[開箱] EDIFIER TWS1真無線耳機開箱評測

本帖最後由 hk133 於 2019-7-1 01:03 編輯

賣到咁平，我仲以為我睇錯……

目前呢款真無線耳機喺驚東首發，預售價199人仔

update：見到淘佬漫步者某專賣店都有預售，實際售價178人仔（需提前支付30人仔定金）

* * * * * *
宜家出咗開箱放毒先，宜家仲未開始用TWS1，試一排先講評價。

今次呢輯開箱相整體而言影得幾滿意，盡量壓低曝光量又避免整得太暗，得出嘅相片效果唔錯。（耳機樣靚都有功勞）

宜家凈係po相，廢話留返遲啲寫正式評測嗰時再補充。

* * * * * *

雖然我都有諗過，用Qualcomm QC302X芯片嘅真無線耳機應該可以平過399人仔甚至299人仔，但真係估唔到可以平到貼近200HKD嘅水平（首發特價嗰時）。而且玩到咁平嘅居然唔係嗰啲手機廠，而係頗有知名度嘅大陸HiFi大廠EDIFIER（漫步者）。佢地之前出過TWS2、TWS3同TWS5，全部嘅正價都貴過今次呢隻TWS1，而且未出TWS1之前就只有賣得最貴嘅TWS5有得用QC3026。宜家TWS1用QC3020，唔止拉低咗漫步者真無線耳機嘅平均售價，仲成為咗應該係目前市面上最平嘅QC302X真無線耳機，同埋變相話俾人知呢粒芯片其實好平......

雖然TWS1係平，但包裝都好正路，
正面印有耳機外貌，背面印有基本參數同介紹，側邊都有簡單介紹。
Qualcomm芯片同埋觸控操作應該係呢副耳機嘅最大特點。
見到佢仲寫住單次充電可以用到8個鐘，勁。

打開個盒就見到TWS1嘅充電盒，TWS1就喺入面。
充電盒用膠膜包住避免刮花，都幾細心。

擺放充電盒嘅黑色板後面收埋咗啲配件。

配件全家福。
有充電線、說明書、保修卡、替換耳膠同埋防潮包。

充電盒嘅外形好圓潤，外殼做工幾精緻，
亮面外殼睇落幾靚，不過用耐咗應該會花曬......
充電盒雖然係膠殼，但睇落一啲都唔cheap，每個邊緣都有過渡弧度。
同價位其他真無線耳機.......唔好提啦。

頂部有EDIFIER凹字，凹字部分整成磨砂質感。

打開充電盒就可以見到TWS1耳機本體。
耳機同充電盒一樣，都係亮面設計。
外側觸控面板印有EDIFIER嘅新logo，睇落唔錯。

充電盒底部印有充電參數。

另一邊係Micro USB充電口。

講翻個耳機，TWS1成個外形同充電盒一樣，都係好圓潤，
而且機身冇咩明顯嘅拼接痕跡，一體感非常強烈。
TWS1嘅體積唔算細，其實同其他真無線耳機差唔多，
充電盒就真係好細，甚至放得落入耳式耳機嘅收納盒。
充電盒嘅設計都唔錯，TWS1換咗其他入耳式耳機嘅耳膠之後都放得落充電盒&充到電，唔似其他真無線耳機，換咗耳膠就頂住充唔到電。（不過偶爾要放多一兩次先得......）
用咗差唔多一個月，間中帶過出街用，無論係連接手機信號抑或係連接左右耳都好穩定，搭地鐵嗰時用都冇試過斷線。
其實我想試埋通話收音（即係唔除低耳機直接講嘢），但唔記得咗，習慣咗聽電話嗰時除低一邊耳機貼近嘴邊收音......

跟住就講好多人都關心嘅一個問題：
到底EDIFIER TWS1啲聲係點？
老實講，一開始我對於TWS1嘅音質冇咩期待，
我只係貪佢用QC3020芯片，連接手機會穩定一啲......

