4G真旗艦？POCO X3 Pro開箱評測

hk133

（全部圖片如果未有正常顯示，比如預覽圖太細，點擊即可查看原圖）

估唔到POCO今次出咗一部S860嘅機，售價仲係1999HKD起（6+128），CP值以港行嚟講應該係無敵。從spec同外觀上睇，POCO X3 Pro亦係繼POCO F1之後又一部可以插microSD嘅POCO旗艦機，冇採用紅米機外觀，亦係全膠殼，再加埋呢個震撼價，我覺得佢先算係POCO F1嘅後繼機型。

POCO X3 Pro，就咁睇同POCO X3 NFC冇乜分別，就連尺寸、重量完全一樣（究竟點先做到連重量都一樣？），但X3 Pro就改用Snapdragon 860處理器，ROM亦改用UFS 3.1。

不過X3 Pro又唔係全面升級，好似相機咁，反而就降咗級，原本POCO X3 NFC主攝係6400萬像素、感光元件尺寸為 1/1.73” 嘅SONY IMX682鏡頭，超廣角鏡頭就係1300萬像素，但POCO X3 Pro嘅主攝就降級做4800萬像素、感光元件尺寸為 1/2” 嘅鏡頭（仲冇講型號），超廣角鏡頭就得返800萬像素。

不過講落去之前，睇咗開箱先：



我就係官網首賣嗰時買嘅，平咗100蚊，又送一盒口罩。口罩得首賣當晚落單買先有，之後仲有冇得送就要睇下POCO點安排。
送嘅口罩係獨立包裝，BFE、PFE、VFE都有99%，可惜一盒得嗰10個，日日出街，計埋可能整污糟口罩要換過個，呢度只夠用一個禮拜。




口罩生產日期係2021年4月7日，保存期限係3年。最驚喜係，呢盒口罩係made in HK㗎。
但打開個盒我就明白點解會係made in HK而唔係……




呢個顏色（口罩&掛繩），如果係喺上面整好再運落嚟，可能過唔到上面嘅海關。
都有興趣想知佢哋到底搵咗邊間口罩廠幫佢哋整呢批口罩，呢個顏色我諗已經可以排除某啲口罩廠。
唔好諗多咗，黃黑配色係POCO品牌嘅主色調。




ASTM F2100 Level 3、EN 14683 Type II R，睇嚟呢個口罩防護率都幾好。同埋係無塵車間生產，應該可以放心使用。
我諗呢啲都係線索（搵係邊間口罩廠生產）

先將口罩擺埋一邊（各位CHing搵到係邊間口罩廠生產同我講聲），睇返部手機。



包裝盒出面嗰層係黑色，正面標明手機名稱POCO X3 Pro。




包裝盒側面有辱華（為）標語：with easy access to the Google apps you use most。
當然呢句標語係Google要求合作廠商要喺包裝盒上面印嘅，小米（POCO母公司）都只係跟規矩做，唔係特登串華為嘅（應該）。




包裝盒背面咩都冇，skip。
內盒成個都係黃色，打開之後上面放咗張歡迎卡，仲寫埋POCO嘅slogan “Everything you need, nothing you don’t.”
我唔需要MIUI嘅「內容推薦」（即係廣告）喎，可唔可以起碼整返個一鍵關閉俾我？




嗰張歡迎卡背面係黃色底+黑色POCO logo。
後面係配件盒。






個配件盒係由背面打開。
入面有貼紙、說明書、卡針、手機殼。
貼紙有幾種顏色配搭嘅POCO logo，仲有POCO嗰句slogan。




個手機殼好厚，保護效果應該幾好，但係係透明軟膠殼，用耐咗會變黃，所以我唔會用，用返自己買嘅其他手機殼。




手機就喺配件盒後面。




最底就係充電器+充電線。




要享受33W快速充電，就必須使用原裝充電線同充電器，因為呢個充電協議係小米私有嘅，而且充電線都係特製，用其他充電器/充電線代替就用唔到33W快速充電。（呢個係重點）




充電器，除咗支援小米私有33W快速充電協議之外，亦支援QuickCharge 3。六級能源效益（VI），理論上仲慳電過apple原裝5V/1A火牛（只係五級能效）。

終於又講到部手機啦。




又講下X3 Pro用嘅S860處理器，其實佢就係S855+。

一開始我仲以為S860同S870一樣，都係舊處理器嘅超頻版，既然S870係S865+嘅再超頻版，咁S860唔通係S855+嘅再超頻版？

原來係我太天真，原來S860係S855（冇+）嘅超頻版（即係就係S855+），連產品代號都同S855+一樣係SM-8150AC，甚至Qualcomm官網介紹都係將兩者放埋同一個頁面……就只係改過個名方便營銷！？

話雖如此，咁S860（S855+）嘅效能去到今時今日都仲未算落伍嘅。其中一個原因，我諗係因為S855（S860）同S865（S870）都係7nm製程，製程不變，差距自然有限？



