者: tom-ex    時間: 2010-3-2 20:22

好post 支持

---

作者: mlc130104    時間: 2010-3-2 20:34

提示: 作者被禁止或刪除 內容自動屏蔽

---

作者: alt51    時間: 2010-3-2 20:37

本帖最後由 alt51 於 2010-3-2 20:41 編輯

補充一下
多路PSU 多數也不標電綫是那一路的,所以接大用電設備只有靠估......

以下是少數有標的
http://forum.coolaler.com/showthread.php?t=230603

假設GTX480要42A電,那麼電源就一定要分三路入才行,但市面有多少PSU有講明呢?

接錯的話無論有多少W也不會穩定的

20A limit 的由來
http://diybbs.zol.com.cn/frmView ... a=&aq=f&oq=
电源的240VA规发FAQ——大功率电源可以随便买吗？

---

作者: HKDMC    時間: 2010-3-2 20:39

如果3.3V得番2.8V,但唔關火牛事,咁姐係咩事~~~~

---

作者: mlc130104    時間: 2010-3-2 20:41

提示: 作者被禁止或刪除 內容自動屏蔽

---

作者: pc2366    時間: 2010-3-2 20:42




    吾關火牛事,------>吾係呀麻

---

作者: HKDMC    時間: 2010-3-2 20:44




    會無la la自己restart

---

作者: diamond    時間: 2010-3-2 20:45



3.3V  +/- 5% , 正常值應該係 3.456V 至 3.135V
2.8V 係太低

你用乜牛 ?

---

作者: HKDMC    時間: 2010-3-2 20:48




    我用隻舊牛去第2部機試    跑OCCT over 2 hours完全無問題

而家用新牛都係咁     部機會自己restart

---

作者: albert_ma    時間: 2010-3-2 20:50




42A唔係指成個system咩?

---

作者: jason2221995    時間: 2010-3-2 20:51

好帖留名
岩晒我呢d新手

---

作者: HKDMC    時間: 2010-3-2 20:53




舊牛係TT toughpower 650w

新牛係Emermax Rev 1050w

---

作者: alt51    時間: 2010-3-2 21:00

本帖最後由 alt51 於 2010-3-2 21:06 編輯


一樣道理,假設 CPU 12V+1
    display 接 12V +2,+3

假設 CPU10A
display 32A接綫就要由最少兩路來,有些PSU 12V amp偏低只有16,17A,接GTX480有點勉強

例如EnerXXX一路有25A,問題不大

例如實測系統只用40A電,但為什麼用多路牛不穩定,有可能是電流分佈不平均所此

---

作者: pc2366    時間: 2010-3-2 21:15




    其它硬件有無拆出試下?

---

作者: 1994325    時間: 2010-3-2 21:39

新手睇哂LU XD

---

作者: cecil_vong    時間: 2010-3-2 21:46

helenchan師兄謝謝你的好文,啱晒我呢d新手..............

呢篇文章同frankchan師兄果篇"機箱風扇散熱文"一樣已經俾我bookmark左!

題外話:你地係咪兩兄弟啊? 兩個都好好人, 不過在下唔玩超頻, 所以無睇師兄之前傑作...........

---

作者: 人中之龍    時間: 2010-3-2 22:45

本帖最後由 人中之龍 於 2010-3-2 22:55 編輯

樓主真係好心機

有小小補充:
一般低中階火牛，大都用室溫25C運作環境下，作出測試而定出其規格，但大家實際使用時，無可能在室溫25C運作環境下使用的，所以其規格使用上會有誤差出現
部份中階及高階火牛，標榜用40C，甚至50C運作環境下定出規格，貼近實際使用情況，亦因為規格更高，其用料/耐用度/表現更好，選擇火牛時可以留意一下

---

作者: helenchan    時間: 2010-3-2 23:34


其實以 display card 黎講，依家最大問題唔響 W 數，而響 A 度………買左大W牛頂多都係貴左，但係……A 一黎較少新手識，二黎買錯左一樣唔夠用，最慘係唔夠用果時都唔知點解，以為仲未夠大W，真係…………
不過又真係好多人一味盲目叫人買大W牛，又一歪風…


