新手超頻參考分享(超新星入門救星—Intel LGA775 篇)

寫在前之無聊序(有為人士請無視之)
首先,我一定要強調,本人都係一件新仔……你可以話我無聊搵野做,亦可以估我想出風頭獻醜丟架,但我作為一件新仔,深明新仔無從入手,求助無門,尤其係分分鐘仲未知自己想要咩、做緊D咩之苦況。我希望可以寫一篇可讀性高、實用兼親民既非技術性心得分享,幫下同為新人既入門初學者。就當係前人種樹、後人乘涼,積返D陰德………
由於我都係新人,以下內容我無辦法確保 100% 正確。如有錯漏,請高手們指點更正。

入門最 basic—你超黎做咩先?
拿唔係廢話黎架!唔好拿拿林同我 skip 左佢……皆因好多新仔查實連超黎做咩都唔知,仲以為有 so 執咁好,人去我又去……超頻大抵可以分兩種原因:

1.        實用派: 以唔增加額外開銷下,盡力超頻以提升效能。相對於玩樂派,由於budget 所限,超既幅度唔會多,唔駛講咩超 4G 果味喇。但係咁勝在實而不華,唔會無端端駛一大筆錢換下呢樣整下果樣。依家好多新人都當實用派冇到,因為佢地唔明自己查實想要乜,見人地 4G 我又要 4G……

2.        玩樂派: 並非以實際利益最大化為目標,而係以一種尋開心、玩玩具既方式挑戰自己、挑戰極限。玩具,當然要敗家燒銀紙啦!玩 4G 甚至高於 4G,代價就係要買2倍普通貨品價錢以上既 hardware,兼且 1000 以上既散熱設備(保證只會有多,唔會洗少)。

超頻前,請新手們先諗諗,自己係邊一派,定好方向至行動,唔好行咁多冤枉路,跟住以後至發覺自己戇居………

你真係適合超頻?really?
以下有3類人唔適合超頻,凡中 point 者我勸你及早放棄,無謂浪費時間:
1.        唔鍾意睇字刨文,最怕坐定定煲 post 者
2.        愛飯來張口,唔願接受挑戰者
3.        經受唔到挫折,超完 boot 唔起機會有心理陰影者

你仲肯睇埋落黎,Good!歡迎加入超頻新人行列。以上者,貌似係超頻科 U 者……

心態、EQ、AQ,缺一不可!
超頻係漫長而又成效唔明顯既艱辛歷程。所謂萬事起頭難,作為過來人,有3點誠心忠告:
1.        切忌眼高手低,未學行先學走。唔好見人地 4G,我唔得牙,咁 3.6G 點都要得啦!………你連個概念都未搞得掂,唔好一開始就整野挫敗過自己……
2.        新仔學野,態度應虛心。唔好當正自己係大爺,人地老馮要幫你、答你。如果冇人 re 你,你第一時間應該 check 下你個 post,問題清唔清楚,問得誠唔誠懇。要記住,人地答你係人情,唔答你係道理。
仲有,人地教你野,切忌懶醒駁咀,話人地亂講。都係果句,反省左自己先啦
3.        初初超頻容易成日搞鑊粥,唔知點算好。我建議初學者最好首先做好 backup,個心定好多(不過通常都唔需要用到個 backup)。
另外,唔好諗住一個禮拜就搞掂有機用咁順灘。通常處男/女第一次梗係多阻滯,超開既人 so easy,就新仔好鬼黑,衰好多自己唔知既野。你最好有心理準備,隨時1個月消耗戰。


鍾意 skip 以上既就隨便啦,不過你第日比人串唔好話「我有睇過啊陳個 post」喎


準備篇:
兄弟!同我納架生!
工欲善其事,必先利其器。響你要準備一隻腳差入黎之前,請先 open browser,進入 google(你話「我要貓科類」,都得,隨你),並鍵入以下文字尋找工具:
1.        穩定性測試工具:
CPU: orthos/prime95/intel burn test/LinX/OCCT
RAM: memtest(win)/memtest 86+(DOS)
VGA: atitool/furmark
2.        溫度監測工具:
Everest/core temp/
3.        狀態檢視工具:
cpuid/gpuid

