henrietta

真係好詳細，好多圖又清

sapphire4890

回覆 21# henrietta
感謝師兄賞析

(Sent from HKEPC iPhone app)

chen_qi02

幾點意見畀樓主。
(1) 相 quality 高可能係好事, 但都要睇下張相內容係乜野, 例如第一張, 手震左既 Red MR 場地, 放到 5000x2813 原汁原味係為乜呢? 你話有個靚模係到都話吖~
另外有好多張 PPT SLIDE 根本縮細幾倍都睇到清清楚楚...
(2) 張相 file size 大, 唔止令 BROWSER crash, 仲令人等唔耐煩, 而且你有無考慮過用手機上網既人, 可能一個月得幾百 MB data, 隨時一 load 你篇野就爆...
(3) 562379813 同 The_one 呢兩個會員好日都唔出一句聲, 一出聲就係幫推樓主個 post, 又真係好巧合! 坦白說我看左好多個其他 POST 又唔覺得呢篇特別詳細 (除左某 D 相真係夠 DETAIL 之外)

sapphire4890

回覆 23# chen_qi02
感謝師兄你既意見，回應番師兄既疑惑⋯⋯

圖片影得清都係想其他讀者有更優質既視覺享受姐 我果陣零晨整，自己upload完先知咁恐怖 至於browser crash非本人控制範圍內 有人有問題亦有人無問題⋯⋯因為要upload過批相，我部機咁岩死左 所以整唔到批縮圖
會員果part唔知點回應你 淨如寫report果班師兄都未必係成日留言果班，話唔定係篇文又真係吸引到佢地呢

始終EPC寫咁長小弟都係第一次，而且有其他有join既會員都認同篇文既觀賞性⋯⋯小弟曾寫過開箱文/分享文章同呢篇真係差好遠 起碼我要花時間係介紹番個活動入面既內容/產品令我驚喜既部分

無錯，除左相清之外，可能有其他人覺得都係無乜特別，可能你留意唔到啦，我係保留番自己寫評測既風格，可以話係有果句講果句⋯⋯我無可能詳細到逐頁powerpoint都講嫁嘛 會悶親人，我認為自己做到一個平衡，所以自己就無再寫產品唔起眼既部分落去⋯
當然寫依類活動我認為相清有助令讀者雙重享受（文字及視覺享受）拍埋條LN2片，令更多讀者認為我既介紹並非單一文字同圖片，插入適當既視覺效果亦有助提起其他讀者既興趣
要先有興趣，然後再深入了解同研究產品既詳盡
唔知師兄是否同意了

活動時間都完結，即使我部機起死回生都做唔到任何野啦 唯有下次改善

(Sent from HKEPC iPhone app)

Mini-CaCtuS

其實樓主都好俾心機架啦，各位ching都俾d鼓勵吧！
至於解決browser crash方面，用chrome都只係將圖load到咁上下就cut左佢，睇哂先再refresh page,由果到繼續load起到咁上下再重複以上動作黎睇哂佢lor.
小弟估呢位樓主同小弟一樣都落左唔少心機去整架啦，小弟都表示支持，大家咪將就下支持支持吧！ :D
至少upload都應該用左樓主唔少時間吧

sapphire4890

回覆 25# Mini-CaCtuS
果然只有寫文既會員至會明白
其實寫長少少，加多啲相都係一份心意 瀏覽器崩唔係我特制既惡作劇
「一種米養百種人」，無可能要求人人理解/體諒
但至少篇文章係我一生以來最用心既一篇（年紀尚淺既問題吧）
但我深信文章既質量亦不比其他年紀稍大/經驗豐富既師兄差 最終都係希望更多讀者觀賞到小弟篇文章
最後，感謝師兄鼓勵
當然，今次問題，日後一定會改善既！
感謝各位師兄提出客觀既意見供小弟作參考
我會好好努力 衷心感謝

(Sent from HKEPC iPhone app)

david_qawsed

thank you for your sharing

sapphire4890

回覆 27# david_qawsed
Thank you for your comment

(Sent from HKEPC iPhone app)

Mini-CaCtuS

小弟幫樓主整左個純文字版本,如果因為browser crash睇唔到圖ge師兄都可以睇住字先~ 總共2831字,的確比小弟果篇9000幾字精簡好多...   