同埋對比S765G以及天璣820，S860嘅效能都係好好多，antutu V9跑分達到57萬（S765G antutu V9 只有約37萬），CPU跑分S860贏30000+分，GPU跑分差距甚至有一倍，所以佢有排都未落伍。加埋依家芯片荒，善用舊芯片（順便清庫存）都係好事嚟嘅。
（跑分對比嘅對象係我之前買嘅LG Q92 5G，antutu版本係V9，唔可以同V8分數對比）




POCO X3 Pro出廠已經貼好咗膠mon貼，防指紋ok好，可以頂住先。
手機各處開孔有咩用途，我都唔知，官網同說明書都冇講。




手機底部嗰幾個窿我就估到係咩，由左至右係3.5mm耳機孔、Type C接口、microphone開孔同埋喇叭位。
個miceophone開孔仲要特登唔置中，方便你分清呢個唔係喇叭位。（都有可能只係想引發你嘅強迫症）
邊框係光面膠框，掂多幾下就黐晒啲指紋上去，真正嘅指紋收集器。




卡槽，三選二，起碼好過S21，冇得選




背面雖然係膠殼，但左右兩邊係磨砂質感，中間係光面。




背蓋上面嘅POCO logo雖然係大，但係都幾低調。磨砂部分有細字，寫明產地同產品型號。




開機會顯示POCO logo。




MIUI一如既往，仲係好多「推薦內容」，要逐個系統應用click入去，喺應用內嘅設定關閉。（默認開啟）

安全管家：設定最底關閉推薦內容，另外各個模塊入面都有單獨嘅「推薦內容」按鈕，要手動關閉。

檔案管理：左上角選單--設定--關於，有「推薦內容」按鈕可以關閉。

個性主題：第一次進入會顯示「條款及私隱」，確認按鈕上邊有個「個人化推薦」選項，記得關閉。然後入去應用內設定，再關閉埋「廣告服務」。

音樂：左上角選單--設定--更多進階設定，碌落最底，關閉「資訊廣告推薦」。「線上內容服務」都可以關閉，但個人覺得好用過youtube music，可以背景播放，留低都冇問題。

下載管理：第一次進入會要求你同意佢收集「必要的個人訊息」，但其實選擇「取消」都可以正常使用，但每次重新打開都要選擇取消，好麻煩。入去之後，點擊右上角選單，選擇「設定」，關閉「資源推薦」。

其實呢啲「內容推薦」都係小事，MIUI系統內置app「時鐘」同埋「掃一掃」就值得注意。

「時鐘」第一次打開會詢問你提供聯網權限，可以選擇「不同意」&「不再提醒」，咁就可以正常使用。但我好想知一個時鐘app點解要聯網，系統都可以同步返實時網絡時間，一般而言呢個時鐘app根本冇需要聯網。

「掃一掃」第一次進入時會提示「掃一掃在使用過程中會取得你的拍照資料以提供配套服務。請妥善保護好你的個人資訊，請勿拍攝含有你個人資訊的任何內容。」一開始已經講明會收集你嘅資料。掃QR Code同掃文檔功能唔係得佢先有，如非必要，建議用其他app代替佢。

標榜保護私隱嘅MIUI 12，自己反而唔係咁重視用家嘅私隱，系統內置apps有咁多「內容推薦」、「個人化推薦」，有一種「只許州官放火，不許百姓點燈」嘅feel。

關閉呢啲採集個人資訊嚟向你推送廣告嘅「內容推薦」，需要用家深入每個系統內置apps嘅角落去發掘「隱藏開關」，好難相信MIUI真係有意保障用家私隱，種種「保障私隱」嘅功能似乎都只係一種障眼法。

如果MIUI有心保障用家私隱，就應該盡量減少每個apps需要索取嘅授權同權限，整一個易於發現同關閉嘅統一開關，俾用家自行決定係咪接受「個人化廣告」。你要投放廣告唔係大問題，但要收集用家嘅資料做「個人化廣告」就應該同用家講清楚，唔好遮遮掩掩。


* * * * * * * * *

MIUI內置嘅功能都好豐富，雙擊喚醒/熄屏，抬起喚醒都有齊，解鎖就有側面指紋識別。另外仲有三指下滑截圖同遊戲模式。

Z軸線性摩打同雙喇叭都有，呢個價位嘅港行機嚟講實屬難得，實際用落嘅效果都唔錯。

電量方面，一日一充應該冇問題，充電速度就參考下面：





用原廠跟機充電器同充電線，由15%到充滿電需要大約2小時。
睇返記錄，就會發現POCO X3 Pro實際係得15-30%嗰時先維持到最大功率充電，之後就開始放慢速度，到50%之後充電電流一直維持一個較低嘅水平。15%真男人？起碼唔係得3秒，都算係好消息嚟嘅。