學生哥,好咪書羅!咪剩係掛住個 clock
請煲好你既 manual。冇錯,你可能好多都睇唔明,但係你一定要堅持認真睇晒佢,最少你一定要熟知你塊板有幾多項同超頻有關既 setting,setting 名大概係咩。至於果D setting 有咩用,下面我會嘗試簡單指出。
唔好忘記,超頻落 BIOS 係最方便既。如果連 manual 都未睇好,甚至有 BIOS 恐懼症,咁你都好難成功超到頻………

[ 本帖最後由 helenchan 於 2009-8-19 12:09 編輯 ]

求知篇:
睇怕我呢個 post 唯一有價值既就得呢個………我會以 Asus、Gigabyte、MSI 主流 P45 板既 setting 做個例子,嘗試說明各項目響超頻時既用途。由於係新手 post,所以有部分我認為唔適合新手既,比較複雜既項目我會 skip 左冇講。至於佢本身有咩用架?呢個………我唔夠功力三言兩語解釋,而且呢個已經超出左「新手」範圍,有興趣既可以 google 一下,鬼佬有好多相關既技術性文章。不過佢地解釋一個 term 既 post 仲長過我呢度加埋………

(提示1: 並非所有板都有齊以下選項,有D板會多D,有D又會唔見左 D。需要留意返 manual 同 BIOS 核對)
(提示2: Giga 某部分板有部分超頻項目需要入 BIOS 後禁 Ctrl+F1 至出現)

FSB Frequency/CPU Host Frequency/CPU FSB Frequency
項目: CPU 外頻
建議數值: 越多越好………不過唔建議一開始定過高。可以先從超 10% 作起點,再慢慢逐 500MHz 提高
關聯數值: 冇
備註: 冇

Ratio CMOS setting/CPU clock ratio
項目: CPU 倍頻
建議數值: 一般黎講新手可以暫時唔改動。當想嘗試 CPU 外頻極限時,就可以將倍頻數值降低,以確認會唔會撞 FSB wall
關聯數值: 冇
備註: 有時需要關左個 EIST 至可以 set 到呢個項目

DRAM frequency/Memory frequency/FSB/DRAM ratio
項目: RAM 頻率
建議數值: 先假設各位看官都用緊最少 800 既 ram,冇人用 667 先啦………新手初試超頻,宜按步就班,先齋試超 CPU 一樣,ram 唔好超住。為左達到呢個目的,咁就需要除頻,即係將 CPU:RAM 比率定響 1:1 ,或者甚至降 ram 頻率,以撇除 ram 對超頻穩定度既影響。
你可以響呢個選項度見到例如 XX:XX,或者直接一個 frequency 顯示出黎。目標係 set 低佢個 frequency,最好低於 800,大過亦要揀個最小值。試左 CPU 穩定喇,至慢慢上調 ram frequency。
關聯數值: CPU 外頻。當外頻變動,呢個數亦按規律變動
備註: 查實 ram 仲有 CL 值等既延遲值可以 set,不過我 skip。有興趣既不妨 google 查看。

PCIE frequency
項目: PCI-E 頻率
建議數值: 要視乎你用緊咩 display card(假設你只用一張………) 。高階 display card 有時會影響超頻表現。如果你用緊貴價卡,可能需要調高頻率。呢個數 standard 100,建議幅度響 100~105 之間,太高有可能會燒卡,而且過高亦無助超頻。
備註: MSI P45 板冇呢個選項,佢個客服解釋話係晶片組本身限制喎……

