中左毒...唔識搵解藥..

Super169

小弟雖然在 HKEPC 吹水左幾年, 竟然唔知有個咁得意既 forum.  
最近因為睇模型介紹時, 開始認識到家用既 3D Printing.  一直我都知有呢樣野, 但只知係工業生產, 或者大公司做模時用, 無十萬八萬都唔駛諗果隻.
原來家陣幾千蚊都有交易, 比佢吸引住, 呢幾日傻更更咁刨文, 睇到中左毒, 好想即刻買部番黎解毒, 對住咁多隻藥, 出左好多問題了.

先自己介紹一下, 首先我對 3D Printing 可以講係全無認識, 在我眼中只係一部比較特別既 printer.
本身有過下 3D modeling, SketchUp 同 Maya 都叫做玩過下, 基本上簡單既立體圖都可以做下, 但都係好簡單既野 (之前都係用黎倏室內設計, 傢俱既形狀都好簡單), 只可以講係有個概念.   但我唔知呢 D 立體圖, 同 3d 打印既要求會唔會唔同.
唔知我咁既料子, 買部機番黎會唔會舞唔掂?

刨過 D 文, 有講如果想買機, 應該考慮 D 乜, 咁我先講下我既需要:
(我用呢個 post 入面 DoCogo ching 講既幾點去考慮 http://www.hkepc.com/forum/viewt ... &extra=page%3D1 )
1) 用途, 純粹個人興趣
   (1) 想用黎印 D 公仔 (多數係機械人)
   (2) 印 LEGO 既 parts 比個仔砌野 (有時唔想D邊位咁硬直, 希望可以自己做D圓滑D既 parts 修靚D)
   (3) 印 D 小飾物, 或者零件玩下
   (4) ..... 諗到乜就試下做個圖印下黎

2) 價錢: 10K 以下都可以接受, 當然, 平靚正就最好喇.  
   不過, 如果可以網上搵到 D 模型既檔案, 可以自己印盒模型出黎, 又可以比多 D 了.  省番好多買模型既錢, 仲可以隨時自己改裝模型, 比多 10K 都可以諗.
   (我最初見 3D printer, 係因為見到呢度講 BANDAI 用 3D Printer 印模型測試版 http://www.mech9.com/blog/2009/1 ... ing-of-gundam-kits/ , 唔知網上有無得 download 呢 D 檔案).

3) 耗材: 當然係可以用淘寶貨就最好喇, 初初玩肯定整唔少垃圾出黎, 耗材平真係好重要

4) 打印平台大小: 由於屋企地方所限, 我見可以打印 20x20 既都唔細, 選擇唔多, 而且我諗我初初印既野都唔會好大, 我可能會買細少少既.

5) 維修, 保養: 真係唔知邊幾隻有本地既 維修, 保養?

以我既預算, 搵到呢幾個型號可以考慮, 希望 ching 們可以比 D 意見(由平到貴排):

Buccaneer      (要 2014-02 至有貨, 但價錢好吸引, 睇落好似幾仔細, 只可打印 15x10x12, 0.1mm)
Delta Robot    (淘寶 3800人仔, 最大舊, 有ching提, 好似係港人既, 可打印 20x20x22, 0.15mm)
Come3D         (淘寶 三千幾人仔, 佢個 sample 車仔好似幾靚, 只可打印 12x12x12, 0.3mm)
Solidoodle 2   ($499 未計運費, 佢 $599 加左乜野我唔多明, 只可打印 15x15x15, 0.1mm)
Solidoodle 3   ($799 未計運費, 至貴呢部, 雙頭可以一次出雙色, 可打印 20x20x20, 0.1mm)

我本來想睇 spec 比較下邊部印出黎最靚 (假設我唔介紹等佢印), 但睇左 D 數字都唔係好 sure 有無睇錯, 希望 ching 可以指點一下:
唔知可唔可以用每一層既最低厚度, 去睇佢.  因為基本上我見佢地講到 XY 都好準, 而且多數都係話見到一層層, 會唔會睇佢出既點有幾細而決定到? (當然, 部部機都有其他唔同因素, 但單獨比較spec,唔知可唔可以咁睇?)
本來之前睇過有個 post, 有ching講過唔同 layer 厚度既影響 (大概好似係0.5mm數到, 0.3mm睇到數唔到,...), 不過我搵唔番.

如果我想印到既機械人, 大約係 1:144 既大細, 唔知 0.3mm 既會唔會明顯有紋?  用砂紙可以磨番靚嗎?
唔知有無 ching 試下 download sketchup 3dwarehouse 入面既 gundam 公仔, 打印出黎既效果如何?  我想知 0.3 同 0.15 或者 0.1 分別有幾大.  

本來仲有 D 打印既問題, 不過一次問太多我怕太亂, 遲下再向大家請教.  唔該哂大家先.

