我嘅Dream Toy ：3D Printer之新手上路

Rank: 3 Rank: 3 Rank: 3

2^#

發表於 2013-6-27 06:41 | 只看該作者

本帖最後由絕對好奇於 2013-7-1 10:25 編輯

2.新手預備篇

各位已經下定決心買機嘅巴打,可能心中都有個疑惑,
究竟買成品機定套件自己砌好呢?如果你係老江湖,
對呢樣嘢已經素有研究,又有DIY能力,個荷包又乾乾地,
無乜多餘嘅閒錢,咁可以去買件平平地嘅套件去砌,
不過我都建議你買番同呢度自已砌套件嘅師兄嘅相同型號,
起碼有乜事起上嚟都有人幫倒手,如果你買嘅套件型號,
同呢度啲師兄唔同,咁極有可能會發生愛莫能助呢種慘事,
到時半天吊唔知點收科!

如果師兄好似我咁,有些少DIY能力,但其他方面又唔係太識,
我建議師兄好似我咁,買成品機,咁樣雖然比較貴,
<我買嗰部機食埋套餐要港幣6000>,但係就少咗好多麻煩嘢,
個心會定好多,慳返唔少精神同時間,只要稍為睇下使用手冊,
再tune下機,就可以專心去構思自己嘅設計模型,煩少好多嘢,
好快就投入咗3D Pinter嘅世界,享受自己設計成品,
睇住佢點樣由無到有,好似睇住自已啲仔女出世一樣,
你話幾興奮呢!

不過你除咗有部機之餘,亦需要一啲工具輔助,

如上圖所示,呢堆係我嘅工具,有啲經常用有啲好少用,

經常用嘅包括有:
1.電子卡尺
  量度一啲需要比較準確尺吋嘅物體.
2.唔知叫乜嘅工具(本身原本用嚟拆膠殼嘅工具)<可用螺絲批代替>
  用嚟拆基板/支撐(Raft/Support).
3.扭耳鉗
  用嚟夾走噴頭(Extruder)或heatbed上嘅多餘膠絲.

好少用嘅包括有:
4.電子水平尺<可用普通水平尺代替>
  用嚟調校放置3D Printer嘅平台水平,通常便用一次就夠.
5.各種小手挫
  係個成品印大咗小小或無法列印嘅形狀<需要用手挫挫出形狀>時使用.
6.金屬毛刷
  用嚟擦走送絲齒輪上嘅膠粉.<送絲齒輪會因長期使用,積聚太多膠粉導致齒輪滑牙>
7.平扁形介刀
  用嚟鏟走heatbed上嘅多餘膠絲<頑固型>或修飾成品邊位.

有咗以上工具,係操作時你就會更加得心應手嘞!

另外要提醒一下買咗機嘅師兄係收機時可能遇到嘅問題,
以我嘅情況為例:
a.運輸問題
  我嘅機係由順豐托運,可以係網上追蹤,睇倒部機已經嚟咗香港重話己出倉運送,
  點知轉頭又話地方偏遠,要擇日再出!諗住第二日應該送到嚟啦,點知第二日又係咁講,
  真係由天堂跌咗落地獄,到咗下午近黃昏時份個手機突然嚮,話係順豐送貨,
  問有無人係屋企收貨,好彩啱啱係屋企附近,嘭嘭聲趕返去迎接呢件人間極品,
  所以有時都唔好盡信佢嘅網上資訊,諗到佢差唔多到就唔好行得離屋企太遠!
b.插蘇頭規格不合用
  小弟因為買咗國產機,佢插蘇頭係扁形三角,
  唔啱插香港插座,不個小第砌機多年有好多電腦電源線剩低,
  可以替換使用,如果無電腦電源線嘅師兄可以去新高登買返條,
  無記錯應該十幾蚊就有一條嘞.
c.噴頭模組安裝
  剛收到部機見到個噴頭模組,可能包裝關係無安裝到,剩係用泡泡膠紙包住,
  又揾唔倒安裝說明書,剩係見倒一包配件同一張SD卡,打去客服問比咗個網址我,
  個網頁有安裝說明,事後先知原來啲安裝說明同軟件係哂SD卡入面,真係大烏龍!