Advanced control
項目: 基本上有四項:
CPU clock drive/CPU amplitude control
PCIE clock drive/PCIE amplitude control
CPU CLK skew/CPU clock skew
MCH CLK skew/MCH clock skew
建議數值:好視乎個別 U同板既體質。一般黎講,PCIE果項除非你超 display card,否則可以不理。CPU amplitude control較大比較好,可以試 900同 1000,CPU CLK skew同 MCH CLK skew可以試由 100~400之間既幅度。
關聯數值:冇。不過有個同樣道理既項目,DRAM CLK reference,我就唔再重複講多次喇。
備註:上述其實新手可能用唔著……不過為滿足 4G人,就放埋落黎提下。上述數值對於超頻表現影響較細,而且需要好有心機逐個逐個撞黎試,要求耐性。我覺得新手都係 auto比較好。當你想再上一層樓,或者超好後想降低D電壓時,至考慮改下佢。

CPU voltage
項目:電壓……係人都知啦,仲講!
建議數值:呢個要長篇大論喇。首先,一講電壓,成日就見人地話縮肛,咁究竟縮肛係乜黎呢?縮肛最最最~~~~簡單黎講,就係粒U被電到電子遊離,搞到粒U體質變差左。以前某某電壓就上到,家陣要再比高D,甚至狂電都上唔返。
拿唔好驚住!首先,呢個情況響 Intel 45nm制程U較易發生,65nm U冇咁易發生既;又,兩者既默認電壓值唔同。Q9550上1.55V比較危,但係 Q6600就唔係咁怕。
幅度黎講,我建議初試超頻 65nm U唔多於 1.6V,45nm U唔多於 1.45V,基本上都唔需要太擔心。如果擔心既話,超好左之後可以試下降壓,45nm降到落 1.4V就非常夠。咩話?你仲係驚?得!你唔超咁多咪得羅………魚與熊掌自己揀
關聯數值: CPU GTL reference
備註:我個人建議初初超果陣可以一口氣上高D都唔怕,等你超好之後至再慢慢試降落黎。咁比較容易入手DD。

CPU PLL voltage
項目:我都唔知中文叫咩……
建議數值:一般由standard 1.5~1.55對新手黎講已經足夠。玩到 1.6開始小心縮肛,而且呢個數過高反而會令超頻穩定度轉差
關聯數值: CPU voltage
備註:留意呢個數有可能會隨 CPU voltage變動(asus板) ,最好自己手動 set 1.5,唔好比佢 auto

FSB termination voltage/CPU termination/VTT FSB voltage
項目:一般都叫慣 vtt
建議數值:default 1.1~1.36,太高小心縮肛。
關聯數值: MCH GTL reference
備註:呢個數比較容易搞,建議新手勇於嘗試下呢個

DRAM voltage
項目: ram電壓羅………
建議數值: default 1.8/1.9~2.2V,太高留意溫度頂唔頂得住
關聯數值: DRAM reference voltage
備註:有時唔一定狂比電就得。如果響超 ram時真係上唔到,咁可能要較大個 CL值……題外話………

NB voltage/MCH voltage
項目:北橋電壓
建議數值: default 1.1~1.45V,同樣小心溫度過高。
關聯數值:冇
備註:當4核上較高外頻時較容易需要到加佢,不過齋加佢通常又唔多夠,仲要睇埋其他野

SB voltage
項目:南橋電壓
建議數值: 1.1~1.3V,通常因為南橋舊散熱器唔多掂,加太多驚熱爆,然後返黎噴我咁就唔好啦………
關聯數值:冇
備註:都係果句,睇住唔好加太狼呀,而且呢項加得狼對超頻都唔係太有作用

CPU GTL reference
項目:又唔知叫咩喇……
建議數值:留意,常見既 reference都唔係一個可以 set死既絕對值(部分板會以 +XXmV表示),而係一個伴隨 VTT 升降既相對值。暫時我都比唔到一個 range比大家參考,實情係……我都亂撞
關聯數值: VTT voltage
備註:我建議可以按隔2至3格為一組,慢慢逐組逐組試,試到某組較好後,至細分慢慢響果組入面試,咁會容易撞DD