其實響寫呢 part 既時候，我都諗左好耐。而我所考慮既有以下三個原因：

首先，intel 至今仍未統一到火牛標準，有好多有質量既火牛實際上並冇完全遵守 ATX12V 。比如所有既單組輸出牛都冇遵守到。響呢個情況下，新手難以按呢個單一標準作選擇。

其次，我地應該重視實際輸出甚於規格本身。響睇 spec 時，基本上都有豐富既資料，對 12V 輸出進行選擇。

再者，新手響初入門時，要掌握既野相當多。如果再加一個「標準」入去，更加容易引起混亂，變得好難選擇。更有甚者，如果新手誤以為呢個係靚牛標準，又繼 80+ 之後，再一次變做盲目追求最新 ATX12V 規格既話，咁就大件事……

基於以上考慮，即使 ATX12V 有佢既地位同重要性，但係技術性高，而且即使唔睇佢，靠睇 spec 仍然能夠揀到夠力既牛，因此我覺得作為新手，可以唔太介意追求買牛時要有 ATX12V 規格。當然，同樣知識就是力量，新手充實自己，去學多D進階野係好既，但係我覺得都要一步一步黎，先經歷左初階學習先比較好。

---

作者: helenchan    時間: 2010-3-2 23:41


多謝兩位既支持！等我遲D試下擴容呢個先


誠如 alt51 所講，大部分火牛都唔會標明各組既供電，所以好難確切知隻牛邊 part 供邊幾部分既電。響呢方面，的確 enermax 做得比較好，詳細寫明邊組供電比咩。一般火牛就真係無辦法知………


呢個我真係唔識………不過既然唔關火牛事，咁至少排除左其中一個可能性。唔知會唔會底板接頭接觸不良？

---

作者: 悶一3一    時間: 2010-3-2 23:43

本帖最後由 悶一3一 於 2010-3-2 23:45 編輯

不過買牛個W數太盡都唔太好
基本上全部一到高負載果時候都係會掉壓
而一d cheap牛唔單係唔足火
掉壓問題都好壓重
加上隻牛愈老問題愈嚴重
e點都要留意下

---

作者: diamond    時間: 2010-3-2 23:43




舊牛用耐左老化, 輸出下降都係正常
如果減少d硬件 , 舊牛又冇番事, 可以行番
咁就好明顯係隻牛老化

---

作者: yayhaha99    時間: 2010-3-2 23:50

請教一下, 拜讀了240VA 那篇文章, 其中提到 240VA 即 12V x 20A 技術上和成本上根本很輕鬆平常, 但由於已經超出大部分歐美國家的安全標準所以才甚少出現, 那麼市面單軌達20A或以上的算是危險品了?

---

作者: 0-0-0-0    時間: 2010-3-2 23:58

very good ar !! support!
thanks!

---

作者: 032r    時間: 2010-3-3 00:07

新手一問:換左新MB要用EPS/ATX12V 8 pin ,但舊牛淨係得4 pin,係咪一定要換新牛?....thanks

---

作者: jasonlkk    時間: 2010-3-3 00:16

正野！支持你

---

作者: cheungmanhoi    時間: 2010-3-3 00:21

本帖最後由 cheungmanhoi 於 2010-3-3 00:24 編輯

記憶中 有D火牛 會在12v高負荷時合併為一組12v 通常都會低於2組之和
個人會留認合併後的數據
因為燒機打機 果陣好扯12v 所以直接看合併果隻會更易分邊隻牛Arm你多D
另外Full load12v降壓都好值得留意隻牛的質素
Eg corsair cx400 12v 100% loading下由12.3>11.7但用3.3v去Full load佢就降小D
btw 你超頻果個Post我都有看 只不過係默默支持之Ma
Up by5800xm打得5好請見笑

