[開箱] Logitech Craft 非專業開箱

Takagi_Akito

眼見個個師兄都係開機械鍵盤, 唔多見有介紹呢個, 咁就等小第嚟開.

我自己一直用開手提電腦, 習慣用薄/ 矮身鍵, 公司嗰啲十幾廿蚊嘅貨垃圾貨搞到我成日打錯字,㩒錯隔離, 又要考打字速度, 唔夠快要照肺. 出面啲機械鍵盤啲掣又鬼死咁高, 我自己完全唔就手, 咁啱羅記出左個咁貴號稱 Craft (傑作??) 嘅, 喺舖頭試過手感好啱自己, 內心掙扎完後, 就喺肥花收個全新嘅番嚟玩.

網址呢度: https://www.logitech.com/zh-hk/product/craft
規格: http://support.logitech.com/zh_hk/product/craft/specs

外盒封面一貫 Logitech 設計:


開盒即刻見到主體, 有背光, 仲可校光暗, 但我公司用, 怕且冇機會試 (開着都冇用 )
上面銀灰色嘅係金屬殼包住嘅電池, , 下面鍵盤就係磨沙面膠殼.


下面就得Unify接收器, USB-C充電線, 同一張簡介


Craft 本內置電池唔拆得, 要注意, 好唔好就見仁見智.... 因為連埋電池, 個鍵盤重近一公斤, 加上咁大個, 拎住出街真係唔方便 (不過我諗冇乜人會拎咁大個出行用... ) 另一點係佢冇得校高度, 呢可能好多用家會唔慣, 唔鐘意, 但我習𢠼放平所以佢本身嘅輕微斜度啱晒我.


有用開羅記中,高級藍牙嘅師兄們應該知佢啲產品可以駁2,3部電腦/電話等, 呢個當然唔例外. Win, Mac, Android 通食.


先駁自己部電話玩吓


呢個鍵盤嘅賣點就喺呢舊野度, 佢會因唔同軟件有同功能


當然要配合佢個軟件, 所以 Linux 玩家可以死心喇...
根據每個軟件, 除左基本設定, 亦可自定



Chorme/ FF / Edge 嘅話, 轉嗰粒掣就可以轉分頁.


到用Excel , 會變左放大縮細同轉頁, (掂吓個粒掣就會轉用途)


用左一日後, 我自己覺得大致好好, 啲鍵㩒起嚟比平日買到嘅Logitech 硬啲, 薄膜式嘅話佢回彈算唔錯, 鍵嘅大細我己就啱晒, 但手細啲嘅人可能會得大左啲.

當然咁貴嘅野一樣有缺點: 真係重左啲, 仲有就係唔換得𩂬, 我寧願佢食4粒AAA 好過. 中文字同英文字一樣大,仲拍咁埋, 初初望落會覺得好亂, 最後一樣我真係有啲頂唔順, 啲鍵帽黐油同漬, 可能本身令面關係... 結果我要成日抺.

最後一幅小弟嘅全家褔

josephchoi

隻野係靚仔既
同埋係用剪刀腳結構, 所以手感會比一般薄膜鍵盤好

不過我玩過機械鍵盤番唔到轉頭
回應你嗰句"機械鍵盤啲掣又鬼死咁高", 你講得無錯, 我初初轉用機械鍵盤都好唔慣呢一點, 後果加左個手托就解決問題
不過Cherry 黎緊會出low profile 機械軸, 應該今年內會有矮d既機械鍵盤推出

btw, 好奇一問, 你番咩工要考打字速度