NF Audio NM2+開箱評測

又係拖咗好耐先出文

NF Audio NM2+係我喺舊年陶佬99划算節完結前一小時買嘅，嗰時見到有-99CNY嘅優惠碼，加埋各種優惠，到手唔使1000HKD，仲有埋原廠2.5mm平衡升級線。
NF Audio NM2+喺大陸嗰邊評價普遍都唔錯，但好似EPC都唔見有人討論，於是我就趁有優惠嗰時入手試下。

NM2+包裝顏色同耳機一致，正面上半部分印有產品渲染圖，中間以大字體粗字印上產品型號。包裝正面及背面右下角都有藍色NF Audio logo點綴。
NM2+屬於NF Audio專業系列耳機，定位係監聽耳機。

包裝底部印有耳機參數。

抽出封套之後，入面仲有個盒。

個盒係喺中間打開，有啲似CD包裝盒。耳機亦係擺放喺CD造型嘅托盤，托盤邊緣同CD一樣，遇到光會折射出彩色。

耳機托盤後面擺放咗兩款替換耳機套同埋線材。

左邊嘅說明書後面就擺放咗圓形收納盒。

收納盒入面又有個6.35mm轉接頭。

配件全家福。

NM2+成個包裝都好有設計感，耳機都唔例外。

全金屬外殼，加上正面結他撥片造型logo已經好夠辨識度，再加埋側邊“小藍點”logo點綴，設計方面基本上冇嘢好挑剔。

跟機線係銀色，襯返耳機嘅顏色。

至於當時送嘅原廠2.5mm升級線，就係黑色嘅。但條線比較幼，睇落都係麻麻哋咁。

後尾我就自己買咗條純單晶銅升級線，再用埋AZLA SednaEarfitlight Short耳機套（S size）配佢。

NM2+嘅低頻偏少，冇咗低頻營造嘅氛圍，聲底偏冷，啲聲好直白，冇乜修飾。聲場都幾闊，啲聲有層次感。而且佢都算幾易推，Xperia 5 II 直推啲聲都唔錯。

用返FiiO M11 Pro嚟推，NM2+低頻雖然係偏少，但質感係幾好嘅，鼓聲有力、反應又夠快，只係鼓聲比較靠後。但聲音層次分明，鼓聲就算靠後都依然好清晰。人聲靠前而集中，細節清晰又唔會蓋過樂器聲。

NM2+嘅高頻表現都幾好，啲聲係清晰而且明亮，有啲動鐵耳機feel，本身佢嘅高頻質素都幾好，所以聽落幾順耳。

如果接受到佢低頻量唔多，又或者就係想搵一副耳機試下冇味精（音染）嘅聲係點，我覺得NM2+值得一試。