---

作者: 淆底    時間: 2010-3-3 00:44

感謝H君咁好心機,又夠熱情去寫哩篇文

我想問下 3路12V輸出,同1路12V輸出有乜分別?同埋優點係乜野?
(懶爬文... ,)

thank you

---

作者: helenchan    時間: 2010-3-3 11:29


能夠幫到大家就最好啦~~~其實我都好衰架，斷人財路，sales 難左昆人


我咁既級數，點同 frankchan 比………佢寫既風扇教學詳細詳盡好多，唔止新手有野學，連半桶水既一樣獲益良多。我呢個呢就……僅僅新手有用……


係喎！多謝提點~~~ 不過依家可能多左唔係用 25℃，而係要賤D，23℃

---

作者: helenchan    時間: 2010-3-3 11:44


呢個的確係，預得太敏水都有潛在問題。中至高W牛個情況比較好少少，不過低W牛………所以我都係建議唔好買得太 cheap，唔係就………


………我已經用緊隻嚴重超標幾倍既危險品
呢個我真係唔識，我自己冇點留意呢方面。不過，如果係咁既話，我唔明點解 corsair hx750/850、TX650/750/850 可以響歐美銷售…………


有部分板仍然支援 4pin 同 8pin 供電，響板度用較低耗電既 CPU 時，4pin 仍然夠做。要睇你塊板既規格同埋用咩 U 至知係咪需要換新牛。

---

作者: helenchan    時間: 2010-3-3 12:06


我忽然間諗起明星仔D名句
好謝好謝。呀，首先我要多謝大會比我個機會，然後再多謝公司比我既支持，同埋多謝…………
不過真係多得大家支持


「合拼」係特殊設計。以 corsair HX520/HX620 為例，其實內裡已經包含左，同時具有單組與3組輸出設計。嚴格黎講，響高負載下，佢會自動切換去單組輸出，低負載時又自動切換返去3組輸出。類似既設計響 silverstone ZM1200M 亦有，不過要手動切換。
其實講起超頻 post 果度，我意思主要係，個 post 出左冇耐，寫左好多基本野，但係下面仲不斷不斷有人問返呢D基本野，真係激到噴血………變左個透明人，寫乜都冇人理。最緊要係呢樣！唔睇置頂仲要係咁問………


…………
簡單黎講，兩者都係為加大 +12V 供電而設計，而佢地既分別基本上係：
多組輸出——
優點： 每組獨立供電，確保每組固定既對象(比如 CPU)獲得充分、穩定既供電
缺點： 由於獨立，隔離組超過負荷，就算呢邊有突，都冇得將餘額轉去比佢，結果係夠W，但仍然唔夠電

單組輸出——
優點： 解決上述問題，大家 share 同一組，唔會出現某組浪費，某組唔夠既問題
缺點： 只要夠A，基本上冇………硬要講既話，可以話響極低負載下，多組輸出比單組輸出 min output 更細，響極低負載下多組比佢「慳電」D………

---

作者: K_C_    時間: 2010-3-3 12:32

閱~~~~ 新手報到,多謝ching好文~~~

---

作者: happy_gemini    時間: 2010-3-3 14:16

很實用... 樓主有心!

---

作者: 實頭    時間: 2010-3-3 14:36

如果可以教埋o係bios/windows入邊睇隻牛夠唔夠力更好

---

作者: helenchan    時間: 2010-3-3 15:04


你唔係新手，你係刁民！刁‧民


多謝~~~ 希望真係可以幫到新手啦


………我都唔識入 BIOS 睇………

---

作者: K_C_    時間: 2010-3-3 15:06



等BanQ???

---

作者: helenchan    時間: 2010-3-3 15:28


我知，我會知我仇家係邊個:curse:
查實你個毒霸，應該多D出 post 放毒嘛，等人人買靚野，新仔都不能自拔

---

作者: 處理中...    時間: 2010-3-3 16:40

支持

---

作者: man_53536641    時間: 2010-3-3 17:17

GOOD POST
很實用~
SUPPORT~~
THANKS CHING

---

作者: Ass    時間: 2010-3-3 22:28

之前出新機 去買牛
諗住買ea 500w
sales 問我推新機定舊機  佢話antec ea係2.0制式
新機個2.3制式好重要  佢叫我買牛魔王-_-
我心諗 腦場sell屎信唔過
最後買左個corsair 550w

