[開箱] 圈鐵盛行時期的異類：VSONIC GR09開箱評測

本來呢個post應該喺之前就出，不過因為前一段時間俾Android手機區版主短暫banned to post，加上之後我又拖延症發作，搞到今日先嚟epc出post......

VSONIC係國產耳機之中比較出名嘅品牌，GR07系列雖然有品質問題，但出眾嘅聲音依然令佢獲得唔少好評。
近年，VSONIC嘅QC一直改善，新版嘅GR07都已經冇咗以前容易“解體”嘅問題，仲推出咗MMCX可換線版。
而隨著動圈振膜技術上嘅突破，GR07嘅繼任者——GR09同埋用作炫耀VSONIC目前造工水平巔峰嘅Ἄρης（阿瑞斯）隨之登場。
之前我就聽過阿瑞斯同VS X，聽得出採用碳納米管振膜嘅動圈單元整體素質的確幾好。
不過咁，宜家大多數國內廠商都已經玩緊圈鐵組合，而且佢地仲肯花成本用上Knowles嘅動鐵單元，令聲音質素進一步有提升，加上價格唔貴，已經開始動搖國產純圈耳機嘅地位。
面對大勢所趨，VSONIC不為所動，新一代旗艦耳機GR09依然採用單動圈結構。
即使近期宣佈GR09等大量耳機停產，都仲係冇計劃推出圈鐵耳機，反而整咗個Ἄρης青銅版同埋紫銅版，盛惠6000+ RMB。（買唔起:smile_o03:）
喺GR09最後清貨之際，我買咗黑色版（膠殼）。本來打算買白色陶瓷版，不過冇貨，於是買咗黑色版。點知收到貨之後再去睇就見到陶瓷版又有貨......
買咗就算啦......
講完廢話就開始開箱啦。

包裝好鬼大件，比想像中更加大。
正面依然係VSONIC logo+產品型號。
GR09後面加多個“excellent”字眼，強調GR09係佢地嘅頂級耳機。

入面嘅外盒依舊係走簡約風，正面只有VSONIC logo。
至於點解呢個今次叫“外盒”而唔係“內盒”，睇下面就知：

GR09嘅外盒唔係翻蓋式，而係抽屜式，從右邊抽出內盒。
入面嗰個先係真正嘅內盒。
GR09本體被海綿固定於正中央位置，左邊擺放一個收納包。
至於右下角，就有刻住產品編號嘅銘牌。

我抽到3115號。
每個GR09都有獨立編號，感覺更加有高級耳機嘅feel。

移開表面一大塊嘅海綿，耳機後面仲有兩個黑色盒。

兩個盒面積差唔多，但係一個好薄另一個比較厚。

睇真啲，好薄嗰個原來唔係盒，而係信封，入面有一本說明書。

循例影下參數頁。
不過參數都只係用作參考，並非評價聲音好壞嘅指標。

至於大盒，理所當然就係裝住耳塞同埋耳掛呢啲配件。
不過全部VSONIC耳機嘅配件好似都係一樣，所以冇咩特別好講。
唯一可以講嘅就係VSONIC啲跟機耳塞唔match我對耳，對我而言隔音較差，搞到我要另行搵其他耳機嘅耳塞配合GR09使用。

黑色版跟機有一條單晶銅線，理論上好過白色陶瓷版嘅“銀線”（我懷疑只係鍍銀），但睇翻大陸網友嘅評價，好多都係認為單晶銅線嘅聲音不如銀線。
至於GR09嘅聲音表現如何，我遲啲會喺2#評測部分詳細講下。

開箱部分至此完結。

0

0

hk133

進階會員

Rank: 3 Rank: 3 Rank: 3

2^#

發表於 2018-6-18 23:12 | 只看該作者

本帖最後由 hk133 於 2018-6-19 00:08 編輯

評測部分：

GR09黑色版本來係陶瓷材質，不過因為黑色陶瓷良品率低（菱角同線條分明嘅造型應該係主要原因），加上好多買家反映黑色版縫隙大+明顯，後來改用塑膠外殼，售價低於白色陶瓷版，並且跟機線改為單晶銅材質。
我手上呢副GR09，雖然係膠殼，不過造工都算唔差，但塑膠外殼都難免有啲廉價感。
而且相比VS X嘅電鍍外殼，磨砂外殼顯得有啲平平無奇。
考慮到售價較低，加上塑膠外殼造工都幾好，而且可以換線，所以都唔係咩大問題。

順帶一提，雖然GR09嘅收納包外形同VS X以及阿瑞斯嘅收納包一樣，但其實尺寸係更加大，估計係為咗部分比較粗壯嘅第三方升級線而做出改變，又或者係方便用家放多一條升級線入去。而且導管應該係比VS X粗啲，終於套得實銅雀pro通透塞唔會甩。

單晶銅線材做工不過不失，但個人認為官方定價999RMB並不值得購買。
至於線材會唔會容易變色，有待驗證。

聲音表現方面，GR09果然值得期待，比VS X更為廣闊嘅音場，加上更為細緻嘅細節還原表現，完全值回票價。
測試工具：FiiO X7+AM3B
使用銅雀pro通透塞（中號）搭配GR09，以跟機3.5mm接頭單晶銅線作測試。
同VS X對比，GR09嘅音場開闊好多，大概係納米樓同豪宅嘅分別，聲音更有臨場感。而且相對VS X，GR09更為易推，音量設定同等嘅情況下GR09更加大聲。（GR09阻抗50Ω，VS X阻抗80Ω）雖然阻抗比VS X低，但底噪都依然控制得幾好，而且分析力得到進一步嘅提升，各種樂器嘅聲音都能夠駕馭，同時唔會干擾到人聲。
GR09得益於更開闊嘅音場，樂器定位更為清晰。調音都係跟隨GR07系列以來嘅一貫風格，低頻量感較少，不過對比VS X有提升，尤其質感相對VS X有較大提升，鼓聲還原度進一步改善，雖然低頻較弱，但得益於更清晰嘅聲音定位以及更強大嘅細節分析力，面對樂器種類較多嘅演奏，鼓聲都唔容易被掩蓋，低頻水準不過不失，對我而言係滿意嘅水平。GR09嘅高頻表現我就覺得基本維持VS X嘅水準，高音明亮但唔會好尖，冇乜齒音。整體調音風格均衡耐聽，既冇刻意拉高低頻強調動圈嘅先天優勢，亦冇刻意拔高高頻嚟製造明亮聲音。
聲音表現超出我嘅預期，本來有啲想退燒，不過聽完GR09之後就知道一山還有一山高，繼續升級仲可以聽到更加好嘅聲音表現。
日後會試下搭配平衡升級線嘅表現，希望會更上一層樓啦。

評測部分至此完結，感謝觀看。

TOP

林洋2