Super169

唔記得講, 我自己初步諗住 Solidoodle 2 好似幾適合自己.
一來價錢 OK, 計埋運費我估 5K 有找, 雖然印唔到 20x20, 但我諗我夠用了.
唔知 ching  們會點比較果幾部機?

如果有其他適合又正既, 希望 ching 可以推介下.
我見好多人提 閃X, 但又見呢一個 post 有 ching 投訴佢既售後服務...由於我乜都唔識, 如果售後差既, 我唔敢考慮了.

julyxiv

我覆唔哂你的問題, 要等其他師兄出手.

用到SketchUp 同 Maya做3D printer的model應該夠有找, SketchUp要裝plug-in去export .STL file

1.1) 印figure唔易但可行, 但如果gundam就難好多, 未必做到咁精細, 你預咗補畢地/痴膠水就可行的.
1.3) 小飾物好難講, 因為家用機的support同工業級粉機有好大差別, 介子反而難印, 零件比較容易.  去www.thingiverse.com睇下人地印到的你啱唔啱胃口?

2) 價錢, 如果外國機先要10K, 淘寶機相宜好多. 有人搞緊閃鑄團購, 可考慮.  
但3D print同注塑模型係無得比的. 如果你係target Gundam果個level的話, 最好慎重考慮, 未必deliver到你要的.

3) 耗材, 淘寶大把, 呢度個個都係用淘寶的, 冇咩去外國訂.

4) 尺寸你好快唔夠, 如果有位就買大D啦

5) 無一隻有保養. 但呢度師兄多, 有咩事可叫救命, 應可以幫到手.

我用緊Solidoodle 2, 加果個係叫heat bed, 必用, 無heat bed係print唔到ABS, 只能print PLA. 都係果句, 除非Budget好多買makerbot Replicator 2X, 否則淘寶機吧, 無咩分別.

0.1就睇唔到, 但tune到你暈, 而且印件時間係以十小時計, 要好有耐性.

1:144 我會勸你用雙星板+畢地自己整, 雖然我好想你入局一齊玩3D printer, 但用佢來做1:144你真係有排執, 記住3D printer一定印唔到刻線, 在不平滑的ABS面刻線....

Gundam真係無印過, 呢D咁高難度的要tune得部機好好的師兄先可以試

0.3 0.15 0.1 隨了表面平滑好多無咁分別, 但機要tune得好fit, 時間亦倍數上.

P.S. 售後無一間係得的, 包括solidoodle
       0.1 都係同注塑無得比的, 一樣要同砂紙磨, & 自己刻線, 小心.

lawhun0083

Ching 點解Budget多買makerbot Replicator 2X ?
部機有咩咁特別?

Super169

回復 3# julyxiv

好多謝 ching 咁詳細既回覆.

我真係唔清楚印出黎既效果會係點, 網上睇好多都印得好靚, 但我唔知佢用乜野機.  
我見有 D 倒 液態樹脂整既, 超仔細, 例如 MiiCRAFT, B9 Creator, THE FORM 1, 但部部都唔平, 全部超出我既預算.

因為我見大部份都係印到 15cm 左右既高度, 所以應該只可以印出 1:144 (大約係 12.5cm).
如果可以去到 18cm 以上, 至可以考慮 1:100.  
又或者拆開佢幾截再駁番埋, 應該可以用黎做 1:100.  其實 1:100 仲好, 同 D MG 模型配番.
如果網上可以搵到成盒模型既檔案就可以唔受限制了.  相信都無乜可能, 否則好多人都買部靚機印模型算了, 爛左邊 part 都可以自已補番, 仲可以自行改版.

唔知如果印一個類似呢個 Zaku 公仔, 可唔可行呢? (網上搵既 sketchup 模型)

下載 (128.68 KB)

2013-7-15 01:01

因為我見好多 sample, 印出黎既都比較簡單.  好少話成個公仔咁印, 唔知會唔會要加好多 support.
支鎗下面我相信會加左好多 support, 但係機身入面既位, 好多唔係由下面直上, 可能中空左一部份, 最簡單例子係隻眼個窗口, 會唔會都加滿哂 support 柱, 之後有排拆?

得我去搵下閃鑄團購, 如果平平地搵一部試下先都好.

Super169

剛 去左 團購報名, 希望成到團, 如果一大班人一齊買, 有乜錯漏都多 D 人幫手...當然, 無事就更好喇.

我再睇番 閃鑄 官網既介紹, 應該係 Replicator 既 山寨機, 有雙頭係咪即係抄 Replicator 2X 既?

julyxiv

回復 4# lawhun0083

唔好意思, 我講嘢唔清唔楚令你誤解
我冇用過Replicator 2X, 不過MakerBot係全最早做家用機 (之一掛, 唔想摷料証實), 又係最多人用的品牌 (都係之一啦...懶). 成個淘寶都係抄佢咁滯, 包括閃鑄.

我之所以話如果Budget多打算買Replicator 2X就無嘢講, 係因為等於有人部想買話跑車玩下, 佢budget夠&打算買....波子...咁呢D情況係真係除咗支持外無咩好講.