建議簡單講下個制式咩黎
同埋我想問隻牛係x W
係咪長時間入x W好耐
今日有答案了.
學到野

---

作者: barrychung11    時間: 2010-3-4 00:50

Thanks for your post, support~

---

作者: EP_ERIC    時間: 2010-3-4 12:58

Thank~ good post

---

作者: helenchan    時間: 2010-3-4 15:54


呢個完全超出我預期！原來真係幫到咁多人………:funk: 寫咁多真係值


呢家陣 sales 識多左咁多 terms 黎厄人………查實佢講 antec EA500 係 ATX12V v2.0 根本錯，而且直接睇個 +12V 實際輸出同埋有咩 connector 好過鑽研佢係咪 v2.3 多多聲。
咁睇黎有必要增加 ATX12V 內容部分。等我遲D擴容下先

---

作者: jasonlkk    時間: 2010-3-4 18:48

本帖最後由 jasonlkk 於 2010-3-4 18:53 編輯

你好！呢篇野可以糾正到好多人既錯誤觀念！

有2個問題想問：
1.請問A數有冇公式可以計返W數出黎？
因為例如張Display卡話要19A，咁我又想知佢實際要幾多W，咁有冇得計？
同埋一個HDD要大約30W，咁即係幾多A?

2.我用緊隻牛係Delta ServerPower 550W，據我所知係舊ATX12V Ver.，有網站寫Ver.2.03，咁我部機用E6500 65nm/8600GT Display/5隻SATA.最大1TB，其餘250G/160G等，咁我隻牛頂得順嗎?
TTL output: +5V = 26A / +3.3V =  28A / +12V1=18A V2=18 V3=18
最後問多句我隻牛既12V總輸出等唔等如18A x3 =54A?


冇超頻的。
Thanks！

---

作者: jasonlkk    時間: 2010-3-4 19:06

我有隻MaxPower GPV500W
+12V1=16A /+12V2=17A
但係多埋個
+12Vcombined=28.5A
12Voutput=342W

咁呢隻牛+12V總輸出係16A+17A=33A定係28.5A?
同埋佢V1同V2個值得16V同17V，咁係咪算低？定還是佢會可以自動組合為28.5A?
咁想加張GTX295要求要：
680W/12V要46A
咁呢隻牛咪爭好遠？

---

作者: s    時間: 2010-3-4 19:13

提示: 作者被禁止或刪除 內容自動屏蔽

---

作者: alt51    時間: 2010-3-4 20:28



+12V總輸出28.5A
普通多路牛16,7A差不多
GTX295不會用46A 不會用那麼多
自己可 google GTX295 power comsumption
多路牛問題是很多時標記不清 ,平均造得好便沒問題,但接錯了系統易不穩

---

作者: alt51    時間: 2010-3-4 20:41

本帖最後由 alt51 於 2010-3-4 20:43 編輯

以ENERMAX産品來講
http://www.enermax.com/files/ProductFile_chi/PF_File/58.pdf　
ｐ２８－２９毎一路也標得很清楚,自己設計一下接法便不會超過毎一路電流流量
以corsair産品來講
http://www.corsair.com/products/vx/default.aspx
VX450 12V已經有33A比很多500,550w牛更大

用來接12V device (displaycard) 比很多500,550w牛更合適

12v cannot exceed 360w = 30A

圖片附件: 2967211242284257_m.jpg (2010-3-4 20:42, 80.81 KB) / 下載次數 375
https://www.hkepc.com/forum/attachment.php?aid=1008010&k=3b22da54ac04bc29eb4657e14750bb84&t=1781876461&sid=nL2yZCEaLC

---

作者: 人中之龍    時間: 2010-3-5 12:17



1. Power(W)=Voltage(V) x Current(A)，可以用Google search一下
2. Delta ServerPower 550W，樓上有相，睇到呢隻牛12V係比同級550W牛偏低，同埋如果用左幾年，就算推到你個config.都唔好超頻，會比較推得吃力

---

作者: helenchan    時間: 2010-3-5 12:51

第1次大更新

---

作者: helenchan    時間: 2010-3-5 12:52

本帖最後由 helenchan 於 2010-3-5 13:28 編輯

上面已經有幾位高手解答左~~~
稍為補充少少野，絕大部分既多組輸出牛既總輸出(combined output)都比各路單獨輸出加起黎細，而總輸出係需要靠睇間廠提供既 spec 先知道。如果果隻牛冇提供相關資料既話………我自己就唔會買………