2021/04/27 update：
趁天氣涼返啲，重測一次，並且搵番個通風非常良好嘅環境再測試。今次由11%開始充電，用咗大約1.5小時充滿。今次嘅數據非常堅挺，充電去到90%電流依然有接近4000mA水平！呢個表現好掂，仲好過我部Xperia 5 II。
恭喜POCO X3 Pro成功擺脫「15%真男人」稱號！


個mon色水其實都ok，係有啲黃，但係起碼冇甩色feel，啲顏色都幾鮮艷，睇落冇乜問題，已經算係幾好㗎啦。（呢個CP值嚟講）當然同我部罪大5 II 比就差幾遠啦……但都要諗下大家價錢都係差好遠。同 i窿 SE2 比就好少少，大家都係LCD，差距冇頭先同OLED比咁大（但都係幾大下）。

仲未計X3 Pro俾埋你120Hz高刷新率 + 240Hz觸控採樣率，有S860加持，120Hz效果好流暢好順滑，加埋呢個好多平價機甚至中階機都冇得同佢打。係喎，SE2都冇120Hz mon，POCO贏咗。




然後新機就當然要講下個新系統啦，POCO X3 Pro一到手已經收到第一個update（12.0.4），然後今日我又收到另一個update，就係上圖嘅12.0.6，話咁快就更新到最新嘅Android安全性更新，旗艦處理器先有咁嘅待遇，Snapdragon 7系U bye bye。




最後就講下個相機。
雖則相機嘅spec對比X3 NFC係縮咗水，重溫一下：
原本POCO X3 NFC主攝係6400萬像素、感光元件尺寸為 1/1.73” 嘅SONY IMX682鏡頭，超廣角鏡頭就係1300萬像素，但POCO X3 Pro嘅主攝就降級做4800萬像素、感光元件尺寸為 1/2” 嘅鏡頭（仲冇講型號），超廣角鏡頭就得返800萬像素。

但唔好唔記得，S860嘅ISP（負責處理相機數據嘅元件）比起S732G好好多，如果加埋軟件算法加成，X3 Pro嘅成像質量應該起碼唔會差過X3 NFC。

實際效果就睇下實拍相片啦。
對比對象係Xperia 5 II 以及 iPhone SE 2020，拍攝時間係黃昏時段，以此測試相機嘅弱光表現同埋暗部細節處理。由於懶癌發作，所以只係影咗兩組相片，不過我諗都夠㗎啦。
（點擊圖片查看大圖，同埋入到去可以睇到相片信息，Xperia 5 II 嘅相片有標註型號）

第一組：





第二組：





觀感上POCO X3 Pro影出嚟嘅相都好ok，唔聞相嘅話就冇問題，其實比預期好唔少。唯一問題係冇OIS，但呢個相機表現喺大多數使用場景之下都係夠用。


簡單總結一下：

hardware「明升暗降」？其實總體而言都係有好大提升，相機少少閹割「感知不強」。
「保護私隱」？整返個統一關閉系統內置apps「個人化推薦」嘅開關先好同我講呢啲。但依家都唔係話冇得關閉嘅，係麻煩好多咁啫，但起碼都叫做用得。
使用體驗，幾正，基本冇缺點。
「4G真旗艦」？確實係。
（點解我叫佢做「4G真旗艦」？因為比佢更強嘅旗艦機都用到5G，係5G旗艦。 ）

推唔推薦買呢部機？接受到佢關閉廣告/推薦內容咁麻煩嘅話，推薦。
要買嘅話，最好加多300買 8+256 版本，RAM呢啲嘢多多益善，咁少差價就唔好慳啦。

hk133

部機太厚身
l0001 發表於 2021-4-27 02:13

    咁大粒電池、咁平部機，唔厚先奇。

hkmar

鏡頭係SONY IMX582

hk133

鏡頭係SONY IMX582
hkmar 發表於 2021-4-27 03:13

    佢冇喺官網寫明嘅話，佢可以隨時改用其他spec一樣嘅CMOS。

hkmar

佢冇喺官網寫明嘅話，佢可以隨時改用其他spec一樣嘅CMOS。
hk133 發表於 2021-4-27 03:17

佢個官網寫得好簡單 , 剛開始仲一路寫用AMOLED添 , 過咗好多日先刪除番 , 睇外國網介紹有收音機 , 問香港官方答我係無既 , 但買咗番嚟發現實際係有的 .

R大魔王

回覆 1# hk133


呢位師兄，開箱評測比各大網站評測仲要長細，
我都好懷疑人生，點解咁專業，專業，專業的開箱評測，

睇完評測我都想入部POCO X3 Pro玩下，哈哈

eddy

有無老人mode?

hkmix

部機太厚身
l0001 發表於 2021-4-27 02:13

可能有3.5MM 耳機位掛.....但我覺得還可接受.