以下為樓主的分享純文字版本:
小弟僅是一名中五學生，但早已經對電腦硬件充滿熱誠，喺EPC時常談論依方面。欣聞ASUS舉辦交流活動，作為狂熱分子既我，又點會放過是次的機會  
在早前(上星期六)，正是ASUS活動之日‧‧‧筆者卻遇上學校活動，席不暇暖，換完件衫就急急腳出門口(忘記帶銀包)，因而遲到  
廢話不說，直入正題  

選址位於銅鑼灣的皇室堡...Red Mr.極有Party/吧的氣氛  


無錯,塊路牌寫住EXIT...簽完個名之後以為EPC個STAFF趕我走添  
不過一入到去就  內心獨白:乜又係阿JOHN你   

內容已經講到去超頻果part‧‧‧從圖中所見，其實ASUS既bios已經進化到好simple既地步，CPU FANSPEED都已經可以透過DRAG去調教，而且亦有額外四種既FAN SPEED MODE，適合貪方便既用家。與傳統藍白既BIOS介面完全唔同，即使用緊Asrock(以前的子公司，算得上叫近親)亦無這個功能同設計精美。可見華碩設計格外用心，致力簡化BIOS，迎合現今簡約風格的市場  

如圖下所見，各類型的硬件型號及狀況一目了然，兼且配合OC PANEL進行REMOTE使用亦能提供用家更便利的超頻方法(軟硬件兼備)


是次的示範底板係ASUS MAXIMUS VII HERO，暫時係眾多Z97新型號底板之中的旗艦，因此超頻方面亦是小菜一碟  

然後到5-way Optimization...上一代底板只有4-way Optimization，TPU提升效能，EPU節能，智能風扇，及DIGI供電設計等四方面
而今代新增Turbo App(都係for 超頻  )
古語有云:『一鍵5-way 附超頻，打機奉旨無頭痕』  (老作嫁咋  )



之後，去到系統storage方面，明顯就係design for SSD  
新既SATA Express快過SATA 3.0唔少...理論上，速度快近34.4%，經常SSD厭唔夠快既朋友可以考慮換Z97了  
跳到音質方面，ASUS特別將audio既部分放喺主機板既corner，與其他品牌唔同的喺可以降低雜訊，其他電流既干擾，令用家無論打機定睇戲定聽歌都可以享受音效既完美演繹  

再去到一個嶄新既設計，無線充電‧‧‧相信唔少人都會覺得:車，有咩咁巴閉
但我就唔係好認同，始終底板包含無線充電，其他品牌我就暫時見唔到出現過 所以對我黎講，無線充電個印象都特別深(加上自己最近既學校project都曾講述過依類功能，估唔到係依次活動遇見  )



然後，有塊Z97板傳左過黎  等哥哥睇過先‧‧‧‧‧‧十二相供電，即係Z97 PRO啦  ，PCB都頗為精細，最重要的喺：金光閃閃，閃到七彩  

sound chips&電容一睇都知係專用音響，唔知係咪咁既緣故，鵝立雞群既audio part都同其他parts好似楚河漢界咁，勢不兩立  

Support埋M.2

望番上去‧‧‧依，Wifi-Go喎  用手機控制電腦，有時訓係床道偷下賴都得嘛  

再望上少少先...made in CHINA，不要緊吧。我們愛中國  _ _ 都要用  

塊底板加入大量senor監控溫度，方便用家檢查散熱問題

最得意既技術應該係依個  就係將風扇倒番轉黎吹───自動除塵功能
我唔係好清楚啲塵吹翻入機箱，底板會唔會積塵  算係暫時我搵到既敗筆之處  


到底點解底板會較其他底板涼7度  原因喺因為TUF既散熱板有效將hardware既熱量傳遞，加上鈦合金電容，相信十分耐用  



終於到ROG既介紹，先進行少少簡介，ROG──Republic of Gamers，顧名思義主要針對遊戲用家及超頻發燒友

所以首先就係KEYBOT，JOHN哥講過:以後TAOBAO賣家可以進行自動回覆，SET好個KEY之後一撳個掣就唔洗自己打字，例如:親，價錢已經很便宜  遊戲玩家亦可以SET一連串操作，我覺得某程度上已經開始replace緊gaming keyboard  

電壓供應穩定喺5V之間，叉tablet都唔驚  

原本筆者被JOHN哥抓出去倒LN2(液態氮,即liquid nitrogen)，有位CHING主動上陣，筆者唯有讓佢做先鋒  

倒落去果下，令我唸起義海豪情既歌詞‧‧‧『漫天的炮火混亂地湧起』  

因為涉及超頻關系，OC PANEL被脫光光  

之後到筆者出去玩  

學化學既我，未曾試過玩啲咁激既野，結果倒瀉左唔少  據JOHN哥透露，我已經倒左佢幾十蚊  

倒左太多，結果要出動埋火槍  最後都上唔到5.8Ghz，有點可惜  

附LN2倒手板既影片，我果刻淨係識講好正，好正  因為本身就知LN2溫度只有-196度，而且wiki都列明:人體如果在毫無保護措施的情況之下接觸，皮膚會有嚴重凍傷的危險‧‧‧令我完全對LN2既認知刮目相看
http://www.youtube.com/watch?v=iQCtQgm-MC8&feature=youtu.be