至於 GTX295 個要求，其實係 NV 估算你成部機所有 components 而提供既整體需求建議，即係佢個建議係包括成部機既，佢建議你買隻有 680W with combined 46A 牛就穩陣，低過唔一定唔穩，不過就要靠你自己計清楚得唔得。
GTX295 基本上同玩 GTX260 SLI 既耗電量差唔多，對火牛既要求自然高。你隻 GPV500W 唔係好夠係正常既，畢竟 high-end 孖卡………

---

作者: 高杉大和    時間: 2010-3-5 13:21

多謝你~~唔係你我都唔知600W,700W對我黎講係浪費,....

---

作者: jasonlkk    時間: 2010-3-5 23:27

唔該哂各位解答！學到唔少野！

---

作者: jasonlkk    時間: 2010-3-5 23:27

更新完又多d資訊睇了，thank you very much!

---

作者: lkl0120    時間: 2010-3-5 23:40

仲以為CHING下一個教學會係LGA 1366TIM
原來係玩火    牛

---

作者: helenchan    時間: 2010-3-6 12:47


買大D好，方便日後升級
好多時依家D牛W數唔成問題，反而A果度就………先前見唔少人玩孖卡，800W 都推唔到，要換 1000W 甚至以上至得。其實齋講 W ，係真係夠既，之但係A唔夠呢，結果都係唔掂………


唔知會唔會冇乜人留意到有更新………
始終我呢篇係近似草稿既非完成版，以後應該仲有排更新。不過，一路更新就一路發覺自己好多野唔識，都係要自己搏命 search ，整理好晒之後再補充更新，好羅命……


冇米，玩唔起 不過玩得 1366 既，應該都唔洗睇咩新手篇掛……

---

作者: yr80wan    時間: 2010-3-6 12:48

多謝樓主無私分享

---

作者: K`Y-bAbe    時間: 2010-3-6 13:09

3000幾人睇...得75個回...唉
多謝樓主既熱心

---

作者: Jamie06    時間: 2010-3-6 16:48

樓主可以講下d廢牛既缺點
例如放煙花、燒機、著火、boom一聲熄機、閃電時重新開機

---

作者: helenchan    時間: 2010-3-6 17:21


我有私心架，想普及火牛基本知識，逼使牛廠同 sales 提升質素，最終自己受惠 只係個「妄想」太傻太天真


咁先好，證明香港社會繁榮穩定，坐擁成堆中產，「沉默的一群」
講真，我完全唔介意 cdrom。畢竟寫成大堆野出黎，目的都在分享，有讀者已經係非常非~~~常之值得慶幸。而好似你同上面咁多位咁，有進一步既回覆交流，就係完全唔同層次既另一高境界喇。我唔敢奢望呢種高境界會大量出現…………
最激氣既反而係，我呢頭一路搵料一路寫，花幾個月寫篇野出黎，果頭下面仲成堆「XXW夠唔夠推？」、「XX牛定XX牛好？」等等，好有完全被無視既感覺……… 不過正常計，我咁查實心態上好自大。乜我寫人地就要老馮睇咩？我好巴閉咩？唔睇咪唔睇羅………



咁又唔好………用雞牛唔一定有上述惡果，好多人都用緊雞牛十年八載，無病無痛，so far so good 架………用雞牛只係更加考驗使用者既時運。我講出分辨好壞牛方法已經好夠，無謂講D得人驚野，嚇親人就唔好

---

作者: Jamie06    時間: 2010-3-6 19:40


其實拎上手已經知入面係咪足料.... 跟機d雞牛可以同個kb咁輕

---

作者: 單身的人    時間: 2010-3-7 13:49




GTR 有D好重手下.........咁就係足料嗎???

---

作者: 單身的人    時間: 2010-3-7 13:52

但係當你睇到佢成6組 +12V 17A，再諗諗張 4870 17A 都唔多夠，起碼 18A 先安全既話，你就唔知佢點玩孖卡。

1200W牛 真係行唔到4870雙卡?????

