hk133

Rank: 3 Rank: 3 Rank: 3

1^# 跳轉到 » 倒序看帖

打印

字體大小: tT

發表於 2023-11-27 06:56 | 只看該作者

【不推薦購買】Savewo 救世 USB-C ProCable LED 評測

本帖最後由 hk133 於 2024-2-27 11:13 編輯

（本文所有圖片，點擊圖片即可查看原圖）
是咁的，9月尾嗰時見到 Savewo 救世隨著 iPhone 15 Pro 推出，
跟風出咗條 240W USB4 嘅 LED 功率顯示充電數據線，

全稱「Savewo USB-C ProCable LED 功率顯示 USB4.0 Thunderbolt 4 極速充電傳輸線」，

雖然個款一睇就知係某特賣城同款，而且特賣城早於今年2月就賣緊，
不過見 Savewo 個價錢唔係貴太多，照道理有牌子都應該有返多啲保障，
用料可能都好過某特賣城啲雜牌？所以就訂咗幾條唔同色諗住試下。

係估唔到原訂大約一個月到貨（31-40日），
但過咗一個半月，都係冇聲氣，電郵查詢得到嘅回覆係「工廠還未交貨給我們」，
最後11月25日先拎到手，認真漫長。

睇返個包裝，幾乎係全日文，估計係打算銷往日本？
文法冇咩問題，唔似某啲扮日本牌子咁，寫到亂七八糟。
Savewo ProCable LED 支援 USB 4、Thunderbolt 3/4 40Gbps 高速數據傳輸，
以及 240W PD3.1 高速充電，亦支援最高 8K 60Hz / 4K 144Hz 超高清影像輸出。
正面包裝圖片 show 埋個 LED 功率顯示屏幕出嚟，條線嘅重點就係呢樣。

包裝側面都係介紹產品特色。

包裝背面有埋詳細資料，而鈦金屬原色以及藍色都有各自嘅產品型號，
原色型號最後係 TI，藍色型號最後係 BE。

開條藍色試下先。打開包裝，裡面有一張紙，充電線用磨砂質感嘅膠袋入住。

張紙正面係感謝選購產品，背面就提示用家「高速充電時切勿接觸金屬接頭，以免燙傷」，
為咗睇下個發熱量係咪真係咁誇張，一陣我就用熱成像相機睇下究竟有幾熱。

充電線做工睇落還可以，金屬外殼四邊厚度均勻，
不過金屬殼下方塑膠抗彎曲部份模具線比較顯眼，而且邊緣有突起，
考慮到插拔線材時主要就係捏住呢部分，對手感都有幾明顯嘅影響。

同某特賣城賣緊嘅同款對比，真係孖生兄弟咁款。
線材刻字除咗 USB 4 之外，其他文字甚至圖案都一樣，
但反而某特賣城嘅貨模具線冇咁凸。

跟住就試下某特賣城雜牌 vs Savewo，睇下功率顯示邊個準啲。
測試以維簡科技 C2、C4 讀數作對比。
維簡啲測試器出廠前經過校準，有一定參考價值。

首先係 Savewo，維簡 C2 功率讀數為 42W 左右，而 Savewo 顯示 37W，誤差達到 11.9%。

到某特賣城雜牌，維簡 C2 功率讀數為 42W 左右，而雜牌顯示 43W，誤差 2.38%。
測多一次，話唔定係我隻 C2 嘅問題呢？今次加埋 C4 參與測試。

今次就由某特賣城雜牌測先。呢次雜牌同維簡 C2、C4 讀數一致，都係 42W。

然後 Savewo 再嚟一次，結果⋯⋯都係一樣，C2、C4 讀數依然係 42W，
而 Savewo 繼續有自己嘅想法，都係顯示 37W。

可能咁啱我呢條有問題呢！開多條鈦原色試下先。
點知一開就開到另一個驚喜：

高溫提示紙買一送一！
畀多咗好過畀漏咗嘅，冇問題，冇問題。
用呢條再測一次功率顯示更重要。

梅開二度.jpg
依然係顯示 37W，好有個性。
睇嚟出廠之前冇校準過顯示讀數。
唔緊要，睇返條線先。

藍色同原色如果唔拍埋一齊對比，其實唔係太睇得出顏色上有咩區別，
不過一拍埋一齊就好明顯，不過兩隻色都好睇嘅。

用 C4 讀取 E-marker 芯片資料，發現兩個嘅 E-marker 真係⋯⋯
不能說是極為相似，只能說是一模一樣。
因為真係完全一樣⋯⋯
唔止芯片生產商一樣係 Chengdu Convenientpower，
連其他讀取數值都係一樣，一字不差。
確實係失散多時嘅孖生兄弟。

又講返 savewo 個顯示讀數嘅準確度，
其實如果係測試低功率嘅話（4W & 8W），條線測出嚟嘅數值大致上係準確嘅。
不過買得呢啲線，就梗係唔會淨係用嚟測低功率設備啦。

同某特賣城雜牌（下）嘅顯示屏幕對比，savewo（上）嘅 PD 字體大啲，
以及兩者顯示顏色有少少色差，除此以外可以話係冇分別。

最後就係溫度測試。
講到叫人充電嗰陣唔好掂個插頭，係咪真係有咁熱？
作為對比，加入維簡 C2 及 C4 參與測試。
測試功率依舊係 42W。

第一次測溫，金屬殼嘅維簡 C4 表面溫度 37.8°C，膠殼嘅維簡 C2 表面溫度 35.5°C，savewo 金屬插頭表面溫度 37.8°C。

六分鐘後第二次測溫，金屬殼嘅維簡 C4 表面溫度上升至 42.4°C，膠殼嘅維簡 C2 表面溫度上升至 40.7°C，而 savewo 金屬插頭表面溫度上升至 44.7°C。

再睇返第二次測溫嘅圖片，不過改變一下測量點：

savewo 另一端插頭溫度係 38.5°C，同 LED 屏幕一端對比，相差都幾遠。
其實測量功率嘅過程中，測試器都係會發熱，
再加上呢種線嘅設計係將測試器縮細再塞入本來空間已經不大嘅插頭內，
體積細更難散熱，所以導致溫度會偏高，僅僅六分鐘就上升咗將近 7°C，
難怪 savewo 要特別加張紙提醒用家小心燙手。

不過功率測試誤差比想像中大，甚至不如某特賣城嘅雜牌同款，
感覺好似做咗水魚？買貴咗，質素仲差咗。
不過考慮到 savewo 係跨界賣埋充電線，仲要係第一次就玩埋 LED 功率顯示呢種 gimmick 嘢，
會炒車其實都係意料之內，客氣啲就講「不完美，可接受，要改善」，
唔客氣嘅話⋯⋯就無謂講啦，免傷和氣。
⋯⋯
你以為去到呢度就完？#18仲有後續，估唔到有反轉，留意 update。

——————

2024/01/28 update：
喺 2023 年 11 月 27 日，就產品缺陷以電郵方式聯絡 Savewo 救世，對方曾經有回覆表示願意更換產品，但未曾提供更換地址。
2023 年 11 月 30 日後亦未有再回應電郵，今年 1 月 4 日亦有再次以電郵方式聯絡查詢，但 Savewo 救世至今未有任何回應。
因此本人並不推薦各位選購 Savewo ProCable LED。

2024/02/27 update：
再經過多次電郵聯絡後，Savewo CS 總算安排到換貨，但就冇回應係個別問題，抑或佢哋啲貨全部都係咁。
更換後產品經過測試，確認功率顯示讀數問題依舊，因此維持不推薦購買嘅評價。
詳情可參閱 27#。