[開箱] 單圈出奇跡：iBasso IT01s開箱測評

本來聽開GR09嘅我，偶然見到IT01s，
Tesla磁路+碳納米管振膜+DLC類鑽石球頂三大技術加持，聽落好似好勁。

碳納米管振膜嘅耳機之前都用過（GR09），質素都唔差，但加埋另外兩個技術嘅耳機就真係未試過。
於是就有咗今次呢個開箱啦。

包裝封套正面印有iBasso logo，以及耳機型號。
背面就有多國語言嘅耳機參數。
IT01s阻抗只有16Ohm，應該算係低阻抗耳機。

封套內嘅包裝盒深灰色（偏藍），有iBasso凹印。

包裝盒係揭蓋式設計，打開之後就可以見到耳機主體同埋耳機收納盒。
揭蓋上面黏住嘅黑色信封，裡面有說明書。

耳機主體表面經過電鍍處理，本質都係膠殼，不過處理後外觀更好睇，呈現鏡面效果，做工幾好。

而耳機收納盒就係金屬材質，做工唔錯。

近鏡影多張，就咁睇真係睇唔出係膠殼，耳機主體表面嘅處理工藝唔錯。

黑色信封裡面放住一本說明書，一張保修卡同埋拔開MMCX線嘅說明卡。

睇過成個包裝盒，冇其他暗格。
咁其他配件去咗邊？

原來全部都塞曬入耳機收納盒裡面......
全部攞曬出嚟就覺得好多，咁多嘢都放得入收納盒，犀利。

配件全家福。一大堆配件，見到都覺得抵。
有三款硅膠套（大、中、小），兩對耳棉同埋一對替換用嘅耳機濾網。
耳機嘅跟機線係2.5mm平衡頭，附送2.5mm to 3.5mm轉接線。
跟機線幾粗，而且外觀幾靚，幾襯IT01s。

跟住講下音質。聽咗一陣，基本都對佢嘅音質有一定概念。
講咗結論先：我認為佢嘅整體聲音質素係好過GR09。
我一直覺得GR09低頻量感唔夠，幾可惜。而IT01s嘅低頻量就恰到好處，量感充足但唔會喧賓奪主，所以高頻依然維持到幾好嘅水準。低頻量感嘅提升配合良好嘅質感，令鼓聲還原更為真實，每一下鼓聲都清晰有力。而且得益於IT01s出色嘅瞬態反應，就算係快速而連續嘅鼓樂敲擊聲都可以聽清。
中頻表現都幾好，人聲還原表現好過GR09，人聲更加清晰。
至於高頻，明亮而清晰，相比GR09，IT01s弦樂細節還原表現更加出色，餘音、迴響等細節都還原到。
另外唔知係咪低阻抗嘅優勢，IT01s分析力都好過GR09一啲，聲音分離度都更好，聽樂隊演奏可以聽到不同樂器嘅更多細節，唔怕疊聲。
我亦都試過用apple type c to 3.5mm轉接線直推It01s，啲聲都唔錯，可見IT01s算係比較易推。

我個人偏向喜愛動圈耳機，動鐵耳機雖然分析力更好，但係聽感始終都好似差咗啲。
而IT01s嘅分析力都幾出乎意料，甚至高頻表現有啲似動鐵耳機咁明亮，
不過始終都係動圈耳機，當然有唔少動圈耳機嘅特質：聲音寬鬆自然，音場都幾闊。

總括而言，IT01s係一款幾好嘅單動圈耳機，高頻明亮，中頻清晰，低頻飽滿有力，基本上冇咩缺點。
做工方面佢都好過GR09唔少，聲音質素又好過GR09，值得一試。
好難得仲有耳機廠用心整好單動圈耳機，抵讃。