---

作者: ken318    時間: 2010-3-7 17:44

支持一下樓主既心機, 而且好有用, good post

---

作者: ken318    時間: 2010-3-7 17:45

支持一下樓主既心機, 而且好有用, good post

---

作者: shar    時間: 2010-3-8 18:34

支持樓主~~

---

作者: helenchan    時間: 2010-3-8 20:17


呢個………如果係細W牛既話，較重可能代表佢係 passive PFC 。細W牛黎講，成本較高既 active PFC 牛係會比成本相對低既 passive PFC 牛輕………


唔係 1200W 牛行唔到孖 4870，而係只得6組17A既 1200W 牛，未必行到孖 4870………呢度個關鍵係A可能不足，而唔係W不足。
火牛唔淨止要睇W，仲要睇埋A。比如某大廈天台裝左超巨型特大水缸，頂得住出面停水3日都有水供應，照計供水量好充足。不過，如果入屋水管絲咁幼，你開水喉得條線既水量，你會唔知點用黎洗碗同沖花灑浴。即總儲水量幾多都好，唔夠水量供應仍然係唔夠水用。
多組輸出牛就好似多幾條水管咁。多幾條幼水管未必解決到個供應問題，要條水管夠粗至有用。一間大廈上100戶，有個「特殊戶」可以獨佔其中一條管，唔理佢用水多少，總之就獨佔，其他戶用唔到，要用就 share 其他水管。如果其他水管，每條都超窄，咁就大鑊。


最緊要都係有你地支持！有觀眾至有演員

---

作者: 1fgrgm    時間: 2010-3-9 01:49

本帖最後由 1fgrgm 於 2010-3-9 11:48 編輯

MAXPOWER 牛魔王 GPA420 420  80 PLUS


幫我睇下d用料

圖片附件: SANY0531.JPG (2010-3-9 01:28, 64.79 KB) / 下載次數 305
https://www.hkepc.com/forum/attachment.php?aid=1009713&k=d41da96065a81ee76555d4558ecf1ae2&t=1781876461&sid=nL2yZCEaLC



圖片附件: SANY0531.JPG (2010-3-9 01:47, 64.79 KB) / 下載次數 326
https://www.hkepc.com/forum/attachment.php?aid=1009714&k=361da536895bfe380c8c995c9a0aa344&t=1781876461&sid=nL2yZCEaLC



圖片附件: SANY0530.JPG (2010-3-9 01:47, 68.19 KB) / 下載次數 324
https://www.hkepc.com/forum/attachment.php?aid=1009715&k=f9aa6a1ae599c0ad49e66d775984c438&t=1781876461&sid=nL2yZCEaLC



圖片附件: SANY0543.JPG (2010-3-9 01:47, 59.8 KB) / 下載次數 299
https://www.hkepc.com/forum/attachment.php?aid=1009716&k=5a4374f1807ba0d31af13f9a1a29d248&t=1781876461&sid=nL2yZCEaLC



圖片附件: SANY0544.JPG (2010-3-9 01:48, 68.21 KB) / 下載次數 328
https://www.hkepc.com/forum/attachment.php?aid=1009717&k=473f18ae4b0bb92b791c3baa66d442e1&t=1781876461&sid=nL2yZCEaLC



圖片附件: SANY0510.JPG (2010-3-9 01:48, 87.34 KB) / 下載次數 335
https://www.hkepc.com/forum/attachment.php?aid=1009718&k=2db6bad7324c5f1867e542958ae1f286&t=1781876461&sid=nL2yZCEaLC



圖片附件: SANY0536.JPG (2010-3-9 01:48, 63.54 KB) / 下載次數 340
https://www.hkepc.com/forum/attachment.php?aid=1009719&k=1dd57fdddff79544f9c8a1d9c4e04a8c&t=1781876461&sid=nL2yZCEaLC



圖片附件: SANY0541.JPG (2010-3-9 01:48, 66.45 KB) / 下載次數 333
https://www.hkepc.com/forum/attachment.php?aid=1009720&k=d60b4058807c1d258be0dd310e74da4b&t=1781876461&sid=nL2yZCEaLC



圖片附件: SANY0542.JPG (2010-3-9 01:49, 67.52 KB) / 下載次數 303
https://www.hkepc.com/forum/attachment.php?aid=1009721&k=e3a34c68e64c6a50512663c4291ab008&t=1781876461&sid=nL2yZCEaLC

---

作者: davncl    時間: 2010-3-9 08:12

我問下sfx 同 afx 點分.....