________________________________________


之後去到交流會部分，簡單黎講，有得打機，有得食野，仲有野睇。依段時間喺筆者填肚既機會  (因為SKIP左LUNCH  )
享餐果part，只可以透露一點:大家食到渣都無得淨，除左爆谷之外  但食物食完後，個爐依然無熄，感覺上有啲危險，建議HKEPC既STAFF下次可以注意下  

遊戲時間  『頭搖又尾擺，飄移境界，不想醒覺只想感覺被放大』  
筆者玩過一次，撞到甩頭甩骨  可能無賽車果種觸角吧，唯有放下controller睇其他CHING表演  



轉去Battle Field 4戰場試玩，ASUS底板有個算係cheat既function，就係強化遊戲入面聲音既來源，細膩既表現令你FEEL到敵人係邊個方向  當然聽唔到就無計啦  第一次操作，亂行一通就死左  紅色果個圈圈就係方便你"感受"敵人既存在  

睇其他人玩亦係一種樂趣  

千鈞一髮之際，拍攝到ASUS顯示卡爆格仔情況  


正所謂:『眾人皆醉我獨醒』  筆者襯各位師兄樂在其中既時候，走左去睇底板(唔係因為我打機唔掂  只不過係依類遊戲唔岩我玩  )

在場的側邊示範機一號

示範機二號

兩部機最大分別喺一張有獨立顯示卡(GTX760 ROG)，另一部只喺HD4600
底板方面，一號機喺Z97-DELUXE(包含NFC無線充電)，二號機喺MAXIMUS VII GENE‧‧‧
ROG總是格外吸引  果種高尚既黑化PCB，令筆者一見鐘情  


當然人不可能事事要求盡善盡美，大部分時間都需要接受現實  所以正常的Z97已經滿足到筆者的需求，因此同ROG背道而馳  

Z97由細開始數起...先黎第一位喺ITX  

喂，你會唔會細份左啲呀  大iPhone少少咋  不過原來你叫Z97I-PLUS  

sorry，得罪你添  原來你喺細小玲瓏，I/O port都好夠用嫁喎  

第二塊到Z97-K...依隻就無咩值得講  因為係ATX入面既入門級version

第三塊到Z97 Sabertooth mark 1  又係好型既款，16相供電，睇黎唔係睇個殼  

I/O port有個框框，似乎喺用黎美化個I/O PORT高低問題


估唔到有埋thunderbolt  岩晒用MACBOOK既用家將資料PC同MACBOOK DATA互換，慳番隻USB手指


第四塊就係Z97 PRO(一開始我拎上手果塊)，有WIFI同12相供電喺其一大特色

第五塊，亦係最貴果塊BOSS  Z97-DELUXE，雖然示範機一號係用緊依塊，但亦有另一塊供眾人研究研究
無線charger終於現真身  


之後既時間都係同ASUS STAFF/CHING吹水  同埋交流心得，之後就依依不捨咁翻屋企  紀念品都幾豐富，有防毒軟件，門牌，滑鼠墊同埋紀念咭


反思:
今次活動氣氛幾有集思廣益既氣氛，特別係JOHN話米有10KG嫁咩  之外引起眾人熱論  雖然今次活動跟NVIDIA選址都一模一樣，喺RED MR.舉行，可謂立錐之地，但仍無阻會員間既交流。餐飲方面，個人感覺上算唔錯  除左有得玩，有得食，仲有得睇‧‧‧活動安排得相當順利

個人感受:
是次ASUS活動令筆者體會到ASUS品牌，喺與時並進，加入大量其他品牌無的特點。與品牌口號切合:『追尋無與倫比』，的確令我體會到ASUS品牌的誠意，留意用家的口味，習慣、嚐好等而作出細節上既改善，亦係最難能可貴之處。筆者於HKEPC的砌機版經常提供意見，經過依次活動，我更確信ASUS品牌的設計同品質方面。我曾經用過ASUS的主機板(P5N7A)，明白到"十年人事幾番新"。早前的設計與近代的主機板設計完全不同，可謂切底顛覆了主機板的設計。包含:針對電競的KEYBOT，五路優化(特別喺Turbo App同CPU performance既調教)，簡潔易用的BIOS，專業既音效，智能節能等等‧‧‧‧‧‧‧‧‧
都帶比用家更高層次既享受同驚喜，無論係超頻玩家，遊戲玩家，一般娛樂文書都可以應付。唯獨喺仲有兩個更高系列既ROG主機板尚未推出市場，未能提供消費者更多既選擇。

最後，感謝HKEPC同ASUS共同舉辦是次活動，十分精彩和難忘，筆者才十七歲。有幸參與是次活動，實在感激不盡！期望未有會舉辦更多同類型的活動讓更多會員了解和集思廣益。
囿於學識，筆者尚未達到專業人士水平，是次體驗會分享或有不足之處，其感受只是個人的愚見，還望各位師兄可不吝賜教，分享心得！多謝收看

Mini-CaCtuS

我岩岩慢慢睇,係咁Crash 忍唔住整呢個版本黎詳睇