測試用嘅手機係小米MIX2S同堅果Pro 2S，兩者都support AptX以及藍牙5.0。
連接方面兩部手機都冇遇到任何問題。

TWS1嘅跟機耳膠，唔止係咪唔啱我，都可能係膠皮薄嘅問題，
隔音效果雖然都叫ok，戴得好穩陣，但出嚟啲聲好散，同埋冇咩bass。

之後換咗SIMGOT EN700 Pro嘅“均衡塞”耳膠落去，呢個耳膠可以增強低頻。
換咗耳膠之後低頻量多咗（不過都係偏少），啲聲都實咗。

一開始就咁聽TWS1，唔攞其他耳機比較。
TWS1低頻質感唔錯，鼓聲有氣有力。
不過TWS1嘅中頻比較突出，連帶人聲同中頻樂器聲都比較有氣勢，
甚至低頻嘅氣勢都似乎比唔上中頻......
高頻表現唔差，高頻比較明亮，不過播流行曲嗰時，高頻細節有時會俾低頻掩蓋。
初步聽落啲聲我覺得都ok，聲場算係比較闊，人聲靠前樂器聲靠後，聽落都唔差。

然後同小米AirDots青春版做對比，兩者價位差唔多。
冇對比就唔會有傷害，一對比先知道TWS1嘅聲場真係幾闊，闊過AirDots青春版唔少。聲場闊啲，空間感都好啲。
講翻兩者嘅調音取向，TWS1中頻比較突出，而AirDots青春版就多bass。
不過多bass唔代表好，AirDots青春版低頻量雖然好足，但低頻質感冇TWS1咁好，AirDots低頻下潛比差過TWS1一啲。不過因為TWS1低頻量少，中、低頻樂器嘅聲顯得有啲單薄。
中頻表現TWS1好過AirDots青春版唔少，TWS1嘅人聲比較出，唔會俾低頻干擾，出嚟嘅人聲表現唔錯。
TWS1高頻表現唔差，雖然高頻偏細聲但都聽到啲details，好過AirDots青春版，高頻基本上被低頻淹沒。
就返整體嚟講，對比AirDots青春版，TWS1雖然中頻比較突出，但對高頻嘅影響唔大，低頻量少不過質感唔差，整體表現都唔錯。

再對比MPOW T5，
MPOW T5低頻量比AirDots青春版少啲，但對比TWS1都係多。
同AirDots青春版一樣，MPOW T5都係側重低頻，
TWS1聲音偏冷，MPOW T5聲音偏暖。
MPOW T5嘅低頻量多過TWS1，有AptX加持所以質感都好過TWS1。
同MPOW T5比低頻，TWS1冇咩優勢。
至於中頻，TWS1中頻靠前，琴聲冇好似MPOW T5咁俾低頻掩蓋，所以中頻表現係TWS1更勝一籌。
TWS1高頻比MPOW T5稍為靠前，所以高頻冇俾低頻掩蓋，弦樂、鑼聲等高頻樂器聲都可以正常發揮，冇被鼓聲蓋過。

MPOW T5都出現咗同AirDots青春版一樣嘅問題，就係低頻量多影響到整體嘅聲音表現，呢個問題喺播放一啲樂隊演奏嘅歌曲嗰時會變得更明顯，大量嘅低頻鼓聲干擾其他樂器嘅表現，成首歌變曬味。不過考慮到普遍消費者對於音質好嘅定義就係多bass，又似乎冇咩問題。
EDIFIER TWS1就冇加咁多bass，雖然中頻比較出，但對低頻同高頻嘅表現冇咩影響，整體嘅調音似返一副HiFi耳機，唔係靠加bass取悅消費者，而係用較好嘅分析力同埋比較均衡嘅三頻表現滿足追求音質嘅消費者。

對於呢副EDIFIER TWS1耳機，呢個價錢，呢個外觀，呢個聲音質素，
我覺得真係冇理由唔推薦。