2011-01-13
15至23日高登1樓自發性歲晩「開倉」
「煙條」新U買氣一般 K系列到貨無期
文: Gordon Kwan / 賣場報價
文章索引: 腦場特攻 部落格

2011 年話咁快就到了,腦場中最熱門話題當然就是「煙條」推出全新代號「沙之橋」第二代「 CALL 」系列處理器,不過香港就只係普通型號到貨,包括「 CALL 埃吾 - 易衫令令」及「 CALL 埃漆 - 易碌令令」,而下星期會番貨「 CALL 埃吾 - 易死令令」,但大部份新玩家都在等「 K 仔」版本,但代理就畀左兩個到貨日期畀腦鋪,大家就真要等下啦,包括「無限期」及「無了期」,再加個極無奈手勢。

 

唔少主機板代理反映,「煙條」第二代「 Call 」處理器銷情一般,「 K 仔」版本一日唔到貨,「 P67 」主機板就好難賣得好,因為非「 K 仔」版本處理器超頻能力受限難以吸引進階玩家,買「 H67 」主機板用佢個內建「 IGP 」不如買舊平台配張卡,所以市場阻力甚大。

 

另外,「紅巴」的「小巴檔、高清、碌溝吾令」繪圖卡近期熱賣,殺全世界一個措手不及,竟然可以用高一級「小巴檔、高清、碌溝漆令」 BIOS 就咁 Upgrade 上去,呢招令「小巴檔、高清、碌溝吾令」近期勁 Hit ,不單止「綠營」大受影響,連高一級「小巴檔、高清、碌溝漆令」都賣唔去,入貨的商鋪、代理全部主招,咁簡單就破解到咁兒戲,不過, CEO 都話換就換搞到無人接手啦,「紅巴」真係自己玩死自己。

 

針對繪圖卡玩家的「 Coolit 」一體式水冷到貨,不過水冷頭暫時只支援「綠營」繪圖卡,網上評風唔錯,返貨後都有唔少玩家問津,高階野一向都唔受大圍不景氣影響。

 

11 月尾時講到「不聰明的蕉」故事,話說可能會在十二月加價,結果係點 ? 當然係加唔成,「不聰明的蕉」終於安靜地返回原價,你估香港真係咁好境咩。

 

講開加價, 2011 年 PC 業尤其係 D.I.Y. 市場會越來越嚴峻,由 2010 年年中開差不多所有廠既營運成本包括人工、水、電、煤、金銀銅鐵錫、原材料都係加,舊年其實未有完全反映物價上漲,今年加價機會相當高,尤其是人民幣升值壓力,香港卻掛鈎於弱勢美元, 2011 年應該會有產品升價壓力。

 

最後,高登 1 月固無組織、仲係由「高登電腦中心」自發性舉辦的「高登腦場歲晚開倉週」,日期由 15 日至 23 日,話說會有不少貨品減價吸引消費者上高登一樓,唔知會月「黃金地庫」會不會公開反對「高登一樓」舉辦「開倉週」,傷害深水埗電腦零售業界呢 !?

 

分享到:
發表評論
本篇文章被 65037 人閱讀,共有 個評論