[開箱] 唔似係vsonic出品嘅vsonic Ἀρης(阿瑞斯)開箱測試

本帖最後由 hk133 於 2018-10-26 20:39 編輯

對vsonic嘅印象,就只有VSK3同埋舊版GR07 Classic。
兩件嘢嘅質量都令我覺得vsonic QC唔得,不過都見到比較新嘅VSK3做工上相比舊版GR07C都有改進。
近排心思思想買副更加好嘅頭戴式耳機,預算2-3K,預定係買simgot。
得閒無嘢做走去睇下佢地嘅tb店,EM5都未正式出,睇黎大耳都有排等。
再去vsonic tb店睇下佢地嘅大耳出咗未,結果又係未出。
不過就咁啱睇到Ἀρης(下稱阿瑞斯)搞緊限時優惠,買阿瑞斯+GR07W套餐要1499人仔,不過就送埋VS X(即係GR07X碳納米管振膜版)。
我對GR07W冇興趣,藍牙耳機唔防水仲要冇AptX,算係好大嘅敗筆,
不過送埋VS X抵到爛,最多咪放咗GR07W囉。
然後尋日收到貨先知道VS X仲未生產好,要等到3月尾叫佢地補發。
所以今日就凈係得阿瑞斯嘅開箱。





銀色版嘅包裝都係銀色。
新版包裝只係得vsonic logo喺左上角,正中間有佢個名,就係咁簡單。




包裝側面。
今次阿瑞斯採用鋁合金外殼,配合五軸精雕工藝製造。
宣傳圖睇落效果唔錯,實際產品又係點?




包裝另一側。
又係嗰幾句宣傳語,睇下今次會唔會真係有“強勁低頻”。
另外都係有介紹耳機嘅一啲特點:碳納米管振膜,三道五軸精雕工藝,兩道精拋工藝,手工編織線材。比較遺憾係阿瑞斯冇得換線。




包裝背面。
本來以為應該會印咗參數之類嘅信息喺背面,點知冇。
都係印住嗰啲嘢,同埋有個防偽碼。




內盒係黑色。GR07W都係一樣,估計呢個內盒應該係所有新型號通用。
個盒手感唔錯,不過會癡手指印。




打開個盒。




盒入面除咗耳機,中有一個印咗vsonic logo嘅細盒同埋一本說明書。
另有一小包防潮珠放置於耳機線旁邊。




盒仔入面裝住一個俾膠袋包住嘅收納包。




收納袋手感唔錯,絨布質感幾好不過好容易癡塵。




替換耳塞全部喺收納包入面,仲有多包防潮珠喺入面。
入面係啡色絨布,摸落質感同我嘅momentum on-ear嘅耳罩差唔多。


睇完啲配件,終於要講翻正題:耳機!




阿瑞斯嘅做工的確幾驚艷,呢個外殼整得非常精細,
鏤空嘅位置邊緣都有經過打磨,唔會界手,
金屬外殼嘅接合位隱藏得非常好,要仔細觀察先可以發現。




不過插頭就都係vsonic嘅標準樣式,冇為阿瑞斯定制一個金屬插頭,顯得有啲格格不入。




分線器部分都做得比較求其,熱縮管笠住就算,加多舊膠調節分線位置,比較隨便。




做工上有改進,但見到有啲地方都做得幾隨便。
佩戴舒適感唔算好,原裝耳塞似乎唔適合我,戴唔實,影響到聲音表現。
用spinfit都未算最好,反而銅雀pro跟機耳塞配搭阿瑞斯嘅表現出乎意料地好。
第一次覺得spinfit搞到啲聲好怪。
建議試多幾種耳塞,搵最適合自己、隔音好嘅耳塞。

耳機腔體做工一流,五軸加工真係有料到,不過呢個外形容易積塵。
不過用相機嘅除塵工具其實都ok。

用spinfit耳塞,開聲冇耐都已經唔錯,不過低頻略多,對高頻造成些許影響。
聲音風格一改以往低頻缺乏量感嘅問題,今次佢嘅低頻表現無論係質感定係量感都幾好,比起GR07C有改進。但呢種調音風格冇咗vsonic嘅特色,似係迎合市場而作出嘅調整。
搭配銅雀pro跟機嘅通透塞,低頻質感有改善,details方面足以打低銅雀pro。
由於今日先發現銅雀pro通透塞可以改善阿瑞斯嘅聽感,再試多一兩日先補充聽感評價。
——————————
03.06 update
呢兩日聽完,總算可以俾一個概括嘅評價:低頻過多嘅高質素單動圈耳機。
(一切聽感評價係喺用銅雀pro跟機均衡塞搭配作為基礎)
音場方面,阿瑞斯比銅雀pro更為優勝,寬闊嘅音場帶來更佳嘅臨場感。雖然過多嘅低頻難免會影響聲音整體表現,但阿瑞斯嘅高頻表現都算唔差,解析力良好。而且低頻有量亦有質,一改以往vsonic耳機低頻少、聲音均衡嘅調音取向,雖然低頻係多但細節都幾完整,快速嘅連續鼓聲同埋各種樂器嘅聲調都還原到,聲音具層次感。可能係動圈單元質素夠好,因此即使面對呢種低頻偏多嘅極端調音,佢都依然發揮到自身大部分嘅實力。此外,阿瑞斯對音源嘅要求唔高,喺普通手機上都可以有唔錯嘅效果。
如果佢嘅低頻冇咁誇張,以佢嘅工藝水平同動圈單元嘅實力,佢足以打低銅雀pro。只係阿瑞斯嘅低頻掩蓋咗一啲高頻,令到銅雀pro嘅高頻表現比阿瑞斯略好,都有啲可惜。阿瑞斯令我對同樣採用碳納米管振膜嘅VS X有更高期望。如果VS X沿用GR07嘅調音風格,相信可以俾到更加出色嘅聲音表現。不過具體聲音係點,都要試過先知。

如果唔介意佢低頻偏多,甚至好鍾意重低音,阿瑞斯會係一個幾好嘅選擇。不過,阿瑞斯對耳膠嘅要求唔低,建議揾一款隔音良好、佩戴相對牢固嘅耳膠配合阿瑞斯使用。

回覆 1# hk133

C hing 請問這個套餐,有 link 嗎?先謝了.

TOP

回覆  hk133

C hing 請問這個套餐,有 link 嗎?先謝了.
nor423 發表於 2018-3-4 05:40



    早就完咗,個優惠淨係做到3月1日。

TOP

呢款阿瑞斯真係咁無吸引力??

TOP