[開箱] P仔 CoreXY 登場

ustkl

承蒙各位師兄師姐嘅眷顧, P仔響本地3DP界都算係佔咗一小片位置. 呢幾年都踢咗唔少新手入坑. 雖然有一部分玩兩玩就放埋一邊, 不過亦都有朋友因為部機嘅啟蒙發展咗自己嘅事業出嚟, 都算老懷安慰啦.

不過而家啲大陸機越嚟越平, 而且已經脫離咗垃圾嘅階段. 亦都多咗好多代理唔使上淘寶隔山買牛. 所以競爭都好大, 論規格表面上P仔真係輸蝕左少少嘅 (講到表現就當然唔係啦)

搞咗咁多年入門Delta都係求變嘅時候啦, 雖然之前搞過高級大部嘅Delta, 不過覺得Delta越大部就會越高, 感覺越阻地方. 諗諗下都係四方形面積比較實用, 就不如試下搞CoreXY 啦.

自己嘅設計取向一向都係目標為本簡單直接. 設計嘅過程嘅後段就係將啲嘢盡量簡化, 越簡單鑊氣氣就會越少, 部機就會越好用 (當然有用嘅嘢係唔會刪除啦)

其實驟眼睇都係四四方方, 究竟又有乜嘢特別之處呢.

下載 (139.68 KB)

2021-6-6 05:17

圖中係200mm版本, 簡單解釋一下結構, 其實都係好普通嘅底面兩塊鋁合金Cutsheet中間夾住啲類型材, 花多少少用2040型材會穩陣好多左右再加多條橫樑噉就超硬淨啦. P系列設計都有一個特點, 就係攞位攞到幾盡下, 打印尺寸204x204mm, 但係機身框架佔地只有320x340mm

下載 (116.73 KB)

2021-6-6 05:17

呢部機最大嘅特點就係個Z平台, 有別於一般機器用光軸, 用上Openbuild 滑輪, 而且係前2後4 共六個. 所以無論前後左右方向都Guide住咗, 唔會好似以前用光軸嗰啲成個平台可以搖下搖下. 個平台由2040型材同埋cutsheet組成所以好穩陣, 一條螺絲桿就可以順滑升降, 放喺左邊, 因為嗰度係成個平台邊緣嘅中心點, 放響嗰度剛性就最高啦.

下載 (126.79 KB)

2021-6-6 05:17

下載 (132.78 KB)

2021-6-6 05:17

至於Corexy 部分, 好簡單咁將直線導軌上落塊板度, 安裝惰輪Bearings利用了 唔同長度嘅銅柱. 呢部分已經將零件數量減至最少啦. 不過有樣野唔慳得, 圖中呢個係比較先進嘅Corexy 皮帶路徑. 優點係摩打動力點同埋印頭拉力點兩邊嘅皮帶長度相約, 唔會一邊好長一邊好短所以拉力會比較平均, 因為噉樣用長咗100mm皮帶同埋用多咗8個惰輪Bearings.

下載 (127.94 KB)

2021-6-6 05:16

略為鬆一鬆固定摩打嗰三口螺絲, 再用粒用手擰螺絲就可以調校皮帶鬆緊, 調好之後上返實個摩打就完成, 都算做幾方便啦

下載 (87.46 KB)

2021-6-6 05:18

下載 (58.34 KB)

2021-6-6 05:18

打印機嘅核心, 呢個亦都係花得最多時間設計嘅一部分, 今次連extruder 都整合一齊, 採用了BMG dual gear 那套齒輪，但佈局略為修改， 推料齒與打印頭的距離比原版BMG更近， 按住入料亦都比原本的拉開入料順手, 重量會盡量偷輕, 大約300g左右, 已經包括了Hotend 同埋三把風扇. 頭頂插上度身訂造的斷物料偵測器. 摩打軸心插上一件膠件顯示運作狀態.

下載 (132.77 KB)

2021-6-6 05:16

呢張圖係能夠印300x300啲大版本, 設計套路同200大致一樣, 不過因為部機大左有d部分需要加強, 每邊加多一條橫樑, 後邊中間柱改用2060, 前面上下亦都用上了兩片鋁合金cutsheet加強剛性. 由於設計攞位攞得好盡,佔地比只能印250x250 的Ender 6更小.

下載 (119.49 KB)

2021-6-6 05:16

部機大咗就要用兩條螺絲桿先至夠穩陣, 點解一前一後嘅?當然係好啲先至敢擺啦. 細心留意嘅話有兩條螺絲桿亦都有兩個endstop switch. 呢部機係Z Home max嘅

下載 (138.13 KB)

2021-6-6 05:17

很多朋友都將Z wobble 歸咎了螺絲桿。其實主要原因都係Z 管得唔夠硬， 被螺絲桿的螺紋帶住走。只要管好Z滑動， 並且給螺絲桿有一點浮動空間就可以大大改善， 其實好多機器螺絲桿個頂都係好自由咁冇任何管束， 不過由於呢部機係home max, 個平台home落到底條螺絲桿頭可能會搖得好勁, 雖然對功能冇任何影響但係唔好睇所以整嚿咁嘅嘢略為管束下佢。

下載 (129.94 KB)

2021-6-6 05:17

右邊兩條鋁型材之間有很多空位用嚟放電源電子元件就剛剛好。電線膠料放曬響右邊, 左邊同背脊就可以拍埋牆啦

下載 (119.87 KB)

2021-6-6 05:17

由於所費無幾, 所以加左條RGB燈條, 當堂sharp醒咗, 除咗可以照平台仲可以照招牌. 正正經經用嘅話可以Set白燈, 當然仲可以set紅橙黃綠青藍紫亦都可以set 變色閃燈呼吸燈等等(不過很抱歉冇ARGB變色走馬燈) 真係夠曬光污染啦.

