Rank: 3 Rank: 3 Rank: 3

1^# 跳轉到 » 倒序看帖

字體大小: tT

發表於 2018-5-4 12:59 | 只看該作者

[開箱] (#2評測完成)小米MIX2S港行128G黑色開箱評測

本帖最後由 hk133 於 2018-5-11 11:16 編輯

2018/5/6 update:
目前確認我手上呢部MIX2S wifi接收有問題，試過同一款game嘅日服以及台服，使用wifi連線都會出現突然斷線嘅情況。
其他手機玩同一款game並無出現相同情況，而且MIX2S進行speedtest都同樣會不時提示網絡連接有問題，
甚至下載系統完整更新包時都會偶爾出現停頓（下載期間偶爾會冇網速，下載進度條突然會唔郁），
所以推斷我抽中伏機。

附上實測圖：
(問題解決，已刪)
目前會再試下下載系統完整更新包，再更新多一次，睇下會唔會恢復正常，否則會去換機。
本post會繼續講下跟進情況，歡迎留意。

——————
試咗重新安裝系統完整更新包幾次，都係冇用。
雖然呢個問題對於平常上網、睇片冇影響，但網遊需要即時連線，所以WiFi斷流就會造成好大嘅影響，有時進入最終確認畫面之前就斷線，有時就玩緊嗰時斷線。我甚至已經因此試過幾次被網遊系統認定係惡意斷線，繼續落去俾人封號都唔奇，所以目前唯有用翻舊機繼續玩，lag都要頂硬上。玩遊戲本來就係為咗得到樂趣，但好遺憾MIX2S令我冇辦法享受呢種樂趣。

———————
2018/5/8 update:
尋日同今日郁過太多設定，淨係記得其中兩個：又重裝系統一次、又用小米wifi app自動更改wifi信道兩次。改咗咁多嘢但都唔記得試一試，啱啱醒起就又試下打機同speedtest。唔知其中有乜嘢改啱咗，宜家忽然又好似冇乜事咁，打機同speedtest又好似冇再斷線……

唔通我俾部機玩咗幾日，部機終於良心發現？？
都有可能係router問題嘅……暫時再觀察一下先，確認佢真係冇事之後就繼續評測。宜家心情好複雜……

另外都要多謝幾位CHing關心同俾意見，雖然唔知其中發生咗咩事，但暫時睇落部機似乎已經冇事。宜家唯有希望唔會聽日一覺瞓醒又出事啦。多謝各位，thanks。
*****
最後再確認過，應該真係冇事啦，評測又可以繼續寫埋落去。
——————————

等咗咁耐，小米MIX2S嘅行貨終於喺5月4日推出。
雖然冇256GB版本比較可惜，不過128GB其實都算夠用嘅。
做咗次傻仔，喺旺角創興店排隊排咗差唔多三個鐘，終於都俾我買到128GB黑色現貨。

（不過去CSL買機仲抵，平多100

）
MIX2S今次嘅升級主要在於相機同埋AI功能、仲有Qi無線充電。（nokia整咗咁耐都冇流行，apple一出個個跟風

）
不過港版ROM好似閹咗唔少AI功能，例如最重要嘅“小愛同學”，相對而言會少咗啲樂趣。
今次MIX2S冇再堅持相機居中，而係改為放於左側，
而且相機外觀......完全係抄足iPhone X，兩個相機豎排+圓形閃光燈夾喺中間......呢次真係冇得拗。
搞到今次MIX2S俾人寸“一面MI，一面X”。
的確我都係比較喜歡MIX2嘅外觀，但既然2S相機有大提升，咁就唯有接受囉。

#1開箱，#2評測（之後再update）
評測內容包括：
充電線/充電頭性能測試（有啲廠最鐘意喺呢個部分偷工減料）
手機充電測試（今次仲要測埋無線充電）
拍攝測試（日間/夜間，會試埋無損變焦）
跑分（雷兔兔、androbench嗰啲）

