本帖最後由 hk133 於 2018-12-19 00:53 編輯
自從藍牙5.0開始普及，真無線耳機嘅延遲問題終於有得改善，於是我都終於放心入坑，真無線耳機宜家已經成為我出街必備嘅物品。
抱著“一試無妨”嘅心態，我買咗幾款真無線耳機，全部都係$500樓下。
不過咁，雖然方便，但係啲聲就....... 話曬唔係咩HiFi廠出品，預咗嘅。
睇翻HiFi廠，真無線耳機（藍牙5.0）$1000樓下選擇真係唔多。
然後我見到TFZ都終於出咗第一款真無線耳機X1，樣仲唔錯添，於是就入手咗藍色。 （個人覺得銀色冇咁靚）
開咗個箱先。
包裝盒，好長一碌嘢，正面印住TFZ全名，以及標註產品型號“X1”。
旁邊方框寫住“真無線藍牙立體聲耳機”。
藍色字體+白底，幾夾。
打開個盒，就可以見到X1嘅充電盒。（耳機主體喺埋入面）
藍色版連充電盒都係藍色。
盒底仲有個盒。
入面裝住X1嘅配件，有耳膠（兩set唔同形狀，各3對）、充電線同埋說明書。
充電盒係全金屬外殼，好有份量（2600mAh大電池應該都係原因之一），金屬磨砂質感良好，做工幾好。
正面只印有TFZ logo，細細個logo置中，簡潔之餘不失美觀。
充電盒底部印有耳機型號同埋參數，
側邊有Micro USB充電口（絕大部分真無線耳機都係Micro USB頭），充電口旁邊有指示燈。
打開充電盒，就可以見到耳機主體。
兩個耳機中間仲有多一個指示燈（長條形），不過合埋盒就見唔到，好似冇咩用。
充電盒蓋有“make it fully optimal”凹字，呢個係mifo嘅宣傳語。
TFZ X1係TFZ同mifo合作研發，應該係以mifo O5為藍本，但外觀設計上X1明顯更好。（唔信？自己去TB睇下O5設計係點）
即使外觀經過調整，同埋有TFZ參與調音，但X1嘅售價同O5（專業版，同樣係動鐵單元）都係一樣，
冇因為定制而加價，可見TFZ X1唔係一款貼牌吊高嚟賣嘅產品。
據聞某耳機廠嘅真無線耳機係貼牌+換面蓋（另一耳機廠SIMG*T嘅老闆係微博講嘅，我唔知佢係講邊款），售價就去到原產品三倍，咁睇落TFZ X1都幾有良心。
TFZ X1外殼印有TFZ全名，而且冇咗O5嗰條核突紅/藍線，個樣幾靚。
不過TFZ X1嘅實體按鍵設計麻麻，兩粒按鍵太細，太難操作，而且功能複雜，需要時間熟習操作。
如果下一代可以改成觸控操作，應該會更方便易用。
攞開耳機，可以見到充電盒嘅充電觸點有三個。
一般都係兩個充電觸點，好好奇多出嚟嗰個有咩用途。
耳機主體充電觸點，同充電盒一樣，觸點面積好大，估計係為咗提升充電效率？
耳機主體嘅做工唔錯，冇毛刺，而且貼耳部分觸感順滑，唔會刮耳。
到咗測試部分，採用堅果Pro 2S及小米MIX2S（均支援藍牙5.0）進行測試。
由於係藍牙連接，唯一影響音質嘅因素就係兩者連接所使用嘅藍牙連接協議。
比較遺憾嘅係，TFZ X1只支持SBC協議，並不支持AptX。
今次參與對比測試嘅耳機有小米AirDots青春版同埋QCY T1青春版，兩者均以AAC協議連接手機。
為咗方便理解，今次整咗張評分表俾大家參考。
三者中表現最好嘅係TFZ X1，合乎預料。
三款真無線耳機都係採用壓縮算法傳輸音頻，分析力上本來就處於劣勢。
而TFZ X1分析力比另外兩款好，主要原因應該係動鐵單元分析力有優勢。
另外兩款耳機用嘅動圈單元水準都麻麻，QCY T1青春版甚至聽唔清背景音樂嘅細節，全部混成一團。
低頻方面，QCY T1青春版低頻量少，低頻樂器聲音混亂而且生硬，失真頗為嚴重，
小米AirDots青春版好過QCY T1青春版少少，低頻量偏多（扣分）但質感仍不及TFZ X1。
TFZ X1低頻量喺三者之中相對適中，低頻有力而且細節還原表現相對良好。
中頻方面，TFZ X1聲音分離度好過其餘兩款，因此人聲冇受到其他頻段聲音干擾，加上分析力相對較好，人聲較為清晰。
至於高頻，QCY T1青春版本來分析力就差，再加埋高頻尖進一步影響聽感，所以低分。
小米AirDots青春版高頻都係有啲尖，但分析力表現比T1青春版好，所以聽感冇咁差。
TFZ X1高頻相對明亮，而且弦樂聲音分明，係三者中最佳。
連接穩定性，AirDots青春版同T1青春版都係realtek同一款藍牙芯片，表現幾乎一致，
搭地鐵嗰時使用（企喺度）放入左褲袋聲音偶爾會斷斷續續，要放入衫袋先會相對穩定。
TFZ X1放入褲袋信號都幾穩定（極少斷線），放入衫袋就未試過斷線，表現最佳。
延遲表現，AirDots青春版同T1青春版都係realtek同一款藍牙芯片，表現幾乎一致，延遲比較低，玩手遊嗰時聽得出有少少延遲，但影響唔大可以接受。
TFZ X1就唔知係咩芯片，延遲好低，玩手遊嗰時都難以察覺有延遲，表現最佳。
不過咁，真無線耳機由於體積&技術限制，聲音都係比不上同樣價格嘅有線耳機。
畢竟真無線耳機係集成埋耳放同解碼芯片，呢啲都要成本，而且空間限制，想堆料都難。
今次嘅TFZ X1都算係交足功課啦。 |
簡體版
訂閱頻道
訂閱電子報
發表於 2018-12-19 00:33
| 
話曬唔係咩HiFi廠出品，預咗嘅。
（個人覺得銀色冇咁靚）