---

作者: helenchan    時間: 2010-3-9 15:20


其實你想知D咩？

如果單從 spec 睇，覺得佢個A偏低，得 11A+14A。其他所有野 share 得 11A，可能推 6pin 卡會容易唔係好夠力………


完全唔識……真係從來未聽過

---

作者: 1fgrgm    時間: 2010-3-9 16:06




    我隻舊牛 牛魔王he420pro3  420w   am2 5600+ 拖8800gts 都夠力不過70 plus

以隻gpa420 係80 PLUS  冇以前隻牛甘熱慳電

gpa420 用料ok嗎  我200蚊收2手反黎冇保用都低用

---

作者: helenchan    時間: 2010-3-9 16:22

有冇 he420pro3 既 spec 睇？
另，你都已經有隻 420W 牛，用 420 換 420 好似………

---

作者: 1fgrgm    時間: 2010-3-9 16:35

我想冇甘熱 同慳電

---

作者: helenchan    時間: 2010-3-9 19:00

如果唔知你以前果隻既 spec 既話，好難同依家呢隻做對比，因此唔知呢隻係咪一定夠你用………12V2 應該夠用，168W，唔大超4核U就夠，問題係 12V1，得11A………具體要睇你部機既 config 先知夠唔夠。

---

作者: 1fgrgm    時間: 2010-3-9 19:22

am2 5600+  ddr2 800  2g    Audigy 2音效卡

8800gts 640mb   sata2  hd320gx2     640g  3隻hd

lg 413b rw  

5該幫我睇下  舊牛好定新牛好

圖片附件: SANY0524.JPG (2010-3-9 19:05, 66.55 KB) / 下載次數 303
https://www.hkepc.com/forum/attachment.php?aid=1009868&k=07b420859f723d606da3737a84aaa82d&t=1781876461&sid=nL2yZCEaLC

---

作者: helenchan    時間: 2010-3-9 22:00

唔記得左 8800gts 要 1定 2條 6pin………如果只要1條，咁新牛行到冇問題； 如果要2條就………齋計 spec 仍然夠，不過如果因老化而導致輸出能力下降既話，咁就真係唔知夠唔夠………

---

作者: dchiu    時間: 2010-3-9 22:02

"１。火牛 W 數打個8折過佢就岩架喇！...一隻 350W 牛實質可以保證 output 到足火 350W 既，因此正常情況下無需打折。"

不太同意。火牛長期使用後老化，例如電容的電解質會乾，受潮也會影響功率，加硬盤、換顯示卡也須大些功率吧，還是買大一點好。

---

作者: 1fgrgm    時間: 2010-3-9 22:14

8800gts 行1條6pin

---

作者: helenchan    時間: 2010-3-9 22:21

咁係附加左其他因素落去：
a. 牛會老化——牛係會不斷老化，就算比你打個8折都冇包單夠用，最終可能就要無窮後退，甚至7折、6折………
b. 加野換野要大D，多D預留係好，但係咁同上面一樣，可以無窮後退。預大幾多至岩？

呢度個關鍵係： 響認識上需要搞清楚，隻牛個 output 係實際輸出。至於要買幾大W牛，有好多唔同考慮，單靠用8折黎預因為方法錯誤，好容易出錯。2者唔應該混為一談。
即係話，牛唔應該用所謂打8折黎計實際需要既火數，要預大D係基於其他原因，而唔係因為隻牛 output 真係細2成。我文章有約略提及揀牛W數方法，因應自己既具體使用情況計算需要比較好。

---

作者: imprewake    時間: 2010-3-9 22:42

多謝樓主分享, 十分實用喔,
下次也會選用較貴的火牛,
始終保障最緊要喔, 還不用天天在擔心,
看完樓主的post後學會不少火牛的知識,
以往本人也只懂日系電容、牌子、Watt數和80plus而已,
現正使用Xigmatek NRP-PC502。

---

作者: enviro50042c    時間: 2010-3-9 23:00

不如quote埋其他ching既文章放係#1
無咁散修修