而家電視台點解懶得唸頻道名?(長文注意)

本帖最後由 frank817 於 2017-7-8 02:43 編輯

呢度只討論頻道名稱。

大家覺唔覺,數碼年代帶黎既新電視頻道,除左已執既亞視,其他新電視台新頻道,都好似完全冇用腦唸名咁。

先回顧一下歷史:

1967年大台開台,中英頻道各一,佢唔會好hea咁叫「無綫電視第一台」、「無綫電視英文台」之類,而係畀左個名「翡翠台」、「明珠台」,雖然唔知有咩寓意,亦唔知「翡翠」同中文/粵語、「明珠」同英文有咩關係,但都叫做有心思。而同期麗的同之後亞視,都一直係就咁叫「第一台」「第二台」/「中文台」「英文台」,高下立見。佳視只有一個頻道,就唔使唸啦。

直到長達20年後,80年代尾,亞視(金錢台)先有樣學樣,中文台改叫「黃金台」、英文台改叫「鑽石台」,簡直抄到一模一樣,都係以珠寶首飾類物體命名,都係唔知「黃金」同中文/粵語、「鑽石」同英文有咩關係。不久後因為轉老細,除logo由金錢變絲帶/風車外,頻道亦改做「本港台」、「國際台」,中文本港、英文國際,呢個我認為係改得最好最貼題既(傳說中,原本打算叫「香港台」「世界台」,但因為忽然唸到兩間知名大酒店又係分別叫「香港」「世界」,所以至急急改成意思相若既「本港」「國際」,但總覺得國際台英文叫World好似怪怪地,唔太對應)。

以下入正題:

跟著數碼廣播帶來新頻道,亞視新頻道名,咩動感魅力文化,都係貼題同有唸過,只係唔知點解要叫「XX資訊頻道」咁長咁浸,簡簡單單「亞洲電視新聞台」、「亞洲電視動感台」、「亞洲電視魅力台」、「亞洲電視文化台」唔仲好咩?其後擺明loop殘片既「歲月留聲」,都算係有用腦唸過同有意思。唯一不明所以既,就只得「亞洲台/亞洲高清台」,或者可以視為介乎「本港」同「國際」(World)之間。只可惜到左呢個年代,亞視已經幾乎名存實亡了,同埋呢堆新頻道全部短命。

反觀大台新頻道,比較似樣既係得一個「互動新聞台」,雖然都唔知佢有咩「互動」。「J2」、「高清翡翠台」、「J5」,全部都係擺明食「翡翠台」老本,了無新意,好似完全冇用腦唸過咁(可能大家未必記得,J2啟播前,曾計劃叫「翡翠2台」,英文Jade 2,J2好明顯係用左「翡翠2台」既英文縮寫做正式名稱)。小弟愚見:J2可叫「青春82台」(就咁叫「青春台」好似有D老土,同埋可以食下日本既「青春18車票」條水)、J5可叫「資訊台」

至於新電視台:港台電視、ViuTV、奇妙,更唔使講啦,直頭就咁用台號(31、99、77.....)、中文台英文台咁就算,又係完全唔唸名。尤其ViuTV既命名更係含糊,ViuTV到底係電視台名(對應「無綫電視」、「亞洲電視」,定係曝光率極低既「香港電視娛樂」至係電視台名?),定係頻道名(對應「翡翠台」、「本港台」)?

綜觀多年,原來o係頻道命名上,最貼題又最肯用腦唸既,竟然係亞視(80年代尾轉絲帶/風車logo至執粒前)!

提示: 作者被禁止或刪除 內容自動屏蔽

TOP

本帖最後由 kin1010hk 於 2017-7-8 15:58 編輯

回覆 1# frank817


    以前電視可以手動調整頻道號碼(如翡翠係1、本港係2等等),所以一個台個名會好重要

雖然依家都可以,但大家都好少特登改,所以我估宣傳會強調頻道號碼多D

例如以前傾野會講 你有無睇翡翠台
        但係依家會講  你有無睇81

TOP

回覆 3# kin1010hk

呢個係主要原因, 不過啲人慣左. 台名仍然好重要. 至於頻道號碼係政府同商家協定既. 政府有其想法, 有啲電視台個預設組合, 比無線台更易撳. 曾經政府畀亞視一條路, 11號係其中一個好牌. 我時常講唔識用. 最後遭人取代. 目前可能最具爭議既台, 就係99號. 99號, 長長久久, 不停地睇,確保有益. 事實上當然唔簡單.

TOP

講得好

但又老實講,翡翠明珠呢d名今時今日又有d out,另外3個台改名唔match返翡翠明珠風格又好似唔太統一

另外tvb翡翠、j2 j5個台定位唔算清晰
J2主打年輕人,會播音樂同偶像劇
J5以前有劇集但而家得返財經同歷史資訊等等
翡翠就垃垃雜雜可算係綜合台
就算改個高質嘅台名,聽日個台嘅取向都可能會變…

TOP

講得好

但又老實講,翡翠明珠呢d名今時今日又有d out,另外3個台改名唔match返翡翠明珠風格又好似唔太統一 ...
C-Leung 發表於 8-7-2017 07:58 PM


我覺得一部分係電視台懶得去諗名,
二來係你個原因,佢地改咗個台名都隨時可能會改內容取向
咁就索性唔好改來改去

講到viutv,其實佢電視台登記名稱係香港電視娛樂,咁viutv 呢個名其實就係佢個頻道名,如果話viutv無思考過個名看我覺得又唔係咁公平,如果佢無諗過唧嘅話,99台就叫hktve唔係viutv 啦

TOP

呢度只討論頻道名稱。

大家覺唔覺,數碼年代帶黎既新電視頻道,除左已執既亞視,其他新電視台新頻道,都好 ...
frank817 發表於 8-7-2017 01:12 AM

奇妙電視先係真係懶得改名,佢個頻道真係就咁叫奇妙電視就算

TOP

8月TVB有幾個台會改名

TOP

8月TVB有幾個台會改名
jsg08 發表於 9-7-2017 01:02 AM


幾個台咁多?我諗翡翠明珠都唔會郁啦,最多係J2J5 同互動新聞台啫
其實最應該改就係互動新聞台,根本個mheg 5 已經廢咗

TOP

8月TVB有幾個台會改名
jsg08 發表於 2017-7-9 01:02 AM

咁震撼?而家近7月中,都未有聲氣

我估最大可能係J2去年青化,反正J2播馬同六合彩既問題佢都無意改

via HKEPC Reader for Android

TOP