電腦領域 HKEPC Hardware - Powered by Discuz! Board

標題: NF Audio NA2+ 開箱評測 [打印本頁]

作者: hk133 時間: 2021-4-19 18:27 標題: NF Audio NA2+ 開箱評測

本帖最後由 hk133 於 2021-5-13 02:28 編輯

都係嗰句，全部圖片都可以點擊查看大圖，有時候圖床唔知點解只會顯示縮略圖（即使已經選擇咗係顯示完整圖片），暫時搵唔到解決方法。
如果只係見到縮略圖，click落去就睇到大圖。

呢排好多嘢忙，冇時間認真聽，
聽完寫好咗大綱又冇時間寫長文，
搞到依家得閒先寫

未睇過NF Audio NM2+開箱評測可以睇返呢度：
https://www.hkepc.com/forum/viewthread.php?tid=2615363

NF Audio NM監聽系列同埋 NA音樂系列嘅耳機雖然個樣差唔多，但兩個系列定位唔一樣（一個定位係舞台監聽，另一個係音樂鑑賞），今次評測嘅係NA系列嘅新作NA2+。

首先睇咗開箱先：

有別於NM2+，NA2+包裝設計主色調係橙+黑，但設計風格就冇大改動。

不過今次包裝盒上面嘅 NF Audio logo 就唔再係立體，轉返做普通平面印刷，可能係之前咁整法成本比較高，但出嚟嘅效果又唔係咁好？

包裝盒背面同底部都係參數嗰啲。

同NM2+一樣，依然係入面仲有個盒。
內盒盒面都係採用橙黑配色。

依然係熟悉嘅，充滿儀式感嘅包裝。
打開之後，又係熟悉嘅唱片造型耳機擺盤。
而今次左邊嘅說明書都轉埋做黑色。
係微博見到NF Audio老細話今次唯一唔滿意就係說明書封面印刷唔夠黑。

（可以睇返佢4月13日 19:00發出嗰條微博）

耳機擺盤冇變動，都係嗰個配色。

攞開耳機擺盤之後就見到跟機嘅耳機套，
今次標示返唔同位置嘅耳機套係邊個size，唔使估估下。

跟機嗰條耳機線都轉咗做黑色，配合返耳機嘅顏色。

收納盒依然係喺說明書後面，
配色冇變，size都冇變，依然係太扁，
用啲粗身嘅升級線就放唔入呢個收納盒啦。

今次收納盒入面仲有一副XS size嘅耳機套。

但6.35mm轉接頭就依然係銀色。

配件全家福。

睇返下，今次跟機條線同我上次買NM2+套餐送嘅2.5mm平衡線係一模一樣樣。

NA2+外型同NM2+基本係一樣，不過轉咗做黑色，上面嘅刻字都改成「NA2+ MUSIC」，小藍點變咗小橙點。

插住條線影就係咁樣。

跟住重點就當然係同NM2+對比㗎啦。

本來諗住NA2+同NM2+應該只係調音上有分別，但第一下聽嗰時就發現NA2+係比較細聲。check返參數，原來NA2+阻抗係32ohm（NM2+係18ohm），再睇下NF Audio老細嘅介紹，唔止動圈單元有調整，NA2+嘅調音海綿&網布，仲有外殼塗層都經過改良，「大幅度改善了鋁殼的諧振特性，在音色層面做出了一個很大的調整」。

今次測試，NM2+同NA2+都係用同一樣嘅訂製純單晶銅線，NM2+用官方低頻套，NA2+就用官方氛圍套，測試所用嘅DAP係FiiO M11 Pro。

雖然話就話NA2+阻抗大啲，但手機直推出嚟嘅聲依然係幾掂，而且更高嘅阻抗仲過濾咗一啲手機嘅底噪。至於聲場，感覺上同NM2+一樣係咁開闊。

如果話NM2+係講求原汁原味、忠實還原，NA2+就係聽感優先，傾向於修飾音頻嘅缺陷同失真。

NA2+嘅低頻質感對比NM2+都有幾大嘅改善，但量感只講得上係稍多，bass聲就更加清晰、低音鼓打擊感亦更強烈，低頻氛圍更加豐滿，聽落更加有節奏感。

但NA2+喺中低頻方面嘅表現同NM2+冇明顯差距，不過NA2+嘅高頻反而仲尖過NM2+，鈸聲都更加清脆。更明亮嘅高頻，好處係多數歌曲嘅人聲聽落會感覺更加清晰，掩蓋咗一啲歌曲人聲錄音質素差嘅問題，但聽好似それは小さな光のような咁將高頻刻意拔高嘅歌曲，聽落就會有啲唔舒服。

總體而言NA2+都係一款幾雜食嘅耳機，如果係用嚟聽音樂，NA2+係會好過NM2+，呢個價位嚟講NA2+相當抵玩，再加埋呢個做工仲有包裝，真係冇咩可以挑剔。