如有其他歡迎提出。

有諗過加錢換amazfit智能手錶，不過最後都係揀咗手電筒。
求其影幾張手電筒啦。

圓筒形透明硬盒包裝，睇落唔差。
下方貼紙印有產品名稱同埋參數，
今年2月生產，都算幾新鮮。

入面有一本說明書、一條數據線、一條掛繩。
配件都算比較齊全。
充電線外觀同小米尿袋嘅充電線一樣。當然，因為都係紫米生產嘅產品。
手電筒係金屬外殼+白色噴漆，手感唔錯。

LED燈珠，感覺唔算大粒，但亮度真係好勁。

micro USB充電，另有USB輸出，可以當做尿袋咁用。
49蚊換翻嚟都幾抵。

開封儀式唔記得影相，不過冇所謂啦。
包裝正面只有一個金色嘅小米logo，成個盒都係黑色，
MIX2S嘅包裝同自家平價機完全係兩種風格。

背面底部印住參數。
香港賣嘅係國際版，背面全英文。

6+128中配版，今年4月生產，好新鮮。

打開包裝盒，都有雷軍嘅簽名，不過上面嘅句子變成英文。
小米logo下面寫住“innovation for everyone”。

攞開塊紙板，下面就有MIX 2S真機、充電頭同埋充電線。
充電頭係QC3.0。
MIX2S上面嘅保護膜印住英文介紹。

手機下面仲有一個配件盒。

裡面有一個手機殼、一本說明書、耳機轉接線同埋插卡針。
耳機轉接線我都差唔多用到慣，但都係唔太可以接受。
尤其係之前出嘅魅族15系列，放埋tapic engine都有位放獨立DAC芯片同耳機孔，
可見根本唔係必須去除耳機孔，消滅耳機孔只係為咗模仿apple。