搞得CoreXY, 當然仲會再諗下新搞作, 之前玩過一輪切換式雙頭Delta, 不過搞搞下就冇搞. 唔知點解, 印單色係唔會覺得淨係得一隻色, 不過印雙色嘅時候就會覺得”淨係得兩隻色咋”.

不過響Delta玩多過兩隻色真係有啲難度(唔好同我講用大文頭).. 唯有寄望CoreXY.喇.

alancck

ching嘅機係要啲初哥
受夠淘佬啲三尖八角平價機，
至知ching嘅機係物有所值，
而且香港係靠質素建立品牌，
鬪平鬪賤唔會係香港嘅強項，
ching對3d打印嘅貢獻有目共睹

ustkl

回覆 2# alancck

平價大陸機已經進步咗好多, 不過都要睇下你識唔識玩同埋好唔好彩, 因為QC bug 點都會有, 新手係好難察覺. 以 Ender 3為例子, 有啲朋友買咗返去可以爽爽用, 有啲朋友買咗返去印極都係一pat屎調唔到平. 可能主要原因都係嗰批滑輪嘅質素.

之前出過Post, 發現市面上能夠買到嘅滑輪普遍都有以下問題, , 如果你識解決嘅話. 啲轆仔可以爽到直線導軌噉. 如果你部機粒粒個車轆都perfect噉就恭喜你啦. 萬一有幾個有一啲虛位. 如果響Y平台, 由於Ender3只係夾住一條2040嘅型材 (3 Pro 改咗用4040) 響滑輪夾住咁窄嘅嘢去承托一個20幾cm嘅平台. 滑輪有一小點虛位平台就會放大, 所以搞到有啲師兄調極都唔平要成日再調過.

不過CR嗰啲轆仔都算係幾好架啦, 再平一個級數嗰啲,啲轆仔可能off centre, 響條路軌行嘅時候一路瞌下瞌下添啦. (據我所知嗰啲轆仔嘅生產過程, 首先係啤出嚟, 之後會用車床車返圓個外皮. 如果為左省成本skip左呢個步驟個轆就有可能唔夠圓)

除此之外呢啲機都係預你會改裝, 無論係花大錢改裝定係動腦筋用少少錢改裝. 改裝方法可以話係層出不同, 我去過一個台灣FB Group, 居然有人覺得啲轆係冇可能搞掂時光倒流整咗套光軸改裝套件, 竟然真係會有人買. 其實我響大小討論區同埋FB Group 都提供過一啲唔使點樣花錢嘅解決方法, 不過而家嘅資訊量實在太大所以應該石沉大海有緣先至會見到.

-13-

請問第一張圖係咩畫圖軟件黎?

HK_MUSIC

可能有好多啲師兄係想由200*200升級去300*300

ustkl

回覆 5# HK_MUSIC

用開100嗰啲想升級做200, 用開200嗰啲想升級做300. 正所謂一寸長一寸強, 不過首先要諗下自己有冇位擺先. 雖然P仔的機位已經攞到好盡, 都避免唔到300版本睇落都幾大部.

不過哩個只係感覺, 可能一台300嘅龍門機成個晾衫架噉樣睇落冇咁阻埞, , 事實上佔地係多好多尤其是要預埋平台移動嘅位置.

ustkl

回覆 4# -13-

Solidwork

-13-

回覆  -13-

Solidwork
ustkl 發表於 2021-6-8 10:37

多謝指教

Super169

回覆  HK_MUSIC

用開100嗰啲想升級做200, 用開200嗰啲想升級做300. 正所謂一寸長一寸強, 不過首先要諗下 ...
ustkl 發表於 2021-6-8 10:37

我用緊 300x300x400 既龍門機, 因為係平台移動, 佔地好大, 前後係要預 600 有多.  
如果 CoreXY 既結構, 應該可以省地方D.   

雙頭做得好, 都吸引架, 唔一定話有雙就要三既.
主要係想用另一個頭印 support, 有時拆 support 拆到想換機既.  不過, 水溶既 support 料都仲係好貴.
家陣買料全買白色, 要色就自己噴, 反正幾多色都唔會夠, 除非你做到自己溝色.

ustkl

回覆 9# Super169

如果玩雙頭, 最好嘅方法就係IDEX, 即係有兩個頭喺X獨立行走, 可以完全杜絕閒置打印頭漏膠嘅汙染. 而家淘寶要搵隻依類型嘅機都唔難, 都係四五千人仔. 不過全部都係龍門機.

Delta 只可以玩切換雙頭, 雖然閒置嘅頭會升起, 不過亦會有漏膠嘅狀況. 如果是Corexy, 還有一種方法就係玩Toolchanger, 不過玩得Toolchanger就唔會淨係玩兩隻料咁大嘥.

PVA 呢一樣嘢我都試過兩三間, 當然都係淘寶貨. 不過呢樣野真係好麻煩成日都要保持乾燥, 開一陣間就會軟曬好難印. 最大一個問題就係佢同PLA唔係好黐, 有時一啲面積較小嘅support好容易印印下甩咗出嚟. 嬲嬲地用返普通料做support 算數.