接落嚟就到硬件與軟件篇同新手tune機篇,首先我要強調呢個係新手上路post,
所以只會對以下項目作出一啲簡單嘅介紹同描述,並唔會作出深入嘅探討同研究,
雖然呢個post係小弟開,其實都只不過係代替同學會嘅師兄寫架咋!
因為同學會或買咗機嘅師兄,已經完全沈醉係3D Printer嘅世界,小弟都係強忍住,
襯重未開始劃圖設計自己心愛嘅作品之前,完成呢個post! 前人種樹,後人乘涼!
因為小弟係新手,走過好多冤枉路,唔想各位未買機嘅師兄重滔小弟嘅覆徹,
呢個亦都係gorto師兄希望小弟做嘅嘢!但如果師兄有啲比較深入嘅問題想問,
小弟仍然歡迎,到時同學會嘅資深師兄會代小弟回答嘅!

<完>

Rank: 3 Rank: 3 Rank: 3

3^#

發表於 2013-6-27 06:41 | 只看該作者

本帖最後由絕對好奇於 2013-7-4 07:09 編輯

3.硬件與軟件篇

硬件篇:
先講一下硬件部份3D Printer同普通Printer嘅分別,3D Printer係運作時,
有一個好熱嘅外露噴頭同heatbed,有小朋友嘅家庭呢點要注意同顧及安全!
從表面可見,有x，y，z三條軸,分別負責噴頭同heatbed嘅左右，前後，上下移動,
有幾個步進馬達,分別負責控制及提供動力比x，y，z軸同送絲齒輪，兩條同步帶，
內藏負責供電比步進馬達內置micro controller嘅Motherboard,
原則上幫佢加個SD模組,佢就可以脫離電腦獨立運作,獨自完成整個打印模型過程,
係呢點上面我係強烈建議係買機或砌機時幫佢加番個,因為實在太方便嘞!.
咁佢點樣獨位運作呢?佢有一個簡單嘅內置操作系統,有一個LED顯示同幾粒控制按鈕,
只要看圖識字,就可以完成好多基本操作,例如:

b.打印成品
b.調整平台水平<配合heatbed嘅螺絲調校>
c.入膠絲或退膠絲
d.蜂鳴器開關
e.一個輔助你開機設定嘅精靈程式
f.預熱噴頭同heatbed嘅溫度

等等不能盡錄........

噴頭 & heatbed

LED & 按鈕

SD模組 & 電子水平尺
SD模組.JPG

軟件篇:
軟件部份有主程式ReplicatorG,負責產生gcode檔案嘅副程式Skeinforge兩部份,
ReplicatorG主要負責載入3d檔案,透過usb介面控制3D Printer嘅一般操作,
包括係硬件講嘅3D Printer內置操作系統大部份功能,佢亦會call Skeinforge副程式
透過Skeinforge產生gcode檔案或可供3D Printer操作系統嘅x3g檔案,以便離線打印,
透過Skeinforge亦可對3D Printer作出微調,<即tune機>,所產生嘅微調數據會寫入gcode檔案內,

以下會摸擬一次整個打印成品嘅過程:(以小弟為例)

1.用SketchUp 8劃番個3D摸型,用SketchUp嘅 STL plugins輸出STL檔案.

2.打開3D Printer電源,按下上面最右邊icon暫時斷開與電腦連接,<如連接電腦將不能進行產生 GCode檔案動作>
打開ReplicatorG程式,按下File->open->載入檔案.

3.按下右手邊move按鈕,再按上面center同put on platform按鈕,將模型置中及緊貼平台.

4.按下Generate GCode按鈕,call出GCode參數調校介面(一般調校一次或使用預設值已經可以).

5.調校完按下介面下面Generate GCode按鈕產生 GCode檔案.

6.按下上面右二icon與電腦連接,連接後再按下左上角File對下第一個icon按鈕進行打印

7.或按下右三icon按鈕將GCode檔案轉成3D Printer,內置操作系統嘅格式進行離線打印.

8.個人間極品係我面前跳咗三十幾分鍾圓步舞之後,打印完成!

呢舊係乜傢伙,唔話你聽,師兄自己估下先,遲啲會為佢開番個post!

<完>

ps:軟件篇:摸擬一次整個打印成品過程內容已修改.

