diputs

呢度之前有人問過架啦，當時好多解答：
凌天羽v 發表於 2015-1-28 22:49

咁都比你留意倒想唔分享吓經驗都唔得啦，不過真係衷心多謝當時各師兄既意見，可惜有D好有幫助的建議我跟唔倒希望今次樓主唔好學我咁心急拿拿林去搞。最重要係先肯定樓上漏水源頭已修理好，等天花乾透後再跟以下方法處理，佢地d專業人士叫士波令即英文的spalling，有興趣可係網上爬文。

1. 先將所有浮鬆石屎用鎚仔鐵鑿打開（當然可以用某些油壓鑽果類電鑿），要將有鏽蝕的鋼筋打通（可以將所有鋼筋表面油防鏽油，即四周起碼有約一吋空間），露出鋼筋的兩端就算石屎無被迫爆浮鬆都要多打一兩吋。

2. 將鋼筋表面浮鏽及炭化層用粗銼及粗黑砂布清除（用鋼絲刷效果唔好），如果鋼筋被鏽蝕至少於或只有原來直徑的3/4，要在該鋼筋旁補加一條比鏽蝕位較長（多約4吋）的新鋼筋，用硬鐵/鋼線係每邊繞數圈固定實，可以用電焊或風焊當然更好。

3. 清理好已除鏽鋼筋後（除污除油除濕），係鋼筋表面油上兩層灰色鉛水油（含高純度微細鋅粉的的防鏽油，會較紅丹即氧化鐵的防鏽油好很多，但我因時間太急未收齊料便油左紅丹衰左），較好的鉛水油如鎖鏈牌http://www.deconline.hk/goods.php?id=46價錢會較貴但值得。兩層油的方向最好互成直角。

4. 因鉛水油跟英泥唔黐，所以要等鉛水油乾透後再係表面油兩層或以上'英泥油'作防水(將灰英泥混合水泥黏合劑[BONDING AGENT-SBR]有FOSROC/SIKA/BONDTEC ，我用sika-Latex西卡膠皇，因有1公升裝，其他好大桶，唔建議用英泥寶因好多奸商會加水或賣假貨），濃度：混合後的型態--液態似稀忌廉。

5. 就算搵師傅做都要指定用包仔料唔好用一般英泥混砂，因果類特別包仔料內d砂係特殊較輕的一類而且有好多極幼小的膠纖維混合當中加強該種英泥砂的結連，同D英泥配方都跟一般街買果d唔同，黏力較高，所以每次施工的厚度做天花都可多至吋半厚。我用左馬貝Mapei Planitop HB25（HB25做一般士波令，HB40做受力橫樑）重有富斯樂 Fosroc HB25或HB40 或 Ronacrete Unicell 25/40可選。

6. 將處理好的爛天花面先油兩層膠皇做防水層，乾透後再係上面用海綿或噴水霧弄至稍濕潤但唔好水滴滴，然後將依指示混勻的天花泥用手或灰匙壓入要修補位置（天花泥不能太乾或大濕，太乾附著力較差，太濕會被地心吸力吸跌，稍作試驗就知道唔會好難），逐層約一吋厚做，第一層最好乾透才做第二層，之後每層乾約七八成做新一層，唔好等乾透，如果等乾透施工會難d，如果時間唔容許連續做要乾透再做就要每層完成後用粗鐵釘或鐵枝（約分半至兩分粗)係未乾英泥砂面抓約兩分深[S]坑，以加強新一層的附著力，新做一層時要先係前層面油一層膠皇加強黏合及防水作用。施工層的表面要漸漸調整至差不多水平，我最後留下約半吋厚做白英泥層及批灰（用罐裝平底漿）上浮膠漆。

其實最辛苦係反地心吸力的向天花工作，而且每層完成後要清理跌下的英泥都好係，不過想省錢及個底d工序著緊d都係自己做好，依家D師傅人工貴，分分鐘係錢，個底多數都係三扒兩撥，比個靚靚滑滑既面你就算。但如果係橫樑鋼筋鏽蝕迫爆石屎最好搵專業人士做因對結構有影響。

hongkongfun

回覆 11# diputs

想問問
全套架餐連材料一共要幾多錢？
買太多材料又怕用唔晒變浪費

diputs

當時材料費：馬貝HB25包仔料一包(25kg)$150；西卡膠皇1kg裝$50；白英泥6斤$18；紅丹一罐$3X；灰英泥2斤$6；平底漿1公升裝兩罐$4X。包仔料我用手拖車搭地鐵運。
工具有：鐵鎚，石屎鑿，粗扁銼，粗黑砂布，紅A膠桶約8寸高，膠鏟（開包仔料），油灰刀，鋼皮，橡膠手套，3M護眼膠鏡，3M口罩，及一般油乳膠漆工具。
膠鏟用類似厘種，果時係12蚊店買，

其實材料同工具錢相對人工係好有限，所以我建議就算$3XX都要買罐好品質鉛水油做鋼筋面防鏽處理。DIY除左有成功感外最重要係對品質有較高要求，因一般唔可以要求d師傅點樣點樣做（佢地係專業我地唔係）。