NB/MCH GTL reference
項目:同上,唔知叫咩……
建議數值:呢個好睇塊板個紋波控制做得好唔好。一般以 vtt 60~70% range(即係 vtt 現在數值 x 60~70%),紋波低既板個數越細越好,紋波大既就要越大越好。
關聯數值: VTT voltage
備註:以上既 range並非絕對,有時仲要睇埋 U既體質。所以……撞啦!60~70%唔得既話,繼續撞 range外既。

其他項目
Load-line calibration
宣稱可以 fine tune CPU vdrop既功能。一般情況下,超頻後 full load時,會發覺電壓係咁跌,有時甚至跌到死機。本來 vdrop係粒 U自我保護既功能,等佢唔好成日受突如其來既大電流刺激。呢個野可以大幅減輕跌 voltage情況,不過唔係寫包單一定穩定左同好超左。最好 enable/disable都試晒佢

CPU/PCIE spread spectrum
減少 EMI干擾既功能。EMI會干擾塊板各樣 chipset運作,尤其是 sound chip/sound card特別受影響。平時唔超果時,呢個功能 enable,就可以減低 EMI。不過佢好影響超頻表現。你超頻一定冇得傾,要 disable佢。


其他遲D諗到再補充

[ 本帖最後由 helenchan 於 2009-8-16 10:37 編輯 ]

TOP

實戰心得篇
首先,你要妥善咁分好左,自己係實用派定玩樂派先,因為兩派需要注意既野都有唔少唔同。以下我分開兩派分享自己既小小心得

實用派
由於配備既局限,超頻應以唔大幅提高整體溫度既條件下嘗試,而要做到咁,最好就係先試默認電壓下超頻。我建議:
a.        超頻 10%,跟住行 10次 IBT,留意係咪穩定同溫度能否接受。如果唔穩定或者溫度過高,我自己就建議放棄……因為少於 10%超頻對效能影響好細,響有限條件下,只係羅唔到 bonus部分姐,唔係大問題。
b.        如果得左,跟住試下加多 3%,同上行 10次 IBT同留意溫度。如果你咁都得埋,你真係好運既姐
c.        通常都就快到默電極限,可以逐2%繼續試。如果唔得,就要掉頭降 1%試,直至搵到較佳值
d.        即使你唔加電壓,但係單單提升頻率已經會令 CPU溫度提升唔少。小心注意溫度。我個人唔建議實用派新手響呢個階段加電,因為加電並且升頻對於所提升既溫度十分可觀。實用派但求知足,羅到個 bonus就ok啦!

當最終搵到 CPU 較佳值之後,就要開始反覆測試階段。先整多劑 IBT 20次,穩喇,再黎火山/prime 95/occt行佢3個鐘,都穩喇,咁至開始試超 ram。

由於 ram相對地冇咁熱,我覺得加少少電都 ok既,少於 2.0V。量力而為啦!
a.        超少少,盡量返去不少於 800既水平,先用 memtest86/memtest 86+響 DOS下試穩定。100% pass之後,再入 memtest響 win test多次,100% past之後,初步 ok
b.        試超下一級,重複上述測試。如果失敗左,就放棄唔好試。
c.        如果你想再超一下 ram……不過新手我基本上唔建議……,可以嘗試有限度地降 CL值
d.        重覆並搵到較佳值後,memtest 300% pass,初步測試通過

當然,咁並唔擔保到部機真係穩定。作為最終測試階段,時間當然要用多唔少。首先 memtest最好不少於 500% pass,然後火山等是旦一隻行不少於5個鐘,可以既話 6~8個鐘更好。如果都過到,算係測試完畢。不過!唔好忘記,所有測試軟件都並非 100%準確,你日後使用時如果遇到唔穩定,可能需要降外頻並再執行大型程式測試。