Rank: 3 Rank: 3 Rank: 3

4^#

發表於 2013-6-27 06:41 | 只看該作者

本帖最後由絕對好奇於 2013-7-7 05:07 編輯

4.新手tune機篇

講到tune機篇小弟就有啲嬲嬲地,事緣雖然係買機之前,
小弟為咗做足tune機準備,爬返以前嘅post做一啲重點撮要,
但一直以嚟,小弟都攪唔清楚啲軟件嘅關係,即係我上篇所講嗰啲程式,
以為佢哋係獨立運作互不相干,而係舊post入面,有啲提供Skeinforge程式,
嘅下載連結,但係係我有機之後,想下載時個網址又瓜咗下載唔倒!
我部機有跟機漢化版ReplicatorG程式,但揾唔倒Skeinforge程式,
咁唯有暫時放棄tune機嘅念頭,用跟機漢化版ReplicatorG程式印住嘢先,
到我幾經嘗試搜尋終於都下載倒Skeinforge程式,但打開佢感覺有啲古怪,

無辦法跟住我啲tune機撮要去做,以為係自己天生愚昧,一時間未能掌握要點,
加上我係僵屍一名,夜媽媽同學會啲師兄都訓哂教,又唔想煩住佢哋,
於是自己試下攪下,下載咗啲測試模型,日日如是者,係咁攪,係咁印,攪咗一個星期,

終於忍唔住襯放假向同學會發出救求,同tune機達人ma_hty師兄,講咗我個情形,
點知講極都好似有啲雞同鴨講,傾唔埋欗,就係唔知點算之際,小弟係網上發現咗啲嘢!
終於謎底揭開,即時雨過天睛,一天都光曬!

原來我將啲注意力太過集中係Skeinforge程式,
忽略咗ReplicatorG程式,就係我同ma_hty師兄傾緊嘅時侯,提到ReplicatorG程式,
於是一邊傾一邊上網搜尋,比我睇倒英文版嘅ReplicatorG程式同我嘅跟機漢化版有分別,

即刻明白其中關鍵要點,立即點擊下載安裝,再call出Skeinforge副程式,
跟返之前個tune機撮要,好快就將部機tune好嘞!

係tune機嘅過程係有步驟之分嘅.<當然最先就係將放置部機嘅平台先校好水平.>

1.調校噴頭同heatbed嘅水平同距離.
  首先放一張A4紙係平台同噴頭之間,打開3D Pinter電源,利用右邊方向按鈕,
  將部機嘅自帶操作系統調到Level Build Plate,(主頁->Utilities->Level Build Plate),
  按下中間按鈕進入,會出現簡短英文教學,如下圖
調較平台LED-紙--1.JPG

繼續按下中間按鈕,headbed就會自動升起,噴頭亦會移至正前位置,
一邊調校heatbed底下前方左右螺絲頭,一邊將A4紙向不同方向拉動 ,

heatbed底下前後左右四粒調校螺絲頭
螺絲頭.JPG

直至感覺拉動A4紙時, 有被噴頭壓住而又未至不能拖動為止,
之後再按下中間按鈕, 噴頭會移至headbed不同位置, 留意LED顯示,
繼續用呢個方法配合調校headbed底下螺絲頭, 完成調整整個調校過程.

噴頭會移至headbed不同位置,調校正確的基底(Raft) 形狀為略呈扁平狀.
調較平台LED-紙-2.JPG

2.調校Skeinforge副程式參數
<本來小弟想用多幾日將呢個項目寫好啲,但為免坐頭位嘅kayming師兄等得太耐忍唔住,
會係小弟屋企樓下伏擊我,

所以粗粗地........,希望睇唔明嘅師兄出聲,少弟會盡量回答,
或歡迎同學會嘅師兄搶韁回答,以解小弟知識貧乏之困境!>

      <修改此項參數嘅目的,為將0.5mm-thin-wall_aa模型牆身厚度,調校成與噴頭直徑相同>
注意:0.5mm-thin-wall_aa模型,只作為tune機使用嘅工具模型,與其檔案名0.5mm無關,莫因其名字而受誤導!

在進行修改參數之前,先確定部機嘅噴頭直徑及下載測試模型.

http://www.thingiverse.com/thing:52946

下載後先打印0.5mm-thin-wall_aa模型,量度牆身厚度以便得出數據,作之後修改參數之用.