跟機嘅手機殼只係一個普通硬殼，手感一般，難怪大陸嗰邊有唔少人建議買原裝硅膠殼。
不過作為一個跟機贈品，都算係咁啦。

配件全家福。

跟住就要講下部機嘅做工。
又到透明支架登場嘅時間啦。（雖然傷痕累累但都仲用得

）

背面嘅指紋識別模組睇落同陶瓷外殼一模一樣，做工好過小米啲平價機好多。
正面同背面都貼有保護膜防止機身刮花。

開著機，睇落都唔似有黃mon問題。

Type C接口入面嘅觸片冇斜埋一邊，而係喺正中間，又冇中伏。

正面除咗右下角嘅攝像頭之外就冇其他明顯開孔，好簡潔。

著mon嗰時可以見到屏佔比好高。
第一次買全面屏嘅機，呢個視覺效果都幾驚喜。

實際嘅邊框都好窄，唯一不足就係頂部邊框比左右兩邊略粗，導致視覺效果並非完美。
不過就令到機身更窄，更便於握持。

陶瓷外殼比起玻璃更加晶瑩剔透，好養眼。
不過如果雙攝可以置中會更加養眼。

......如果戴咗手機殼，遮住個指紋識別，應該會俾人當做iPhone X。

開箱部分就去到呢度，評測部分將會持續更新。如果有任何問題，歡迎提出，部分提問及解答會放置於#2，方便其他CHing參考。

大家就繼續期待啦

0

0

hk133

進階會員

Rank: 3 Rank: 3 Rank: 3

2^#

發表於 2018-5-4 12:59 | 只看該作者

本帖最後由 hk133 於 2018-5-11 11:30 編輯

評測部分：

開心小發現：

想幫MIX2S搵鏡頭玻璃貼？直接買iPhone X嘅鏡頭玻璃貼嚟用就得啦，啱啱好遮到兩個鏡頭。

MIX2S可以一邊收WiFi一邊放WiFi！

確認係JDI顯示屏。
前置鏡頭係OmniVision出品……
後置鏡頭係Sony IMX363+Samsung S5K3M3。

充電線/充電頭性能測試：

充電線，左邊係MIX2S跟機線，右邊係小米Max2跟機線。
可以見到MIX2S跟機線入面嘅觸點明顯少緊幾個，有偷工減料嘅嫌疑。（點擊查看大圖）

跟住就係測試一下充電線嘅損耗，測試工具包括小米16000mAh尿袋、WEB- U3SE測試器及炬為負載測試儀。
以2A電流進行測試。

尿袋直接輸出嘅性能表現，4.9V電壓。

經過小米Max2跟機線輸出，約4.63V電壓。

經過MIX2S跟機線輸出，約4.46V電壓。

MIX2S跟機線嘅表現居然不如平價機Max2嘅跟機線，都幾失望，而且明明MIX2S條線睇落仲粗啲。

測埋個跟機充電器啦。

充電器空載電壓5.09V。

5V/2A電流輸出，充電器電壓5.30V，即係有“線損補償”。

使用QC2.0激活器激活9V輸出，空載電壓9.23V。

9V/2A電流輸出，充電器電壓9.43V，都係有“線損補償”。

使用QC2.0激活器激活12V輸出，空載電壓12.35V。

12V/1.5A電流輸出（充電器標示最大輸出參數，實測超出1.5A會自動斷電），
充電器電壓12.47V，依然係有“線損補償”。

充電器冇偷工減料，輸出足，而且仲有“線損補償”，可以抵消線材嘅電壓損耗，抵讃。
不過呢個並唔係充電線偷工減料嘅理由。

手機充電測試：

用QC3.0充電頭充電，用時接近兩個鐘。前提係充到2x%之前都係邊充邊玩。

用Nokia DT-900無線充電板測試。呢個係Qi標準嘅充電器，理論上MIX2S應該兼容。

戴住跟機嘅硬殼，唔影響無線充電功能。
唔同角度都可以叉電。

非原廠出品、比較厚嘅手機殼又會唔會影響無線充電功能呢？

答案係......唔會。

不過如果手機背面有任何金屬物品（例如指環支架），無線充電就會用唔到。
至於充電效率......我呢塊nokia 5W功率，小米跟機嗰塊7.5W功率，基本上唔需要期待佢會叉得幾快，只係方便使用咋。
要高效率充電就用翻跟機嘅QC3.0充電器。

拍攝測試：

日間拍攝：

夜間拍攝：

虛化：

跑分：

Geekbench

雷兔兔

Androbench

3DMark

NFC：

暫時只試咗八達通app，用到。
不過要注意去安全中心——應用管理——權限——其他權限管理——權限管理入面嘅“NFC”睇下有冇允許八達通使用NFC功能。
預設好似係禁止八達通使用NFC，如果係咁會讀唔到八達通卡。

總結：
四千蚊左右嘅價格就玩到snapdragon S845，其實幾抵玩。性能表現佢絕對係目前最強an機之一，毋庸置疑。
雖然雙鏡頭嘅外觀明顯係學ipx，但考慮到陶瓷後蓋良品率低(你估好似玻璃咁易整咩)，都算係可以理解為為咗減少後蓋開孔而作出妥協。陶瓷後蓋嘅外觀比起目前主流嘅玻璃後蓋好睇唔少，都算係加分項。
MIX2S所用嘅JDI屏幕唔算高質，但至少符合價格預期，色彩表現唔差。我好彩冇抽中黃mon，都算係咁啦。而且係難得冇用OLED屏幕嘅旗艦機。
拍攝方面，MIX2S自動對焦速度好快，但手動對焦就出奇地慢，估計後續系統更新會修復呢個問題。整體拍攝表現幾好，總算可以擺脫“小米機=影相差”嘅既有印象，作為小米flagship當之無愧。
總括而言，呢部機改善咗MIX2於拍攝方面嘅短板，加入無線充電迎合市場趨勢，配合性能強勁嘅snapdragon S845，呢個價錢夠抵玩。

TOP

andy12001