玩樂派
我諗唔係咁多人真係可以不惜工本,燒錢玩玩具掛,總有個上限。你要先幫自己定一個 budget出黎,睇睇自己負擔得起幾銀買散熱。有關呢個題目請過散熱區討論………溫度對超頻既影響唔細,呢方面一定要度好,尤其是唔好以為簡簡單單買個 CPU散熱器就乜都掂………
先計好自己手上分錢買得幾多野,同咩質數既野先,要心中有數,搞清楚呢個級數大概散熱表現頂唔頂到自己想超既幅度,尤其是 4G人…………

好喇,上埋機影埋靚仔相喇,開工!我會建議:
a.        先加個 CPU電上去高水平,個水平視乎你個散熱系統而定。一開波都係咁話超 10% 玩下佢穩唔穩先。一路燒 10次 IBT一路 check溫度。如果唔穩既話……恭喜你,閣下抽中雷U,某程度上都可以話運氣唔錯
b.        慢慢試,逐 5%加上去。應該唔洗幾耐就 boot唔記架喇……
c.        呢個時候試加 NB電,再慢慢試(當然唔好唔記得 check溫度)
d.        好快又唔得喇。呢云同我加 vtt
e.        又唔得喎,暫時加 SB電去住 1.15先,如果你有張正 VGA既話就順手升埋個 PCI-E frequency上住 105先。得就得,唔得就………
f.        終於,平凡既日子唔再平淡。你要開始試個 MB GTL喇。呢個我肯定你有排試,仲要唔係幾想試添!拿,家陣個技術阻力位就響呢度架喇,如果突破到既話升幅會唔細。比D恆心毅力出黎!玩野梗係要 pro至似樣架啦!可以參考下我個 range慢慢試………
g.        貌似跟住都係有錢人至有既下一步,因為正常黎計部機個發熱量都幾勁,你冬天都可以靠佢。OK!有米,仲想挑機?到你慢慢玩個 advanced control果堆野喇!錢多身痕,就梗係要玩大佢啦嘛
h.        最後,有左佢,仲邊洗搞咩禁毒呀!一日 48小時都唔夠你試野喎!撞個 CPU GTL reference佢!4個選項,每個變化都有住微妙關係,慢慢試………

睇怕試到 h你都就快 give up喇。同上,整多劑 IBT 20次,穩喇,再黎火山/prime 95/occt行佢3個鐘,都穩喇,你唔記得仲有 ram未超喎!

RAM同樣要睇你套散熱系統有幾勁。一般黎講 2.05V頂得到掛!拿!睇溫度呀!
a.        如果你已經唔少於 800既話,梗係即刻加一級試試先啦!同樣行 memtest 86再 memtest佢
b.        你實質無幾多級比得你試,而且好快頂住。響呢個時候,你既宏大工程又黎喇!事關你要試 DRAM CLK skew,試完再黎 reference………
c.        又題外話,CL值亦可以變………

同上,我又 copy一次。咁並唔擔保到部機真係穩定。作為最終測試階段,時間當然要用多唔少。首先 memtest最好不少於 500% pass,然後火山等是旦一隻行不少於5個鐘,可以既話 6~8個鐘更好。如果都過到,算係測試完畢。
不過呢,我想話你唔記得玩試返降壓羅………請根據上面 a~h順序嘗試降壓。降壓一般逐格逐格降會比較好。降完後,唔好唔記得再做多次最終 test呀!



補充篇
點樣用燒機工具?

燒機工具查實好多,我就暫時抽出其中兩隻比大家參考下,分別係 orthos同 memtest(本來想講下 IBT v2.3,不過我執行唔到,有 error………另,唔好叫我上圖,懶)

Orthos
首先,如果你係4核U既話,需要開2個 orthos,然後響工作管理員→處理程序→right click orthos.exe→設定相關性→其中一個選 CPU 0、CPU 1,取消 CPU 2、CPU 3,另一個選 CPU 2、CPU 3,取消 CPU 0、CPU 1