價性比佢一定唔高, 但佢個品牌咁堅, 又在市場咁多年, 應該最無鑊氣係佢. 但一樣, 暫時都係無香港保養.

julyxiv

回復 5# Super169


    除非過百萬的粉機, 呢隻渣古係無可能一次成型咁印. 你講得啱, 因為support太煩係拆唔到的. Support用粉就另當別論.

如你好好心機拆件印呢, 當然可行性大大提高.  我未印過高達, 只係砌過下. 我估, 真係段估, 小心被我老點:

1) 有D parts如果可以, 用番膠板做或現成補品會仲快, 如氣喉, 3D printer的解像力無咁高, 咁幼的圓管好難搞得靚.

2) 所有刻線要重新自己刻

3) 接合位一定唔準, 請預鬆小小再補畢地

4) 面好鞋, 請全隻上畢地

另外, 有些紙上談兵的嘢給你考慮:

Z解像度是0.3mm (當然你可調0.1mm, 但不一定成功), 噴咀是0.4mm (也可改為0.2mm, 又係難度挑戰), 在這個解像度你應該估到Gundam類東西係會唔夠的, 全部要後製. 但等於你要用0.4x0.3mm咁粗的膠條去砌佢出來. 你玩開都知, 改gundam時你用的雙星膠板, 刻線針等, 有幾可咁粗?  

但咁不等於無用, 用3D printer做個初型, 再補畢地後製, 就做到.  因好多parts係不能用膠板做的. 不過, 咁多心機, 手快及熟手的話, 用泥/畢地自己雕可能仲易. 但又被你搵到現成3D model的話, 咁又另計

我真係好希望你入3D printer一齊玩, 但如果主力想用佢砌Gundam類就真係要三思.  你見thingiverse無咩人做figure就知, 呢個係佢的limitation. 你做到show出來的, 都係畢地嘢.

另外樹脂呢, 除非你係死士級, 因為機貴不在講, (原裝)液態樹脂貴到無輪, 亦不好運送, 開封後亦會好快過期(環境有UV), 仲未計污水點處理?!

我文字表達能力差, 請見諒

julyxiv

回復 6# Super169

簡單答你, 係

淘寶十有九都係山寨MakerBot同Ultimaker的機. 如果其他品牌叫山寨, 閃鑄就係高仿. 所以咁多師兄一買番來未tune就印到嘢 (印到, 但都要tune先夠用, 但已經爭好遠).  能力高的師兄 (我絕對唔係) 會自己改到部機合心水. 有咩事, 大不了買佢原裝parts, 貴, 但都平過外國貨.

Super169

回復 8# julyxiv


好多謝 ching 咁詳細既解釋, 我諗我大概明白了.
可能因為我太注意睇個 spec, 同埋睇得太多 sample viedo, 將唔同既機撈到亂哂.
我見隻 MiiCRAFT 可以印到勁細緻既傢俱 (手指頭上既椅子, 最細 5microns), 成個通心波仔都印到, 諗住平價機應該大兩三倍無問題掛.
可惜呢部機只可以打印好細既野 (43mm x 27mm x180mm), 如果唔係...$2299, 比多幾 k 都真係有點心動.
聽完 ching 既講解, 我諗兩者使用既技術上有好大分別, 所以出黎既成品細緻度唔係價錢上既差別咁簡單.

不過, 我都想試玩下, 但係就暫時放低整機械人既諗法, 先了解下佢出黎既野可以點用.
將來真係覺得好好玩既, 至儲下錢買部精細既 (幾年後, 我估 B9 creator 應該見得人, 或者 THE FORM 1 都平番, 又或者有類似技術既平機).

另外想問問, 我見有 post 講 PLA 在 60 度開始會慢慢變軟, 去到 180 度就會溶.  ABS 好似可以受熱高 d.
我本身有玩開軟陶泥, 呢幾日傻下傻下諗左好多 idea, 唔知可唔可以兩者夾埋, 有 d 細緻既野用軟泥補上 (例如人面既五官), 而關節部份就用 printer 做.
我只係傻下傻下諗既, 唔知行唔行得通.  因為我見 3D print 出黎既野都好硬, 唔知可唔可以加入軟既部份.  但又唔見有軟既耗材, 所以諗下可唔可以加泥.
但係如果我要加泥上去, 軟泥定型要放入焗爐大約 110-140 度加熱, 我估 PLA 應該唔掂, 唔知 ABS 會唔會有問題?

例外亦想問問, ching 本身用緊 Solidoodle 2, 我見 Solidoodle 3 既機價同 閃鑄 差唔多, Solidoodle 2 連埋 heat bed 都係差唔多.  
但係 ching 推介 閃鑄, 係咪 Solidoodle 某 d 地方比唔上 閃鑄 呢?
我就咁睇 spec 真係唔識分兩者有幾大分別.