12吋座檯風扇換摩打

本帖最後由 C_Law 於 2020-8-19 02:48 編輯

之前係另一個 Post 見到有人問關於電風扇轉軸啜到好實的問題，當時我就話可以試下換摩打。
https://www.hkepc.com/forum/viewthread.php?fid=19&tid=2575896

其實我都有把好舊(可能 15+年)的 12 吋座檯電風扇都有這問題，夏天每隔半個月至一個月就要拆開落一次油，拆得多都覺得煩。上次回 Post 後剛好要去淘，就順手淘埋個摩打返來，之前已換上了，趁今晚打風落大雨無得出去跑步，就開個 Post 講下。

係淘寶見到有行 Bearing 的摩打，希望不會太快就用到舊會啜實枝軸。(上面舊 Post 的圖)

淘寶賣的摩打話係 16 吋風扇用，但我見摩打尺寸同我個 12 吋風扇係差不多，就買返來試下。來貨包裝一個發包膠箱，都幾穩陣。

同我把扇的舊摩打比較，尺寸有小小出入(藍箭嘴指出同我把扇原裝摩打相對的位置)。

前軸凸出的長度比我把扇的原裝摩打長了大約 1cm，「Kick」住扇葉條柱的位置亦都相差大約 1cm。扇葉裝前了，我都有擔心轉動時會撞到風扇前罩，不過裝入去試下，見到其實原本扇葉距離前罩有好多空位，即使向前伸多 1cm，都未有耐會撞到前罩。

不過問題係相中垂直枝軸也長了大約 1cm，安上我把扇後，摩打升高了 1cm，結果用作遙頭的鐵片位置不對，這鐵片由本來水平到夾硬打斜去裝，鎖得到螺絲但用起來遙頭到某個位置會轉不到。

新摩打的搖頭齒輪箱距離搖頭鐵片有一大段距離。

不過比較新舊兩個摩打尾的遙頭齒輪箱，舊箱接去鐵片的 L 形軸位置係比較低，而新舊兩個箱裝上摩打的孔位係一樣，於是試下將舊摩打齒輪箱拆出來裝去新摩打，距離收窄了(幅相角度影不好，看似已連接，實際上是還有距離)。

結果成功裝到，上螺絲鎖上搖頭鐵片後嘗試開風扇，可以搖到頭，但由於塊鐵片仍然係由正常的水平變斜，變相水平距離縮短了，結果左右搖頭時兩邊的擺動幅度明顯係偏向一邊。

以相機的角度講，向左去到盡只係稍為轉過正中小小。

但向右去到盡就轉好多。

暫時將就用住先，反正我用這把扇有九成以上時間都係固定個頭，搖頭不對稱對我的影響不大。不過我都見淘寶賣風扇配件的舖頭有賣不同長度的搖頭鐵片，下次淘開先至淘返來。

接線方面，大致上很跟返淘寶店網頁的接線圖，不過我把扇無 Timer，插蘇頭的 L 線直接駁去排開關掣的 Com。

我把扇的舊摩打線原本係直接駁去一排開關掣，拆舊摩打時，專登保留一段駁住開關掣的線，經簪玉(右邊)駁去新摩打的線。

除此之外，舊摩打的金屬殼本來有個螺絲位用來駁 Earth，但新摩打無。為安全計，拆舊摩打時保留了條黃綠色的 E 線，將它駁去新摩打個搖頭齒輪箱的其中一粒螺絲，之後有用它錶試電阻檔試過，兩枝針一邊搭插蘇頭的 E 腳，一邊搭去摩打的主軸(正常使用，唯一人手會碰到而且有機會漏電的位置)，結果係短路的，應該可以安心使用。

同舊摩打比較，換上新摩打後，感覺比較靜，也大風(開最細時感覺上已等於以前開最大)，不過大、中、細風的分別不明顯。開著轉順後熄掣，扇葉繼續轉多接近 20 秒先至完全停，以往就算剛加了油都係不到 10 秒就停。當然，目前仍然係新，耐用與否就可能要等多兩三年後先至有答案。

順手度埋三個風速的 W 數。

附件: 您需要登錄才可以下載或查看附件。沒有帳號？註冊

1

0

mdws2002

Moderator

Rank: 7 Rank: 7 Rank: 7 Rank: 7 Rank: 7 Rank: 7 Rank: 7

2^#

發表於 2020-8-19 01:19 | 只看該作者

之前係另一個 Post 見到有人問關於電風扇轉軸啜到好實的問題，當時我就話可以試下換摩打。

其實我都有把 ...
C_Law 發表於 2020-8-18 22:50

我都買咗個返嚟換。
舊嗰個摩打換完棉花加完油之後無曬速度。
希望換新摩打可以順順利利。

via HKEPC IR Extreme 4.2.3 - Android(4.2.0)

TOP

C_Law

進階會員

Rank: 3 Rank: 3 Rank: 3

3^#

發表於 2020-8-19 02:00 | 只看該作者

我都買咗個返嚟換。
舊嗰個摩打換完棉花加完油之後無曬速度。
希望換新摩打可以順順利利。

via HKEPC IR ...
mdws2002 發表於 2020/8/19 01:19

或者拆過摩打殼後再裝就對不準軸心。我把扇都係，以前每年開始熱要用風扇就係摩打軸滴一次油(係外面滴落去，無拆摩打殼)，足夠把扇用到天氣轉涼。但後來因為試過燒裡面的 Thermal fuse，要拆摩打殼換 Fuse，當時有順手抹乾淨枝軸、加油……etc，從此之後，就變得好易啜實，未到轉涼又要再加油，而且越來越頻密，到現在十幾廿日要加一次油。就係一年拆幾次落油拆到怕拆到煩，終於頂不順換摩打。

TOP

enozemail