準備好之後,Test 果項常用既有「small FFTs-stress CPU」、「Large, in-place FFTs-stress some RAM」、「Blend-stress CPU and RAM」呢3個。呢3個各有唔同既難度,冇話邊個一定勁過邊個,如果你有時間既話當然最好都試晒佢啦!但係作為初步測試,我會建議用「Large, in-place FFTs-stress some RAM」或者「Blend-stress CPU and RAM」呢兩個是旦一個。Priority set 「9」,基本上就 OK。

記住,orthos 基本盤係 run 2粒鐘,少過2粒鐘既不足以判斷穩定狀況。當作最終測試時,建議最少 run 5粒鐘,當然越多越好啦。

memtest
測試 RAM 穩定性既工具——memtest 有2款,1款 for DOS 1款 for WIN。DOS 版(memtest86+)主要用 CD/floppy 執行,先將 bootable ISO/binary 寫入 CD/floppy,然後入 BIOS 選 1st boot device/1st boot priority 做 CD/floppy,以 CD/floppy boot 機就可以執行,非常簡單方便快捷。

WIN版(memtest) 可能你響用果陣,個 memtest 會彈句野出黎,話受 OS 限制,唔比你一野開爆 ram 黎 test。不過你可以開好多個 memtest 黎行,測試能力同你齋開1個一樣。比如你有2GB RAM,咁你可以開3個 memtest(留返D比系統本身……) 行 512,如果你裝左 64bit OS 又有 4GB RAM,咁你可以開7個 memtest 行 512MB。

初步測試建議最少 100% pass,當然多少少 200% 更好啦。最終測試時最少建議 300% pass,不過梗係你有時間既話,越多越好。

[ 本帖最後由 helenchan 於 2009-12-31 21:42 編輯 ]

TOP

響發問之前………
1. 請提供 full config 以方便有效交流
2. 如果問及超頻設置等內容,請詳列你依家既所有各項項目既設定數值
3. 請先閱畢本文,真係唔明至再發問

FAQ 篇

Q: 有冇人教下我點超呀?
A: 有,我。不過你唔適合超頻,原因請睇「你真係適合超頻?really?」。

Q:我超唔上 XXGHz,點算?
A: 1. CPU 體質問題; 2. 配置如底板問題; 3. 閣下技術問題。常見以第3點可能為大。請參考上述求知篇同實戰篇,並多作嘗試。記住,大幅超頻要求錢、知識、耐性、運氣,缺一不可。

Q: 幾時有 AMD/i7/i5/i3 篇?
A: 等我有錢玩埋果D先啦下………



陸續更新中,歡迎各位提意見,或者呀………插我幾刀………

[ 本帖最後由 helenchan 於 2009-8-19 11:58 編輯 ]

TOP

本帖最後由 helenchan 於 2010-4-4 23:56 編輯

特別鳴謝:
糾正錯誤既插刀名單
sunderstan   #17
LKNim
http://www.hkepc.com/forum/viewt ... ;page=3#pid22242863


跟餐奉送

simplekk 大既正斗教學轉 post:
775篇
http://www.hkepc.com/forum/viewt ... ghlight=%2Bsimplekk
AMD篇
http://www.hkepc.com/forum/viewt ... ghlight=%2Bsimplekk

新仔陳既過往心得分享:
http://www.hkepc.com/forum/viewthread.php?tid=1176641
http://www.hkepc.com/forum/viewthread.php?tid=1241019



另一火牛新手入門篇:
http://www.hkepc.com/forum/viewt ... &extra=page%3D1

TOP

提示: 作者被禁止或刪除 內容自動屏蔽

TOP

十卜十卜..好有幫助

TOP

回覆 6# 的帖子

唔好比咁大壓力我啦!我都係新仔黎~~咋!

TOP

回覆 4# 的帖子

真係好有心, 頂頂頂

TOP

師兄好有心機寫, 新手請耐心閱讀.  
最好一邊超頻, 一邊對比內文, 睇下自己是否做得正確.

TOP