<注:在進行修改任何參數之前,請用紙紀錄其預設數值,以供日後有需要時使用.>

打開ReplicatorG程式,點擊Gcode按鈕,再按Edit Slicing Profiles會出現選擇介面,
點選自己部機嘅型號,我嘅係Replicator 2 slicing defaults,再按Edit call出Skeinforge副程式,
確認以下選項選擇正確:
Profile Type:Extrusion
Profile Selection:ABS
Craft

1.Dimension
Filament Diameter(mm)=1.82    <量度膠絲平均直徑,1.82為預設值.>
截取一段大約一尺長膠絲,分別在膠絲的頭中尾三處用卡尺量度,得出平均直徑後再修改以上參數值.

2.Carve
a.Edge Width over Height(ratio)=1.3333333    <噴頭直徑/層厚 nozzle diameter/layer height>
如果你打算用0.3mm層厚進行打印,則以上參數值的計算方法計算為:  (以我為例)
0.4(噴頭直徑)/0.3(層厚)=1.3333333,將此結果修改以上參數值.
b.Layer Height(mm)=0.3
由於打算用0.3mm層厚進行打印,所以將0.3填入以上參數值.

3.Fill    <此項參數值對tune機結果無影響,只是順便提及>
Infill Solidity(ratio):0.1     <0.1=10%填充率,1=100%填充率>

4.Inset
  a.Infill Width over Thickness(ratio):1.3333333      <噴頭直徑/層厚 nozzle diameter/layer height>
此項只需填上2a的參數值即可.

5.Speed
  a.Feed Rate(mm/s):40<預設>
  b.Flow Rate Setting(float):29        <Feed Rate(mm/s)數值/tune機前thin wall厚度*噴頭直徑>
此項為本文開始時提及,將tune機前打印嘅0.5mm-thin-wall_aa模型牆壁厚度數值,
用以與Feed Rate(mm/s)數值相除,再乘以噴頭直徑,以我為例之前模型牆壁嘅厚度數值=0.55mm,
所以算式為40/0.55*0.4=29,所以將29填上以上參數值.設定好以上參數後,再印thin wall量度,
太簿(小於0.4mm)要加大數值,太厚(大於0.4mm)要減小數值,反覆地將Flow Rate Setting(float)以加減1為限,
作出調整,直至thin wall維持0.4mm而thin wall牆身無己乜疏洞,即牆身厚度剛剛超過0.4mm之前的數值,

每次完成調整以上參數值後,記得要按最下右方<save all>按鈕儲存設定.

如果可打印出0.4mm(我嘅噴頭直徑)嘅0.5mm-thin-wall_aa模型牆壁厚,
0.4mm牆壁厚.JPG

再繼續打印之前下載嘅測試模型,裡面有test_plug同plug_test2,
如果可以將兩個模型合埋一齊,即tune機成功!

<呢個測試模型檔案及教學文章乃係tune機達人ma_hty師兄所寫,
因為小弟英文差,加上之前做咗ma_hty師兄,係以前啲post嘅tune機撮要,
所以尚未拜讀,各位英文好嘅師兄可以詳細閱讀,肯定比我寫嘅更清楚明白!>
tune機模型1.JPG

圖中有S字模型,上下係不對稱只可配合字型結合,呢點要留意下.

呢度順便post用0.17mm同0.3mm層厚(Layer Height)嘅分別,
為使各位知道放大程度,post一張伍毫子嘅伍字放大圖.
電子顯微鏡5毫.jpg

0.17mm層厚

0.3mm層厚

0.17mm層厚

0.3mm層厚

0.17mm層厚

0.3mm層厚

如圖所見0.17mm比0.3mm層厚,係比較細緻,線條亦比較幼細,
但針無兩頭利,層厚越細打印時間越長,為免浪費時間,
要視乎自己對模型細緻度嘅要求,而作出適當調整!

ps:由於DaCongo師兄對本篇文章,已經作出詳細修正及說明,小弟不會修改,
   前車可鑒,各位師兄可以睇下小弟呢個新手所犯嘅錯誤,對比DaCongo師兄嘅修正,
   可以更加了解明白,一般如小弟嘅新手容易犯嘅錯誤!

                                    <完>

Rank: 3 Rank: 3 Rank: 3

5^#

發表於 2013-6-27 06:41 | 只看該作者

本帖最後由絕對好奇於 2013-7-12 06:26 編輯

5.簡單硬件維修篇

輪到呢個維修篇,原來又係一單烏龍事件,事源有一日小弟打印test_plug模型,
因為個Gcode選項預設係印基底,諗住試下唔印,睇下佢乜嘢效果,點知就出事啦!
當等到噴頭同heatbed溫度夠熱,開始打印成品嘅時侯,突然聽到卡卡聲!
而個噴頭又出唔倒膠,唔知發生乜嘢事,以為噴頭塞咗,於是用力將啲膠絲,
壓落個噴頭度,壓得幾下又攪掂咗,但係覺得唔用基底個打印成品,會好痴個heatbed,
好難起底,之後就用返基底打印,一直相安無事,以為虛驚一場,但有一日,小弟想印一個,
自己劃比較大嘅成品,但想佢表面平滑啲唔想因為用咗基底,令到佢表面顯得粗糙,
點知事件重演,咁我梗係重施故技,諗住好快攪掂,點知攪極都唔得,以為未食飯唔夠力,
於是加倍施壓,就係呢個時侯,慘劇就發生咗啦!!

壓得幾嘢就聽到啲怪聲向下一望,見到heatbed上面嘅黃色kapton膠紙被噴頭刮到爛哂,
將啲膠紙清除哂之後重大獲,見到塊鋁板花哂呀!

買咗部機唔夠五日咁就比我同佢開齋,傷心之餘食咗口事後煙,突然諗起之前做撮要時啲師兄有講,
話個噴頭印得多會有膠粉聚積,令到送絲齒輪滑牙出唔倒膠,咁唯有拆散個噴頭清下啲膠粉嘞.
首先如果你係新手第一步就要拍照存底,以免拆散咗組裝唔番,咁就大獲啦!係拆每一樣組件之前,
都要拍照一張,同埋最好加番盞燈同埋一隻碟仔裝住啲零件,以免遺失嘞!
照明.JPG

拆解步驟如下 (以我為例)

1.攞出套餐配件內附三條六角螺絲批頭
配件.JPG

2.配合六角螺母大小選用六角螺絲批頭,先拆咗噴頭底部兩粒螺絲

3.將連接噴頭嘅膠絲剪斷

4.成個噴頭拆咗落嚟

5.將兩條有白色膠管嘅長螺絲鬆開

6.鬆開風扇與散熱片連接嘅兩粒螺絲

7.將頂蓋,風扇與散熱片除下

8.再將覆蓋住送絲齒輪面蓋個兩口螺絲鬆開,就會睇到送絲齒輪同側邊嘅滑輪

9.用金屬絲刷或硬毛刷將膠粉清除

10.清理後再按之前步驟,逆向裝返上去,在安裝回送絲齒輪面蓋嗰兩口螺絲時,
面蓋要稍為向送絲齒輪方向移近再上螺絲,確保佢哋之間嘅空隙唔會有虛位,
令到送絲齒輪可以緊咬住膠絲,唔會產生另類滑牙事件!

我裝返好哂之後再開機打印,諗住實掂過碌庶啦!點知情況依舊,當場坐咗係度,
仲抓甩咗一咋頭髮呀,陰公!

由於小弟係修理噴頭時幫佢加咗盞LED燈,再試重複列印出唔到膠個陣時,
好清楚睇倒個噴頭非常緊貼個heatbed,反復研究之下終於揾到原因,
原來係個程式有bug,一唔用基底(Raft)個heatbed就會升高咗少少,
令到噴頭非常緊貼個heatbed所以出唔倒膠,之前印細件模型個陣時,
之所以加壓膠絲一陣會無事,係因為壓一陣佢都已經印第二層,個heatbed降低咗,
所以又出倒膠,而印大型模型時,我壓到啲kapton膠紙爛哂,佢都未印第二層,
所以就賴哂嘢啦!,

不過有失亦有得,咁樣又令到小弟學識咗點樣清膠粉,
過咗無耐又真係因為膠粉太多而出唔倒膠,呢次小弟卓卓聲話咁快就攪掂咗啦!

但係原來因為膠粉太多而出唔倒膠,個送絲齒輪滑牙係唔會有卡卡聲架,問你死未!

<完>